រថយន្តទំនើបៗបានធ្វើដំណើរពេញដងផ្លូវទីរាជធានីភ្នំពេញ ដោយសារតែប្រទេសកម្ពុជា មានកំណើនសេដ្ឋកិច្ច គួរឱ្យកត់សម្គាល់ជារៀងរាល់ឆ្នាំប្រហែជា៧ភាគរយ ។ ប៉ុន្តែគម្លាតសេដ្ឋកិច្ចនៅតែមានបញ្ហាធំ ដោយធ្វើឱ្យអ្នកក្រជាច្រើន មិនអាចទទួលផលពីការរីកចម្រើននេះ ។
រថយន្តទំនើបៗបានធ្វើដំណើរពេញដងផ្លូវទីរាជធានីភ្នំពេញ ដោយសារតែប្រទេសកម្ពុជា មានកំណើនសេដ្ឋកិច្ច គួរឱ្យកត់សម្គាល់ជារៀងរាល់ឆ្នាំប្រហែជា៧ភាគរយ ។ ប៉ុន្តែគម្លាតសេដ្ឋកិច្ចនៅតែមានបញ្ហាធំ ដោយធ្វើឱ្យអ្នកក្រជាច្រើន មិនអាចទទួលផលពីការរីកចម្រើននេះ ។
ដូច្នេះ ភាពហ៊ឺហារដែលមាននៅក្នុងទីក្រុងភ្នំពេញ មិនបានតំណាងឱ្យប្រទេសកម្ពុជាទាំងមូលឡើយ ។ អ្នកខ្លះ ក៏ថាអ្វីដែលឃើញនៅភ្នំពេញ មិនមែនកម្ពុជាទាំងមូលឡើយ ។ នេះដោយសារតែរូបភាពខុសគ្នារវាងទីក្រុង និងជនបទ ។
ដើម្បីផ្តល់ផលប្រយោជន៍ដល់អ្នកក្រីក្រឱ្យបានច្រើននោះ គេត្រូវយកចិត្តទុកដាក់ជំរុញសកម្មភាពសេដ្ឋកិច្ច ទៅតាមបណ្តាខេត្តនានាដើម្បីឱ្យមានការបង្កើតការងារនៅនឹងកន្លែង ដែលអាចឱ្យប្រជាជននៅតាមបណ្តាខេត្តទាំងនោះ អាចទទួលបានប្រាក់ខែសមរម្យសម្រាប់ជីវិត ។ ទន្ទឹមនោះ វិស័យចាំបាច់ចំនួន២ គឺវិស័យសុខាភិបាល និងវិស័យអប់រំរដ្ឋ ត្រូវតែមានភាពប្រសើរជាងនេះ ។
ការលើកម្ពស់វិស័យសុខភាពរដ្ឋឱ្យកាន់តែល្អ និងមានប្រសិទ្ធភាពនឹងមានន័យថា ប្រជាជនគ្រប់ស្រទាប់វណ្ណ:នឹងអាចទទួលបានសេវាកម្មសុខភាព ស្មើគ្នាមិនថា អ្នកមាន ឬអ្នកក្រឡើយ ។ បច្ចុប្បន្ន ប្រជាជនជាច្រើន បានថ្ងូរអំពីការចំណាយខ្ពស់ ទៅលើការថែទាំសុខភាព ឬព្យាបាលជំងឺ ។ ដូច្នេះ ការលើកកម្ពស់គុណភាពសេវាកម្មសុខភាពតាមមន្ទីរពេទ្យរដ្ឋ នឹងជួយកាត់បន្ថយការចំណាយរបស់ប្រជាជនទៅលើបញ្ហាសុខភាព ។ ប្រទេសមួយដែលមានប្រជាជនសុខភាពមិនមាំទាំ នឹងធ្វើឱ្យផលិតភាពសេដ្ឋកិច្ចទាប ទៅតាមនោះដែរ ។
ទន្ទឹមនោះ ការអប់រំតាមសាលារដ្ឋ ត្រូវតែមានគុណភាពជាងនេះ ។ ការអប់រំតាមសាលារដ្ឋ មានគុណភាពខ្សោយ និងមានន័យថា អ្នកក្រីក្រ នឹងបន្តក្រីក្រតទៀត ដោយសារតែមិនទទួលបានចំណេះដឹងគ្រប់គ្រាន់ តាមសាលា ឬមហាវិទ្យាល័យរដ្ឋ ។ នៅពេល
ដែលមនុស្សទទួលបានការអប់រំខ្ពស់ គឺគេនឹងមានឱកាសកាន់តែច្រើន និងទទួលបានការងារល្អ ដែលមានប្រាក់ខែខ្ពស់ ។
ដូច្នេះ ការយកចិត្តទុកដាក់ដល់ការពង្រីកសកម្មភាពសេដ្ឋកិច្ចនៅតាមបណ្តាខេត្ត ការលើកកម្ពស់លើសេវាកម្មសុខភាព តាមមន្ទីរពេទ្យរដ្ឋ ព្រមទាំងការលើកកម្ពស់ការអប់រំតាមសាលារដ្ឋ នឹងជួយធ្វើឱ្យប្រជាជនក្រីក្រ កាន់តែទទួលបានផលប្រយោជន៍ច្រើនជាងមុនពីកំណើនសេដ្ឋកិច្ចដែលកម្ពុជាទទួលបាន ៕
ចែករំលែកព័តមាននេះ