ខេត្តព្រះសីហុន ៖ លោកឡុង ឌីម៉ង់ ត្រូវបានរាជរដ្ឋាភិបាលតែងតាំងជាអភិបាលរងនៃគណៈអភិបាលខេត្តព្រះសីហនុនារសៀល ថ្ងៃទី២២ តុលានេះ ក្រោយពីបានបញ្ចប់បេសកកម្មជាឯកអគ្គរាជទូតកម្ពុជាប្រចាំប្រទេសកូរ៉េខាងត្បូងរយៈពេល៥ឆ្នាំ ។ ពិធីប្រកាសតែងតាំងនេះ…
ខេត្តព្រះសីហុន ៖ លោកឡុង ឌីម៉ង់ ត្រូវបានរាជរដ្ឋាភិបាលតែងតាំងជាអភិបាលរងនៃគណៈអភិបាលខេត្តព្រះសីហនុនារសៀល ថ្ងៃទី២២ តុលានេះ ក្រោយពីបានបញ្ចប់បេសកកម្មជាឯកអគ្គរាជទូតកម្ពុជាប្រចាំប្រទេសកូរ៉េខាងត្បូងរយៈពេល៥ឆ្នាំ ។
ពិធីប្រកាសតែងតាំងនេះ ត្រូវបានធ្វើឡើងដោយមានការអញ្ជើញជាអធិបតីពីលោក គួច ចំរើន អភិបាលនៃគណៈអភិបាលខេត្តព្រះសីហនុ និងតំណាងក្រុមប្រឹក្សាខេត្តផងដែរ ។
លោកឡុង ឌីម៉ង់ គឺជាមន្ត្រីដែលមានបទពិសោធន៍ទាំងថ្នាក់មូលដ្ឋាន និងការទូត ពេញដោយសក្កានុពលដែលកន្លងមកធ្លាប់បានប្រឡូកការងារនៅក្នុងរដ្ឋបាលរាជធានីភ្នំពេញជិត១០ឆ្នាំ មុនពេលត្រូវបានតែងតាំងជាឯកអគ្គរាជទូតកម្ពុជាប្រចាំនៅសាធារណៈរដ្ឋកូរ៉េ ។
លោក ឡុង ឌីម៉ង់ បានបង្ហាញមោទនៈភាព ដែលរាជរដ្ឋាភិបាលបានតែងតាំងលោកជាអភិបាលរងនៃគណៈអភិបាលខេត្តព្រះសីហនុ ដែលជាតំបន់ប៉ូលសេដ្ឋកិច្ចដ៏ធំ១ ក្នុងចំណោមប៉ូលសេដ្ឋកិច្ចធំទាំង៣ ក្នុងយុទ្ធសាស្ត្រចតុកោណដំណាក់កាលទី៤ និតិកាលទី៦ របស់រាជរដ្ឋាភិបាលកម្ពុជា និងត្រូវបានកំណត់គោលដៅជាតំបន់សេដ្ឋកិច្ច ពិសេសគំរូពហុបំណងនៅក្នុងគោលនយោបាយអភិវឌ្ឍន៍ឧស្សាហ៍កម្ម ឆ្នាំ២០១៥.២០២៥ សំដៅប្រែក្លាយខេត្តព្រះសីហនុដែលមានសក្កានុពលលើវិស័យទេសចរណ៍ ឧស្សាហកម្ម និងពាណិជ្ជកម្មក្លាយជាក្បាលម៉ាស៊ីនថ្មីមួយសំរាប់ជំរុញកំណើនសេដ្ឋកិច្ចជាតិដ៏ធំដែលនឹងអាចជួយកម្ពុជាសម្រេចបាននូវចក្ខុវិស័យរបស់ខ្លួនក្លាយជាប្រទេសដែលមានចំណូលមធ្យមកំរិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ ២០៥០ខាងមុខ ។
លោក គួច ចំរើន បានថ្លែងស្វាគមន៍ និងអបអរសាទរចំពោះ លោកឡុង ឌីម៉ង់ ដែលត្រូវបានរាជរដ្ឋាភិបាលផ្តល់សេចក្តីទុកចិត្តតែងតាំងជាអភិបាលរងនៃគណៈអភិបាលខេត្តព្រះសីហនុដើម្បីបន្តនិរន្តរភាពការងារជាមួយក្រុមប្រឹក្សាខេត្តព្រះសីហនុ គណៈអភិបាលខេត្តក្នុងការបំរើឧត្តមប្រយោជន៍ជាតិមាតុភូមិ និងប្រជាពលរដ្ឋខេត្តព្រះសីហនុ ជាពិសេសការអភិវឌ្ឍខេត្តព្រះសីហនុឲ្យ កាន់តែរីកចំរើន ដើម្បីសម្រេចតាមផែនការមេរបស់រាជរដ្ឋាភិបាលគឺដើម្បីអភិវឌ្ឍន៍ខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង ។
លោកអភិបាលខេត្តថ្លែងទៀតថា លោកជឿជាក់យ៉ាងមុតមាំថា ក្នុងតំណែងជាអភិបាលរងខេត្តព្រះសីហនុ លោកឡុង ឌីម៉ង់ នឹងបន្តខិតខំអនុវត្តតួនាទីភារកិច្ច និងយកបទពិសោធន៍ល្អៗជាពិសេសទំនាក់ទំនងកិច្ចការបរទេសការទូត និងកិច្ចសហប្រតិបត្តិការអន្តរជាតិស្របតាមរដ្ឋធម្មនុញ្ញច្បាប់ និងលិខិតបទដ្ឋានគិតិយុទ្ធប្រកបដោយមនសិការវិជ្ជាជីវៈមានការទទួលខុសត្រូវខ្ពស់មានតម្លាភាព គណនេយ្យភាព ជាពិសេសត្រូវប្រកាន់ខ្ជាប់នូវអភិក្រមរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺឆ្លុះកញ្ចក់ ងូតទឹក ដុសក្អែលព្យាបាល និងវះកាត់ និងបាវចនា២គឺ ៖ កែទម្រង់ខាងក្នុង និងបង្កើតមិត្តខាងក្រៅ ដោយស្មារតីឯករាជ្យ ៕
ចែករំលែកព័តមាននេះ