រាជធានីភ្នំពេញ ៖ ព្រះតេជគុណសុវណ្ណជោតិបណ្ឌិត ខឹម សម្បត្តិ ប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា និងជាចៅអធិការវត្តញាណរង្សី កាលពីព្រឹកថ្ងៃទី២១ មីនា ២០១៦ បានផ្តល់អំណោយជាគ្រឿងឧបភោគ
រាជធានីភ្នំពេញ ៖ ព្រះតេជគុណសុវណ្ណជោតិបណ្ឌិត ខឹម សម្បត្តិ ប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា និងជាចៅអធិការវត្តញាណរង្សី កាលពីព្រឹកថ្ងៃទី២១ មីនា ២០១៦ បានផ្តល់អំណោយជាគ្រឿងឧបភោគ បរិភោគ និងបច្ច័យមួយចំនួនឧបត្ថម្ភដល់អនុសាខាកាកបាទក្រហមកម្ពុជា ខណ្ឌឫស្សីកែវ ដើម្បីយកទៅចែកជូនដល់ប្រជាពលរដ្ឋក្រីក្រក្នុងមូលដ្ឋាន។
ពិធីនេះ បានរៀបចំឡើងនៅវត្តញាណរង្សី ក្នុងសង្កាត់ទួលសង្កែ ដោយមានការអញ្ជើញចូលរួមទទួលដោយលោក ជា ពិសី ប្រធានអនុសាខាកាកបាទក្រហមខណ្ឌឫស្សី កែវ និងជាអភិបាលខណ្ឌ។
អំណោយដែលប្រគល់ជូននោះរួមមាន អង្ក១តោន, មី១០កេស, ទឹកត្រី ទឹកស៊ីអ៊ីវ២០យួរ, ទឹកដោះគោ២០កំប៉ុង, ស្ករសចំនួន៣០គីឡូក្រាម, ទឹកក្រូចចំនួន៥កេស, ត្រីខ១០យួរ, តែ២០០កញ្ចប់, ទឹកសុទ្ធ១០កេស, បាឡុងចំនួន២សម្រាប់ និងបច្ច័យចំនួន៤លានរៀល។ អំណោយទាំងនោះសរុបជាបច្ច័យ៧.៤៥០.០០០រៀល ។
ក្នុងនាមអាជ្ញាធរខណ្ឌ និងកាកបាទក្រហមលោក ជា ពិសី ក៏បានថ្លែងអំណរគុណដល់សប្បុរសជនទាំងអស់ ជាពិសេសព្រះតេជគុណបណ្ឌិត ខឹម សម្បត្តិ ព្រះប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា ដែលតែងតែចូលរួមជួយដល់ជនរងគ្រោះ និងគ្រោះថ្នាក់ផ្សេងៗ ជាពិសេសជួយឧបត្ថម្ភដល់អនុសាខាកាកបាទ ក្រហមកម្ពុជា ខណ្ឌឫស្សីកែវ ជាបន្តបន្ទាប់ ដើម្បីយកទៅចែកជូនដល់ជនងាយរងគ្រោះបន្តទៀត ។ នេះជាទឹកព្រះទ័យដ៏ថ្លាថ្លៃរបស់ព្រះអង្គក្នុងការចូលរួមបម្រើមនុស្ស ធម៌។
លោក ជា ពិសី ក៏បានសន្យាថា នឹងនាំអំណោយនេះយកទៅចែកជូនដល់ដៃប្រជាពលរដ្ឋក្រីក្រក្នុងមូលដ្ឋានព្រមកៀរគររកអំណោយ ហើយចុះទៅចែកជូនដល់ប្រជាពលរដ្ឋក្រីក្រក្នុង១សប្តាហ៍ម្តង។
ព្រះតេជគុណសុវណ្ណជោតិបណ្ឌិត ខឹម សម្បត្តិ មានសង្ឃដីកាថា ព្រះពុទ្ធសាសនា គឺជាសាសនារបស់រដ្ឋ ហើយព្រះសង្ឃតែងតែផ្សាភ្ជាប់ជាមួយរដ្ឋាភិបាលជានិច្ច និងកៀរគររកជំនួយពីសប្បុរសជននានាយកទៅជួយឧបត្ថម្ភដល់កាកបាទក្រហមកម្ពុជាសាខារាជធានីភ្នំពេញ, អនុសាខាកាកបាទក្រហមកម្ពុជាខណ្ឌ ដើម្បីពាំនាំអំណោយទៅចែកជូនដល់ជនងាយរងគ្រោះបន្តទៀត។
ព្រះតេជគុណសុវណ្ណជោតិ បណ្ឌិត ខឹម សម្បត្តិ មានសង្ឃដីកាទៀតថា នោះជាការដឹងគុណដែលសម្តេចតេជោ ហ៊ុន សែន បានរំដោះយើងទាំងអស់គ្នាឱ្យរស់រានមានជីវិត និងមើលឃើញពីការខិតខំប្រឹងប្រែងរបស់សម្តេច និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានខិតខំអស់កម្លាំងកាយចិត្តក្នុងការជួយប្រជាពលរដ្ឋ ទើបព្រះអង្គបង្កើតសហគមន៍នេះឡើងដើម្បីជាការចូលរួមផ្នែកមនុស្សធម៌ស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា៕
ចែករំលែកព័តមាននេះ