ប្រទេសស៊ីរី ៖ ការប៉ះទង្គិចគ្នាដ៏បង្ហូរឈាម កើតមានជាថ្មីទៀតកាលពីថ្ងៃទី២២ ធ្នូ នៅក្រុងអាឡែបភាគខាងជើងស៊ីរី រវាងកងកម្លាំងឃើតនិងកងទ័ពស៊ីរី ពេលដែលភាគីទាំង២ប៉ុនប៉ងអនុវត្តកិច្ចព្រមព្រៀងស្ដីពីសមាហរណកម្មបណ្ដាស្ថាប័ន របស់ជនជាតិភាគតិចដ៏សំខាន់នោះ ចូលក្នុងផ្ទៃរដ្ឋអំណាចកណ្ដាលស៊ីរី…
ប្រទេសស៊ីរី ៖ ការប៉ះទង្គិចគ្នាដ៏បង្ហូរឈាម កើតមានជាថ្មីទៀតកាលពីថ្ងៃទី២២ ធ្នូ នៅក្រុងអាឡែបភាគខាងជើងស៊ីរី រវាងកងកម្លាំងឃើតនិងកងទ័ពស៊ីរី ពេលដែលភាគីទាំង២ប៉ុនប៉ងអនុវត្តកិច្ចព្រមព្រៀងស្ដីពីសមាហរណកម្មបណ្ដាស្ថាប័ន របស់ជនជាតិភាគតិចដ៏សំខាន់នោះ ចូលក្នុងផ្ទៃរដ្ឋអំណាចកណ្ដាលស៊ីរី ។ នាយប់ថ្ងៃនោះ កងកម្លាំងទាំង២ អំពាវនាវដល់កងកម្លាំងពួកគេទាំងសងខាង បញ្ឈប់ការប្រទូស្តរ៉ាយគ្នា តែដោយទម្លាក់ការទទួលខុសត្រូវដាក់គ្នាទៅវិញទៅមក ចំពោះការវាយប្រហារគ្នានោះ។
តាមទីភ្នាក់ងារព័ត៌មានស៊ីរីSANA ថា ជនស៊ីវិល២នាក់បានត្រូវស្លាប់ និង៨នាក់ទៀតរងរបួស ដោយសារការបាញ់កាំភ្លើងត្បាល់និងគ្រាប់រ៉ុក្កែត របស់កងកម្លាំងប្រជាធិបតេយ្យឃើតFDS នៅទីក្រុងធំទី២របស់ស៊ីរីនោះ។ ចំណែកកងកម្លាំងFDSជាដៃស្ដាំប្រដាប់អាវុធ របស់រដ្ឋបាលឃើតក្នុងតំបន់ស្វយ័ត អះអាងពីការស្លាប់របស់នារីអាយុ៥៧ឆ្នាំម្នាក់ និងជនស៊ីវិល១៧នាក់រងរបួស ក្នុងការវាយប្រហារមួយរបស់កងទាហានរដ្ឋាភិបាលដោយអាវុធធុនធ្ងន់។
ការប៉ះទង្គិចគ្នាកើតមានក្នុងសង្កាត់២នៃក្រុងអាឡែបកាន់កាប់ដោយកងកម្លាំងឃើតមូលដ្ឋាន កន្លែងដែលជនស៊ីវិល២នាក់ធ្លាប់ស្លាប់រួចហើយកាលពីខែតុលា ក្នុងការប្រយុទ្ធគ្នារវាងកងកម្លាំងទាំង២មុនពេលមានបទឈប់បាញ់គ្នា៕
ចែករំលែកព័តមាននេះ