៤ក្រុមចុងក្រោយ កំពុងត្រៀមខ្លួនប្រជែងលើកពាន
- ភ្នំពេញ
រាជធានីភ្នំពេញ ៖ ទីបំផុត ការប្រកួតបាល់ទាត់ដណ្ដើមពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) ប្រចាំឆ្នាំ២០២១
រាជធានីភ្នំពេញ ៖ ទីបំផុត ការប្រកួតបាល់ទាត់ដណ្ដើមពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) ប្រចាំឆ្នាំ២០២១ បានរកឃើញបេក្ខភាពវគ្គពាក់កណ្ដាលផ្ដាច់ព្រ័ត្រហើយ ក្រោយបញ្ចប់ការប្រកួតវគ្គ ៨ក្រុមចុងក្រោយ កាលពីចុងសប្ដាហ៍កន្លងទៅ ដោយ៤ក្រុមដែលត្រៀមខ្លួនប្រជែងលើកពានឆ្នាំនេះ រួមមាន ក្រុមបាល់ទាត់ខេត្តត្បូងឃ្មុំ, ខេត្តបាត់ដំបង, ខេត្តបន្ទាយមានជ័យ និងក្រុមកោះកុងអេហ្វស៊ី។
ចំពោះលទ្ធផលការប្រកួតវគ្គ៨ក្រុមចុងក្រោយ រួមមានខេត្តត្បូងឃ្មុំ បានយកឈ្នះក្រុមភ្នំពេញហ្គាឡាក់ស៊ី ២-០ នៅកីឡដ្ឋាន AEU Sport Park។ ខេត្តបាត់ដំបង បានយកឈ្នះខេត្តកណ្ដាល ៧-១ នៅកីឡដ្ឋាន 7NG។ ខេត្តបន្ទាយមានជ័យ យកឈ្នះក្រុមសៀមរាប អេហ្វស៊ី ១-០ នៅកីឡដ្ឋានខេមបូឌាអ៊ែរវ៉េ និងក្រុមកោះកុងអេហ្វស៊ី បានយកឈ្នះខេត្តកំពង់ឆ្នាំង ៩-១ នៅកីឡដ្ឋានស្ដាតចាស់។
យោងតាមរូបមន្ដប្រកួត ក្រុមទទួលបានជ័យជម្នះខាងលើ ត្រូវដឹកដៃគ្នាឡើងវគ្គពាក់កណ្ដាលផ្ដាច់ព្រ័ត្រ ខណៈកម្មវិធីប្រកួតវគ្គបន្ដ គឺខេត្តត្បូងឃ្មុំ ត្រូវជួបខេត្តបាត់ដំបង និងក្រុមកោះកុងអេហ្វស៊ី ត្រូវជួបក្រុមបាល់ទាត់ខេត្តបន្ទាយមានជ័យ។ ការប្រកួតវគ្គ ៤ក្រុមចុងក្រោយនេះ នឹងធ្វើឡើងនាថ្ងៃទី២០ ខែតុលានេះ ដើម្បីកាត់សេចក្ដីរកក្រុមខ្លាំងឡើងវគ្គផ្ដាច់ព្រ័ត្រ នៃពានរង្វាន់សម្ដេចតេជោ ហ៊ុន សែន (ថ្នាក់ខេត្ត) ឆ្នាំ២០២១។
ក្រុមនីមួយៗ សុទ្ធតែបង្ហាញមហិច្ឆតាលើកពានដូចគ្នា ជាមួយនឹងជំនឿចិត្តខ្ពស់ បើទោះជាគូប្រកួតរបស់ខ្លួនសុទ្ធតែមានកម្លាំងខ្លាំង។ ឱកាសមកដល់វគ្គនេះ អ្នកគាំទ្រយល់ថា បើទោះជាមិនបានតំណែងលេខ១ តែក៏ពិតជាឈានឡើងនៅក្នុងក្រសែភ្នែកអ្នកតាមដានផងដែរ ដោយសារតែឱកាស៤ក្រុមចុងក្រោយ គឺមិនមែនជារឿងធម្មតា។ ក្រុមទាំង៤ ប្រកាសថានឹងប្រឹងអោយអស់ពីសមត្ថភាព ដើម្បីដណ្ដើមឱកាសដែលខ្លួនស្រម៉ៃ ខណៈដែលក្រុមលើកពាន គឺមិនអាចមានស្ទួននោះ៕
ចែករំលែកព័តមាននេះ