រាជធានីភ្នំពេញ ៖ ក្រោយឆ្នាំ១៩៩៣ បន្ទាប់ពីកម្ពុជាមានការបោះឆ្នោតមក សេដ្ឋកិច្ចកម្ពុជាបានក្លាយទៅជាសេដ្ឋកិច្ចដុល្លារូបនីយកម្មដោយឯកឯង តាមរយៈអាជ្ញាធរបណ្តោះអាសន្នរបស់អង្គការសហប្រជាជាតិ
រាជធានីភ្នំពេញ ៖ ក្រោយឆ្នាំ១៩៩៣ បន្ទាប់ពីកម្ពុជាមានការបោះឆ្នោតមក សេដ្ឋកិច្ចកម្ពុជាបានក្លាយទៅជាសេដ្ឋកិច្ចដុល្លារូបនីយកម្មដោយឯកឯង តាមរយៈអាជ្ញាធរបណ្តោះអាសន្នរបស់អង្គការសហប្រជាជាតិ ប្រចាំនៅកម្ពុជា ឬហៅកាត់ថាUNTAC។ បច្ចុប្បន្ន ការប្រើប្រាស់រូបិយប័ណ្ណដុល្លារលើទីផ្សារនៃប្រទេសកម្ពុជាមានប្រមាណជា៨៣% ចំណែកការប្រើប្រាស់រូបិយប័ណ្ណរៀលមានមិនដល់២០%នោះទេ ហើយការប្រើប្រាស់ប្រាក់រៀលទៀតសោត គឺសម្រាប់តែការទូទាត់តម្លៃទំនិញតូចៗប៉ុណ្ណោះ ដែលភាគច្រើន គេឃើញមានការប្រើប្រាស់ប្រាក់រៀលនៅតាមជនបទ ដោយឡែកនៅតាមទីក្រុង និងទីប្រជុំជនធំៗគឺគេប្រើប្រាស់ដុល្លារច្រើនជាង ។ ដោយសារតែហេតុនេះ ធនាគារជាតិនៃកម្ពុជា សហការជាមួយសមាគមសហគ្រិនវ័យក្មេងកម្ពុជា រៀបចំវេទិកាអបអរសាទរទិវា ដាក់ប្រាក់រៀលឲ្យចរាចរឡើងវិញ លើកទី៣៦ ថ្ងៃទី២០ មីនា ១៩៨០ – ២០ មីនា ២០១៦ ក្នុងគោលបំណងរំឭកខួបនៃការដាក់ឱ្យចរាចរឡើងវិញ ព្រមទាំងបង្ហាញពីការគាំទ្រ និងលើកទឹកចិត្តឱ្យវិស័យឯកជន បង្កើនការប្រើប្រាស់ប្រាក់រៀលក្នុងប្រតិបត្តិការរបស់ខ្លួនដោយស្មារតីស្ម័គ្រចិត្ត។
ជាមួយគ្នានេះធនាគារ ជាតិនៃកម្ពុជា បានបង្ហាញនូវសារដែលមាន សំខាន់ៗមួយចំនួនដូចខាងក្រោម ៖
១-ការប្រើប្រាស់ប្រាក់រៀលរួមចំណែកជំរុញពាណិជ្ជកម្ម ៖
បច្ចុប្បន្ន សេដ្ឋកិច្ចកម្ពុជាពឹងផ្អែកមួយភាគធំលើការនាំចេញ និងទេសចរណ៍ ដើម្បីជំរុញកំណើនសេដ្ឋកិច្ច ។ ក្នុងឆ្នាំ២០១៤ ការនាំចេញ និងវិស័យទេសចរណ៍ មានប្រមាណ៦១% នៃផលិតផលក្នុងស្រុកសរុប(ផ.ស.ស) ។ ប្រសិនបើប្រទេសកម្ពុជាប្រើប្រាស់តែប្រាក់រៀល ធនាគារជាតិនៃកម្ពុជា អាចជំរុញការនាំចេញដោយធ្វើឲ្យមានភាពប្រកួតប្រជែងថ្លៃកើនឡើងតាមរយៈការបន្ថយតម្លៃរូបិយវត្ថុ ។ ដូច្នេះ ការបន្ថយតម្លៃរូបិយវត្ថុ នឹងធ្វើឲ្យការនាំចេញកើនឡើង ។ អំណាចក្នុងការបន្ថយតម្លៃរូបិយវត្ថុជាសមត្ថភាពរបស់ធនាគារជាតិនៃកម្ពុជា ដោយមានការប្រឹក្សាជាមួយរាជរដ្ឋាភិបាល និងភាគីតាក់តែងគោលនយោបាយពាក់ព័ន្ធនានា ។
