ប្រទេសថៃ ៖ ដើម្បីបើកកិច្ចសហប្រតិបត្តិការជាដៃគូសេដ្ឋកិច្ចថ្មីជាមួយកូរ៉េខាងត្បូង ថៃបានអញ្ជើញបណ្តាក្រុមហ៊ុនកូរ៉េមកវិនិយោគលើគម្រោងរថភ្លើងល្បឿនលឿន និងគម្រោងគ្រប់គ្រងទឹក ដោយមិនចាំបាច់ប្រកួតប្រជែងលើតម្លៃដែលផ្តល់ឲ្យពួកគេឡើយ ។
លោកឧបនាយករដ្ឋមន្ត្រី Somkid Jatusripitak ថ្លែងថា ៖ « លោកបានប្រាប់ឧបនាយករដ្ឋមន្ត្រីកូរ៉េខាងត្បូង Yoo Il-ho ក្នុងជំនួបកំពូល ស្តីពីកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរនៅទីក្រុងសេអ៊ូលថា រដ្ឋាភិបាលថៃបានប្តេជ្ញាចិត្តបង្កើនទំនាក់ទំនងសេដ្ឋកិច្ចយ៉ាងជិតស្និទ្ធជាមួយនឹងកូរ៉េខាងត្បូង » ។
ជាក់ស្តែង រដ្ឋាភិបាលថៃចង់ផ្តល់គម្រោងហេដ្ឋារចនាសម្ព័ន្ធធំៗពីរ ក្រោមកិច្ចព្រមព្រៀងរដ្ឋាភិបាល និងរដ្ឋាភិបាល (G2G) ទៅឱ្យក្រុមហ៊ុនកូរ៉េខាងត្បូង ។
គម្រោងរថភ្លើងល្បឿនលឿនដែលបានផ្តល់ឲ្យកូរ៉េខាងត្បូងនោះ គឺចាប់ពីខេត្ត Mukdahan ទៅខេត្ត Tak ។ ចំណែកគម្រោងគ្រប់គ្រងទឹកដែលមានទឹកប្រាក់ចំនួន២០ប៊ីលានបាត នឹងចាប់ផ្តើមនៅចុងឆ្នាំនេះ នៅក្រុង Huay Luang និង Nong Khai សម្រាប់ធ្វើប្រព័ន្ធធារាសាស្ត្រនៅក្នុងទន្លេមេគង្គ ។
« ក្នុងនោះដែរ រដ្ឋាភិបាលនឹងអនុញ្ញាតឲ្យកូរ៉េខាងត្បូងធ្វើវាក្នុងករណីពិសេស ប្រសិនជាពួកគេចាប់អារម្មណ៍ ។ វាប្រហែលជាគម្រោងសងជំងឺចិត្តដល់កូរ៉េខាងត្បូង សម្រាប់បញ្ហាដែលបានកើតឡើងកាលពីលើកមុន ពោលគឺសំដៅទៅលើកិច្ចសន្យាគ្រប់គ្រងទឹកក្នុងទន្លេ Chao Phraya និងទន្លេផ្សេងទៀត ដែលបានឈ្នះ និងគ្រប់គ្រងដោយក្រុមហ៊ុន Korea Water Resources Corp » ។ នេះបើតាមប្រសាសន៍របស់លោកឧបនាយករដ្ឋមន្ត្រី Somkid Jatusripitak ។
លោក Somkid Jatusripitak បន្តថា ៖ « អាជ្ញាធរឧស្សាហកម្មថៃ ក៏បានសម្លឹងឃើញដីពិសេសមួយកន្លែងនៅក្នុងខេត្តចាន់បុរី សម្រាប់ផ្តល់នូវការវិនិយោគដល់ក្រុមហ៊ុនកូរ៉េខាងត្បូង ដែលនឹងជួយដល់វិធានការរបស់ថៃ ក្នុងការអភិវឌ្ឍតំបន់ឧស្សាហកម្មថ្មីនៅ Eastern Seaboard ។ ម្យ៉ាងទៀត បណ្តាក្រុមហ៊ុនកូរ៉េខាងត្បូង ក៏ត្រូវបានទទួលស្វាគមន៍ឱ្យចូលរួមដេញថ្លៃទៅលើគម្រោងអភិវឌ្ឍន៍ហេដ្ឋារចនាសម្ព័ន្ធដទៃទៀតដែលផ្តល់ដោយរដ្ឋាភិបាលថៃផងដែរ ដូចជា គម្រោង Chao Phraya ដែលនឹងបើកការដេញថ្លៃជាផ្លូវការនៅឆ្នាំក្រោយ គម្រោងរថភ្លើងល្បឿនលឿននៅទីក្រុងបាងកក និងគម្រោងកំពង់ផែសមុទ្រ » ។
លោក Park Geun-hye ប្រធានាធិបតីកូរ៉េខាងត្បូង បានថ្លែងក្នុងឱកាសជួបសំណេះសំណាលជាមួយលោក Somkid Jatusripitak ថា ៖ « លោកនាយករដ្ឋមន្ត្រីថៃ ប្រាយុទ្ធចាន់អូចា ចង់បង្កើនចំណងមិត្តភាពដ៏ជិតស្និទ្ធជាមួយកូរ៉េខាងត្បូង » ។
លោក Somkid Jatusripitak លើកឡើងថា ៖ « បើប្រៀបធៀបជាមួយប្រទេសជប៉ុននិងចិន ចំណងមិត្តភាពរបស់យើងជាមួយនឹងកូរ៉េខាងត្បូង គឺមិនទាន់ជ្រាលជ្រៅនៅឡើយទេ ហើយពួកគេបានវិនិយោគទៅកាន់ប្រទេសដទៃទៀតដូចជា រៀតណាម ជាងមកប្រទេសថៃ ។ កូរ៉េខាងត្បូងត្រូវតែចូលរួមចំណែកយ៉ាងសំខាន់ក្នុងការដឹកនាំកែប្រែរចនាសម្ព័ន្ធសេដ្ឋកិច្ច បង្កើតពាណិជ្ជកម្មច្នៃប្រឌិត គម្រោងទីក្រុងឆ្លាតវៃ និងគម្រោងឌីជីថល ហៅកាត់ថា S-curve » ។
គួរបញ្ជាក់ថា ថៃគ្រោងនឹងបង្កើនពាណិជ្ជកម្មទ្វេដងជាមួយកូរ៉េខាងត្បូង ក្នុងរយៈពេល២-៣ឆ្នាំក្រោយនេះ ៕
ចែករំលែកព័តមាននេះ