រាជធានីភ្នំពេញ ៖ ការប្រកួតប្រដាល់វគ្គសន្សំពិន្ទុឈានទៅដណ្តើមខ្សែក្រវាត់គោជល់ក្នុងប្រភេទទម្ងន់៦៩គីឡូក្រាមនៅលើសង្វៀនទូរទស្សន៍ស៊ីអិនស៊ី ថ្ងៃសៅរ៍ ទី២៦ មីនា ខាងមុខនេះ ឈានចូលដល់សប្តាហ៍ទី៤ហើយ ។
រាជធានីភ្នំពេញ ៖ ការប្រកួតប្រដាល់វគ្គសន្សំពិន្ទុឈានទៅដណ្តើមខ្សែក្រវាត់គោជល់ក្នុងប្រភេទទម្ងន់៦៩គីឡូក្រាមនៅលើសង្វៀនទូរទស្សន៍ស៊ីអិនស៊ី ថ្ងៃសៅរ៍ ទី២៦ មីនា ខាងមុខនេះ ឈានចូលដល់សប្តាហ៍ទី៤ហើយ ។ សម្រាប់កីឡាករ សរ រាជសីហ៍ មកពីក្លិបមោងឫស្សីមរតកគុនខ្មែរ និងពេជ្រ សីហា មកពីសមាគមកីឡាប្រដាល់ក្រសួងការពារជាតិ ដែលទើបប្រកួតបាន១លើកម្នាក់ហើយចាញ់កីឡាករថៃដូចគ្នានោះ ចាំមើលលើកនេះតើពួកគេអាចស្តារមុខមាត់វិញបានឬអត់ ?
ការប្រកួតរបស់ សរ រាជសីហ៍ កាលពីថ្ងៃទី១៣ មីនា កន្លងមកនោះ ត្រូវកីឡាករថៃឈ្មោះ ផ្លាំងនុម លូកម៉ាខាមរ៉ាន វាយឱ្យសន្លប់នៅក្នុងទី៤ ចំណែកពេជ្រ សីហា ចាញ់ពិន្ទុកីឡាករថៃ ឈ្មោះ ហ្វានិមិត្ត វីរិយៈហ្វាម ទាំងមិនអស់ចិត្តឡើយ ។ ដោយឡែក សម្រាប់ការប្រកួតលើកនេះ សរ រាជសីហ៍ ត្រូវជួបប្រកួតជាមួយកីឡាករថៃ ឈ្មោះ ហ្វានិមិត្ត វីរិយៈហ្វាម វិញម្តង រីឯ ពេជ្រ សីហា ត្រូវជួបជាមួយផ្លាំងនុម លូកម៉ាខាមរ៉ាន ។ ទោះបីមានការផ្លាស់ប្តូរគូប្រកួតក៏អ្នកតាមដានការប្រដាល់ភាគច្រើនហាក់មិនសង្ឃឹមថា កីឡាករកម្ពុជាអាចយកឈ្នះកីឡាករថៃបានដែរ ព្រោះកីឡាករថៃទាំង២រូបនេះសុទ្ធតែជាអ្នកជើងខ្លាំងពិបាកបង្ក្រាបបំផុត ។ គេដឹងហើយថា បទពិសោធន៍ប្រកួតនៅលើសង្វៀនរបស់ សរ រាជសីហ៍ តិចជាងគូប្រកួត ហើយបើធ្វើការប្រៀបធៀបទៅលើល្បិចប្រយុទ្ធរបស់ពួកគេទាំង២វិញនោះ គឺខុសគ្នាឆ្ងាយណាស់ សូម្បីតែផ្លែកែងនិងជង្គង់ក៏មិនអាចប្រៀបបាននឹងហ្វានិមិត្ត វីរិយៈហ្វាមដែរ ។ ចាំមើល សរ រាជសីហ៍ មានសំណាងឈ្នះឬអត់ក្នុងការប្រកួតលើកនេះ ។
ចំណែក ពេជ្រ សីហា ក៏មិនសូវជាសង្ឃឹមប៉ុន្មានដែរសម្រាប់ការជួបប្រកួតជាមួយផ្លាំង នុម លូកម៉ាខាមរ៉ាន លើកនេះ ព្រោះថាអ្នកប្រដាល់ថៃរូបនេះ ធ្លាប់ផ្តួល សរ រាជសីហ៍ ឱ្យសន្លប់នៅក្រោមកណ្តាប់ដៃរបស់គេរួចម្តងមកហើយ ។ តាមពិត ពេជ្រ សីហា ក៏ធ្លាប់ជាអ្នកប្រដាល់ជើងខ្លាំងមួយរូបដែរ ប៉ុន្តែរហូតមកទល់នឹងពេលនេះ គេហាក់បីដូចជាធ្លាក់កូដជាងមុនឆ្ងាយណាស់ សូម្បីតែស្នៀតកែងនិងជង្គង់របស់គេដែលធ្លាប់តែធ្វើឱ្យគូប្រកួតញាក់សាច់គ្រប់គ្នានោះ ពេលនេះមិនអាចប្រើការបានល្អដូចមុនទៀតឡើយ ។ គូនេះ ទោះបីកីឡាករថៃមានបទពិសោធន៍ប្រកួតតិចជាង ពេជ្រ សីហា ក្តី ប៉ុន្តែល្បិចប្រយុទ្ធនៅលើសង្វៀនរបស់គេល្អជាង។ ដូច្នេះ ពេជ្រ សីហា មិនអាចធ្វេសប្រហែសបានឡើយ ។
ក្រៅពីគូដណ្តើមខ្សែក្រវាត់នៅលើសង្វៀនដដែល កីឡាករ ឡុង សំណាង មកពីក្លិបសាលវ័ន្ត្កីឡា ត្រូវបានផ្គូផ្គងឱ្យជួបប្រកួតជាមួយកីឡាករ ទេស ឧត្តម មកពីក្លិបកងពលតូចលេខ៧០ និងកីឡាករ ពេជ្រ ប៊ុនសេន មកពីក្លិបអេភូថងកីឡា ប្រកួតជាមួយ គឿប សុវណ្ណឌឿន មកពីក្លិបមោងឫស្សីមរតកគុនខ្មែរក្នុងនាមជាគូមិត្តភាព ៕
ចែករំលែកព័តមាននេះ