ផ្លូវការ! វៀតណាម នឹងរៀបចំស៊ីហ្គេមនៅខែឧសភា ២០២២
- ភ្នំពេញ
រាជធានីភ្នំពេញ ៖ ទីបំផុតក្ដីបារម្ភរបស់កម្ពុជា ដែលថាវៀតណាមនឹងអាចលុបចោលស៊ីហ្គេម ហើយកីឡាករកម្ពុជាដែលប្រឹងត្រៀម
រាជធានីភ្នំពេញ ៖ ទីបំផុតក្ដីបារម្ភរបស់កម្ពុជា ដែលថាវៀតណាមនឹងអាចលុបចោលស៊ីហ្គេម ហើយកីឡាករកម្ពុជាដែលប្រឹងត្រៀមខ្លួននឹងខកខ្លួននោះ ពេលនេះអ្វីៗគឺបានប្រសើរឡើងហើយ ដោយសារតែគណៈកម្មាធិការជាតិអូឡាំពិកវៀតណាម បានធ្វើការអះ អាងថា ខ្លួនសម្រេចរៀបចំការប្រកួតកីឡាស៊ីហ្គេម លើកទី៣១ នាពាក់កណ្ដាលខែឧសភា ឆ្នាំ២០២២។
ការអះអាងនេះធ្វើឡើងចំពោះមុខសមាជិកក្រុមប្រឹក្សាកីឡាអាស៊ី អាគ្នេយ៍ ក្នុងកិច្ចប្រជុំកាលពីថ្ងៃទី១៨ ខែតុលា នេះ ខណៈបណ្ដាប្រទេសទាំងអស់ ថែមទាំងបានគាំទ្រឲ្យកម្ពុជា ធ្វើសហប្រធានក្រុមប្រឹក្សាសហព័ន្ធកីឡា អាស៊ីអាគ្នេយ៍ ចាប់ពីខែធ្នូ ឆ្នាំ២០២១ តទៅ ដែលនេះគឺជាមុខមាត់ធំមួយរបស់កម្ពុជា។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា «គណៈកម្មាធិការជាតិអូឡាំពិកវៀតណាម បានអះអាងថា ស៊ីហ្គេម លើកទី៣១ នឹងត្រូវធ្វើនៅពាក់កណ្ដាល ខែឧសភា ឆ្នាំ២០២២។ ប៉ុន្ដែមិនទាន់ប្រាកដថ្ងៃនោះទេ គ្រាន់តែប្ដេជ្ញា នឹងធ្វើឲ្យបាននៅពាក់កណ្ដាលខែឧសភា។ ចំពោះពេលវេលាច្បាស់លាស់ វៀតណាមនឹងផ្ដល់លិខិតផ្លូវការដល់បណ្ដាប្រទេសសមាជិកក្នុងពេលឆាប់ៗនេះ»។
អគ្គលេខាធិការគណៈកម្មាធិការជាតិរៀបចំការប្រកួតកីឡា អាស៊ី អាគ្នេយ៍ លើកទី៣២ ឆ្នាំ២០២៣ (CAMSOC) ដដែលបន្ដថា «ដោយសារកម្ពុជា នឹងត្រូវធ្វើម្ចាស់ផ្ទះស៊ីហ្គេមដែរ គេនឹងឲ្យកម្ពុជា ធ្វើជាសហប្រធានក្រុមប្រឹក្សាសហព័ន្ធកីឡាអាស៊ីអាគ្នេយ៍ នៅក្នុងខែធ្នូ ឆ្នាំ២០២១ ដើម្បីឲ្យកម្ពុជាបានបន្ដការងាររបស់ខ្លួន ដោយផ្លូវការពេញសិទ្ធ និងពេញលក្ខខ័ណ្ឌ ក្នុងដំណើរឆ្ពោះទៅធ្វើម្ចាស់ផ្ទះ ជាប្រវត្តិសាស្ដ្ររបស់ខ្លួននាឆ្នាំ២០២៣»។
លោកវ៉ាត់ ចំរើន បន្ថែមថា ទាំងការអះអាងរៀបចំស៊ីហ្គេម នាពាក់កណ្ដាលខែឧសភា ឆ្នាំ២០២២ របស់ភាគីវៀតណាម ក៏ដូចជាការ ឲ្យកម្ពុជា ធ្វើសហប្រធានក្រុមប្រឹក្សាសហព័ន្ធកីឡាអាស៊ី អាគ្នេយ៍ សុទ្ធតែទទួលបានការគាំទ្រពីបណ្ដាប្រទេសអាស៊ាន គ្រាន់តែការ ធ្វើសហប្រធាននេះ ត្រូវរង់ចាំការសម្រេចផ្លូវការរបស់ក្រុមប្រឹក្សា សហព័ន្ធកីឡាអាស៊ី អាគ្នេយ៍ នាខែធ្នូខាងមុខ ដែលគេនឹងអនុម័តផ្ដល់សិទ្ធិដល់កម្ពុជា៕
ចែករំលែកព័តមាននេះ