រាជធានីភ្នំពេញ ៖ រថយន្តម៉ាកហ៊ីណូមួយគ្រឿង បើកបរក្នុងល្បឿនយ៉ាងលឿនជ្រុលចង្កូតទៅបុករះរថយន្ត២គ្រឿងផ្សេងទៀតជាបន្តបន្ទាប់ បណ្ដាល​ឲ្យរងការខូច​ខាត​យ៉ាង​ដំណំ និងបានជ្រុលទៅបុកចូលផ្ទះជាង​ជួសជុលម៉ូតូ និងផ្ទះបោកអ៊ុតសម្លៀកបំពាក់មួយកន្លែងទៀត បណ្តាលឲ្យក្មេងស្រី២នាក់រងរបួសថែមទៀត ហើយអ្នក​បើកបរ​បានរត់គេចខ្លួនទៅបាត់ស្រមោលតែម្ដង។

 ហេតុការណ៍គ្រោះថ្នាក់ខាងលើនេះ បានកើតឡើងកាលពីវេលាម៉ោង១២ថ្ងៃត្រង់ ថ្ងៃទី២១ ខែមីនា ឆ្នាំ២០១៦ នៅ​ចំណុច​ផ្ទះជួសជុលម៉ូតូ និងផ្ទះបោកអ៊ុត លេខ៣៣៨ ដែលស្ថិតនៅជិតផ្សារថ្នល់បត់ តាមបណ្តោយផ្លូវលេខ២១៧ ភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។ តាមប្រភពព័ត៌មានបានឲ្យដឹងថា រថយន្តបង្កនោះ​ម៉ាក ហ៊ី​ណូដឹកដី ពណ៌ស្លែ ពាក់ស្លាកលេខ កំពង់ចាម 3A-0569 មិនស្គាល់អត្តសញ្ញាណអ្នកបើកបរនោះទេ។

នៅមុនពេលកើតហេតុ រថយន្តបង្កហេតុ​មួយគ្រឿងនេះ បានបើកបរក្នុងទិសដៅពីត្បូងទៅជើង ក្នុងល្បឿនលឿន និងមានស្ថានភាពរេពេញផ្លូវទៀតផង។ លុះ​ពេល​មកដល់​ចំណុចកើតហេតុ ក៏បានជ្រុលទៅបុករះរថយន្ត២គ្រឿងផ្សេងទៀត ជាបន្តបន្ទាប់ ក្នុងនោះមានរថយន្តម៉ាកហ៊ីយ៉ាន់ដាយ ពណ៏ខៀវលាយស ពាក់ស្លាកលេខ ភ្នំពេញ 3C-6488 របស់ក្រុមហ៊ុនCAMEL បណ្ដាលឲ្យរងការខូចខាតផ្នែកខាងមុខ។ បន្ទាប់មកបានជ្រុលទៅបុករថយន្តមួយគ្រឿងទៀតម៉ាកហ៊ីយ៉ាន់ដាយ ប្រភេទ​ទេសចរណ៏១២កៅអី ពណ៌ប្រផេះ ពាក់ស្លាកលេខ ក្រុងព្រះសីហនុ 2A-1082 បណ្ដាលឲ្យរងការខូចខាតផ្នែកខាងមុខចំហៀងខាងស្តាំដូចគ្នា។ ​

ប្រភព​ដដែល​បានបន្​តទៀតថា ក្រោយពេលកើតហេតុ រថយន្តដឹកដីបង្កហេតុនេះ ក៏បានជ្រុលទៅមុខបុកចូលផ្ទះជាងជួសជុលម៉ូតូ និងផ្ទះបោកអ៊ុតមួយកន្លែងទៀត បណ្តាល​ឲ្យក្មេង​ស្រី២នាក់រងរបួសធ្ងន់ និងត្រូវបានបញ្ជូនទៅសង្គ្រោះបន្ទាន់នៅគ្លីនិកឯកជនជិតនោះផងដែរ។ បន្ទាប់​មកសមត្ថកិច្ច បានចុះទៅធ្វើការវាស់វែង និងនាំ យក​រថយន្តទាំង៣​គ្រឿងនោះ ទៅរក្សាទុកនៅអធិការដ្ឋាន​​នគរបាល​ខណ្ឌដង្កោ រង់ចាំការដោះស្រាយទៅតាមផ្លូវច្បាប់៕