រាជធានីភ្នំពេញ ៖ សុភាពនារីស្ទើរតែគ្រប់រូប គឺស្រឡាញ់កាបូបយួរដៃ ជាពិសេសពេលចូលរួមកម្មវិធីនានាឃើញថា កាបូបយួរដៃរបស់នារីមួយចំនួន គឹតែងតែទាក់ទាញភ្នែកមនុស្សគ្រប់គ្នាក្នុងកម្មវិធី ។ ស្ត្រីគ្រប់រូបតែងតែគិតថា កាបូបយួររបស់ខ្លួនទិញក្នុងតម្លៃរាប់ពាន់ដុល្លារវាពិតជាថ្លៃ ប៉ុន្តែមិនដូច្នោះទេ នៅមានកាបូបយួររបស់នារី ជាច្រើនមានតម្លៃកប់ពពក អាចថា ថ្លៃជាងផ្ទះវីឡាពីរបីឯណោះ ។ អ្នកអាចទិញបានក្នុងតម្លៃណាមួយដែលអ្នកមានលទ្ធភាពទិញ និងគិតថា វាស័ក្តិសមនឹងអ្នក ហើយប្រសិនអ្នកសល់លុយចាយមិនអស់ផងនោះ អ្នកអាចមើលលើតម្លៃកាបូបយួរដៃមួយនេះបាន ដែលវាជាកាបូបដែលថ្លៃបំផុតក្នុងលោក ។
Boarini Milanesi’s Parva Mea បានក្លាយជាកាបូបយួរដៃ ថ្លៃបំផុតក្នុងលោក មានតម្លៃ ៧ លានដុល្លារអាមេរិក ! ។ អ្នករចនាជនជាតិអ៉ីតាលីឈ្មោះ Boarini Milanesi បានបង្កើតកាបូបយួរដៃនេះឡើង ក្រោមអត្ថន័យចង់បង្ហាញមហាជនពីការការពារបន្ទាន់នូវសមុទ្រដ៏ស្រស់ស្អាតរបស់យើង ពីការការគំរាមកំហែងឥតឈប់ឈរ នៃសំរាមប្លាស្ទិកដែលមនុស្សបោះវាចោលផ្តេសផ្តាសលើផ្ទៃសាគ ដែលជាហេតុនាំឱ្យកាបូបនេះមានពណ៌ខៀវដូចផ្ទៃសមុទ្រ ។
ក្នុងតម្លៃ ៧ លានដុល្លារ កាបូបនេះបច្ចុប្បន្ននៅសល់តែ ៣ ប៉ុណ្ណោះ ។ កាបូបម៉ូឌែល The Parva Mea ត្រូវបានតុបតែងដោយគ្រឿងអលង្ការ ហើយត្រូវបានធ្វើពីស្បែកសត្វក្រពើ ពាក់កណ្តាលភ្លឺរលោងដូចពណ៌ទឹកសមុទ្រ ។ រូបមេអំបៅបានធ្វើឡើងពីមាសពណ៌សចំនួន ១០ ត្រូវបានរុំព័ទ្ធដោយត្បូងកណ្តៀងពណ៌ខៀវ និងត្បូងពេជ្រ ដែលបង្ហាញពីភាពច្បាស់លាស់ថា វាមានអត្ថន័យដូចតំណក់ទឹកភ្លៀង ដែលមានទម្ងន់រហូតដល់ ១៣០ ការ៉ាត់ ។ កាបូបនីមួយៗភ្ជាប់មកជាមួយនូវវិញ្ញាបនប័ត្របញ្ជាក់ពីភាពត្រឹមត្រូវតែមួយគត់របស់វា ៕ ប្រភព ៖ indiatimes
ចែករំលែកព័តមាននេះ