តុលាការសម្រេចឃុំខ្លួន មន្ត្រីកងទ័ពអាកាសម្នាក់ ពាក់ព័ន្ធ ០៣បទល្មើស
រាជធានីភ្នំពេញ ៖ លោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ នៅសៀលថ្ងៃទី២២ ខែតុលា ឆ្នាំ២០២១នេះ បានសម្រេចចេញដីកា…
រាជធានីភ្នំពេញ ៖ លោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ នៅសៀលថ្ងៃទី២២ ខែតុលា ឆ្នាំ២០២១នេះ បានសម្រេចចេញដីកា…
រាជធានីភ្នំពេញ ៖ លោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ នៅសៀលថ្ងៃទី២២ ខែតុលា ឆ្នាំ២០២១នេះ បានសម្រេចចេញដីកា ឃុំខ្លួនមន្ត្រីកងទ័ពជើងអាកាស ប្រចាំនៅព្រលានយន្តហោះកេងកង នៅខេត្តព្រះសីហនុ ដាក់ពន្ធនាគារព្រៃសជាបណ្តោះអាសន្ន តាមការចោទប្រកាន់ពីបទ គំរាមកំហែងថា នឹងសម្លាប់, បទឆបោក និងបទ រំលោភលើទំនុកចិត្ត ។
ជនសង្ស័យមានឈ្មោះ អេង អូន ភេទប្រុស អាយុ៤២ឆ្នាំ មានទីលំនៅភូមិ-ឃុំស្រុកព្រៃនប់ ខេត្តព្រះសីហនុ មានមុខរបរជាមន្ត្រីកងទ័ពជើងអាកាស ប្រចាំនៅព្រលានយន្តហោះកេងកង ខេត្តព្រះសីហនុ ។
ជនសង្ស័យត្រូវបានកម្លាំងសមត្តកិច្ចចាប់ខ្លួន កាលពីថ្ងៃទី២១ ខែតុលា ស្ថិតនៅក្លឹបខារ៉ាអូខេ មួយកន្លែង ក្នុងភូមិត្រែងត្រយឹង ស្រុកភ្នំស្រួច ខេត្តកំពង់ស្ពឺ តាមដីកា បង្គាប់ឲ្យនាំខ្លួនរបស់លោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ ពាក់ពន្ធពីបទគំរាមកំហែងថា នឹងសម្លាប់ បទ ឆបោក នឹងបទ រំលោភលើទំនុកចិត្ត តាមមាត្រា ២៣៣, ៣៧៧, ៣៧៨, ៣៩១ និងមាត្រា ៣៩២ នៃក្រមព្រហ្មទណ្ឌ ។
ក្រោយឃាត់ខ្លួនជនសង្ស័យជាមន្ត្រីយោធានោះ ត្រូវបានបញ្ជូនមកកាន់ការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ លុះវេលាម៉ោង១១និង៣០នាទីព្រឹកថ្ងៃទី២២ ខែតុលា ឆ្នាំ២០២១ នគរបាលព្រហ្មទណ្ឌ បានបញ្ជូនជនសង្ស័យទៅកាន់សាលាដំបូងរាជធានីភ្នំពេញ ពាក់ពន្ធលើបណ្តឹងចំនួន ៣បទល្មើស ។
បើតាមសមត្ថកិច្ច បានឲ្យដឹងថា ជនសង្ស័យឈ្មោះ អេង អូន បានប្រព្រឹត្តអំពើគំរាមកំហែងថា នឹងសម្លាប់, ឆបោក និងរំលោភលើទំនុកចិត្ត នៅខេត្តកំពត ខេត្តព្រះសីហនុ និងនៅរាជធានីភ្នំពេញ កាលពីអំឡុងឆ្នាំ២០២០ និង២០២១ ដែលជនត្រូវចោទ មិនព្រមចូលបង្ហាញខ្លួនតាមបញ្ជា នៃដីកាបង្គាប់ឲ្យចូលខ្លួននោះទេ ហេតុដូច្នេះតុលាការ គប្បីសម្រេចឲ្យនាំខ្លួនជនជាប់ចោទឈ្មោះ អេង អូន ដើម្បីបំពេញកិច្ចការស៊ើបសួរតាមនីតិវិធី ។
