រាជធានីភ្នំពេញ ៖ បុរសម្នាក់ស្រវឹងស្រាជិះម៉ូតូដេញតាមបុកម៉ូតូ៣គ្រឿងបណ្តាលឲ្យម៉ូតូមួយគ្រឿងរេចង្កូតទៅបុកកន្លែងលក់ត្រីអាំង សាច់មាន់អាំង ពងទា កំពប់ពាសពេញផ្លូវ
រាជធានីភ្នំពេញ ៖ បុរសម្នាក់ស្រវឹងស្រាជិះម៉ូតូដេញតាមបុកម៉ូតូ៣គ្រឿងបណ្តាលឲ្យម៉ូតូមួយគ្រឿងរេចង្កូតទៅបុកកន្លែងលក់ត្រីអាំង សាច់មាន់អាំង ពងទា កំពប់ពាសពេញផ្លូវ តែមិនមានអ្នករងរបួសនោះទេ កាលពីវេលាម៉ោង១និង១៥នាទីរំលងអធ្រាត្រឈានចូលថ្ងៃទី២៣ មីនា នៅទល់មុខវត្តសន្សំកុសល ផ្លូវ២៧១ សង្កាត់ផ្សារដើមថ្កូវ ខណ្ឌចំការមន ។
តាមសម្តីខាងម៉ូតូរងគ្រោះបានឲ្យដឹងថា ពួកគេមានគ្នា៥នាក់ (ស្រីម្នាក់) ជិះម៉ូតូ៣គ្រឿង ចេញពីផ្ទះគោលបំណងទៅលេងនៅខូលក្លឹប ស្ថិតនៅផ្លូវ២៧១ សង្កាត់ផ្សារដើមថ្កូវ ខណ្ឌចំការមន ដោយធ្វើដំណើរតាមផ្លូវ២៧១ទិសដៅពីជើងទៅត្បូង លុះមកដល់ចំណុចកើតហេតុ ស្រាប់តែមានបុរសម្នាក់ អាយុ៣៥ឆ្នាំ ជិះម៉ូតូ ពណ៌ខ្មៅ មួយគ្រឿង ធ្វើដំណើរស្របទិសគ្នា ក្នុងស្ថានភាពស្រវឹងមកពីក្រោយដេញតាមធាក់ម៉ូតូពួកគេធ្វើឱ្យម៉ូតូហុងដាឌ្រីមមួយគ្រឿង ជិះគ្នាពីរនាក់ជ្រុលទៅបុកកន្លែងលក់ត្រីអាំង មាន់អាំង សាច់ក្រក ងៀតគោ និងបណ្តាលឱ្យកំពប់ពេញផ្លូវ តែមិនបង្កគ្រោះថ្នាក់ដល់មនុស្សនោះទេ ភ្លាមៗខាងម៉ូតូបង្កបម្រុងរករឿងវាយទៅខាងម៉ូតូដែលមានគ្នាច្រើន តែត្រូវបានសមត្ថកិច្ចមូលដ្ឋានចុះទៅដល់ ទើបពួកគេទាំងសងខាងសម្របសម្រួលគ្នា ដោយខាងម៉ូតូដែលមានគ្នាច្រើន សុំយករួចខ្លួនទុកនៅខាងម៉ូតូPCXដែលជិះម្នាក់ឯង នៅដោះស្រាយជាមួយអ្នកលក់ត្រីអាំង ។
ក្រោយពេលកើតហេតុ អ្នកលក់ត្រីអាំងកំពប់ត្រីអាំងអស់រលីងបានទារសំណង១០០ដុល្លារ តែខាងម៉ូតូPCX ឱ្យ១០ម៉ឺនរៀល អ្នកលក់ត្រីអាំងមិនព្រម ចុះមកនៅ២០ម៉ឺនរៀល តែដោយការសម្របសម្រួលពីសមត្ថកិច្ច ខាងម៉ូតូPCXសុំសង១៥ម៉ឺនរៀល រួចខាងលក់ត្រីអាំង ក៍ព្រមយក់ដើម្បីបញ្ចប់រឿង ៕
ចែករំលែកព័តមាននេះ