ជនសង្ស័យត្រូវបានចៅក្រម បើកការស៊ើបសួរអស់រយៈពេលជាច្រើនម៉ោង រហូតដល់រសៀលថ្ងៃដដែលនេះ ទើបសម្រេចចេញដីកាឃុំខ្លួនដាក់ពន្ធនាគារព្រៃ.ស ជាបណ្តោះអាសន្ន ។
សូមរម្លឹកថា ជនជាប់សង្ស័យឈ្មោះ អេង អូន ដែលគេស្គាល់ថា ជាមន្ត្រីយោធានៅមូលដ្ឋានទ័ពអាកាសព្រលានយន្តកងកេង ខេត្តព្រះសីហនុ និងជាប្រធានក្រុមហ៊ុនអភិវឌ្ឍន៍ ភ្នំថ្កូវ ខេត្តកំពត កាលពីថ្ងៃទី២៦ ខែកក្កដា ឆ្នាំ២០២១ ធ្លាប់ត្រូវបានសមត្ថកិច្ចព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួនបញ្ជូនឡើងតុលាកាត ពាក់ពន្ធបទល្មើស ឆបោក និងរំលោភលើទំនុកចិត្ត លើទឹកប្រាក់ប្រមាណ ៩២ម៉ឺនដុល្លារអាមេរិក ។
ពេលនោះសមត្តកិច្ចបានអនុវត្តតាមដីកា បញ្ជាឲ្យចូលខ្លួនរបស់លោក ស៊ិត វណ្ណៈ ព្រះរាជអាជ្ញារងតំណាងអយ្យការអមសាលាដំបូងរាជធានីភ្នំពេញ ខណៈពេលជនសង្ស័យឈ្មោះ អេង អូន បានចូលបំភ្លឺ ហើយត្រូវកម្លាំងសមត្តកិច្ច ចាំចាប់នៅពេលចេញផុតពីបរិវេណសាលាដំបូង ធ្វើឲ្យមានការភ្ញាក់ផ្ញើលនៅលើមហាវិថី មុខផ្សារស៊ីធីមល សង្កាត់មនោរម្យខណ្ឌ៧មករា ។
ការចាប់ខ្លួនឈ្មោះ អេង អូន មិនបានមួយដង្ហើមចង្រិតផង តំណាងអយ្យការ បានឲ្យសមត្ថកិច្ច ដោះលែងវិញ ដោយសម្អាហេតុថា ព្រះរាជអាជ្ញារងកាន់សំណុំរឿងនោះ បានលប់ដីកាបញ្ជាឲ្យចូលខ្លួនរបស់ឈ្មោះ អេង អូន រួចរាល់ហើយ គ្រាន់តែថា ដីកាបញ្ឈប់លើដីកាបញ្ជាឲ្យចូលខ្លួននោះ មានការយឺតយ៉ាវបន្តិច ដែលនឹងធ្លាក់ដល់ដៃសាម៉ីខ្លួន បណ្តាលឲ្យនីតិវិធីមានការខុសឆ្គង ។
សូមបញ្ជាក់ថា លោក អេង អូន ក៏ត្រូវបានលោក ស៊ុយ សែម រដ្ឋមន្ត្រីក្រសួងរ៉ែ និងថាមពល សម្រេចផាកពិន័យជាទឹកប្រាក់ជាង ៨០០លានរៀល ផងដែរ ដោយសារតែក្រុមហ៊ុនអភិវឌ្ឍន៍ ភ្នំថ្កូវ របស់លោក បានកាយយកដីក្រហមមុនទទួលបានអាជ្ញាប័ណ្ណ ។ ប៉ុន្តែរហូតមកដល់ពេលនេះ លោក អេង អូន ប្រធានក្រុមហ៊ុនអភិវឌ្ឍន៍ ភ្នំថ្កូវ បានគេចវេស ដោយហេតុផលផ្សេងៗ ពុំព្រមបង់ប្រាក់ផាកពិន័យ តាមការសម្រេចរបស់លោករដ្ឋមន្ត្រីក្រសួងរ៉ែ នោះទេ ៕
ចែករំលែកព័តមាននេះ