ទន្ទឹនឹងនេះ ការធ្លាក់ចុះនៃតម្លៃរូបិយវត្ថុ អាចទាក់ទាញភ្ញៀវទេសចរច្រើនជាងមុនមកកាន់កម្ពុជា និងធ្វើឲ្យពួកគេចំណាយកាន់តែច្រើន ដោយសារទំនិញកម្ពុជាមានតម្លៃទាបជាងមុនបើគិតជារូបិយប័ណ្ណ ។ ការបាត់បង់សមត្ថកិច្ចក្នុងការគ្រប់គ្រងតម្លៃប្រាក់រៀល បានបង្កជាការរាំងស្ទះដល់ការអភិវឌ្ឍសេដ្ឋកិច្ចជាតិ ។
២-ការប្រើប្រាស់ប្រាក់រៀលជំរុញការវិនិយោគ និងបង្កើតការងារ ៖
ធនាគារកណ្តាលជាច្រើន ដូចជាធនាគារកណ្តាលអាមេរិក បានកែតម្រូវការប្រាក់គោលរបស់ខ្លួន ដើម្បីជំរុញការវិនិយោគក្នុងស្រុក និងបង្កើតការងារបន្ថែម ។ កម្រិតអត្រាការប្រាក់គោលដែលកំណត់ដោយធនាគារកណ្តាល មានឥទ្ធិពលលើថ្លៃដើមនៃមូលនិធិវិនិយោគរបស់គ្រឹះស្ថានធនាគារ ហើយជាលទ្ធផល ក៏នាំឲ្យមានការប្រែប្រួលដល់អត្រាការប្រាក់ ដែលគ្រឹះស្ថានធនាគារកំណត់លើកម្ចីទៅកាន់វិនិយោគិន និងអង្គភាពគ្រួសារផងដែរ ។ នៅពេលដែលធនាគារកណ្តាលបន្ទាបអត្រាការប្រាក់គោល វាជាសញ្ញាដល់គ្រឹះស្ថានធនាគារក្នុងការកាត់បន្ថយអត្រាការប្រាក់កម្ចី ដែលនឹងធ្វើឲ្យកម្ចីមានតម្រូវការខ្ពស់ជាងមុនសម្រាប់វិនិយោគិននិងអង្គភាពគ្រួសារ ។ ធនាគារកណ្តាលក៏អាចដំឡើងអត្រាការប្រាក់គោលផងដែរ ប្រសិនបើមានសញ្ញាថា បរិមាណកម្ចីមានកំណើនខ្ពស់ហួសហេតុនៅក្នុងសេដ្ឋកិច្ច ជាពិសេសនៅក្នុងវិស័យណាមួយដូចជា វិស័យសំណង់និងអចលនទ្រព្យជាដើម ដើម្បីចៀសវាងការឡើងថ្លៃជ្រុល។
ទ្រឹស្តីនេះអាចអនុវត្តបានតែក្នុងសេដ្ឋកិច្ចដែលប្រើប្រាស់រូបិយវត្ថុក្នុងស្រុកទាំងស្រុង ឬមួយភាគធំប៉ុណ្ណោះ ។ នៅក្នុងករណីកម្ពុជា ប្រាក់បញ្ញើនិងឥណទានប្រមាណ៩០% គឺជាប្រាក់ដុល្លារអាមេរិក ។ ផ្ទុយទៅវិញ ធនាគារជាតិនៃកម្ពុជា អាចផ្តល់តែកម្ចីជាប្រាក់រៀលប៉ុណ្ណោះដល់គ្រឹះស្ថានធនាគារ។ នេះមានន័យថា អត្រាការប្រាក់គោលដែលធនាគារជាតិនៃកម្ពុជាកំណត់ នឹងមិនមានឥទ្ធិពលលើថ្លៃដើមនៃមូលនិធិវិនិយោគរបស់គ្រឹស្ថានធនាគារនោះទេ ។ ចំណុចនេះជាគុណវិបត្តិដ៏ធំមួយសម្រាប់ប្រជាជនកម្ពុជា និងវិនិយោគិនដែលកំពុងប្រឈមនឹងចំណាយថ្លៃដើម វិនិយោគខ្ពស់ ដោយសារធនាគារកណ្តាល មិនអាចមានឥទ្ធិពលលើអត្រាការប្រាក់កម្ចីរបស់គ្រឹះស្ថានធនាគារនោះទេ ។
៣-ការប្រើប្រាស់ប្រាក់រៀលចូលរួមលើក កម្ពស់ហេដ្ឋារចនាសម្ព័ន្ធ និងសុខុមាលភាពសង្គម ៖
ការប្រើប្រាស់រូបិយវត្ថុជាតិកាន់តែច្រើន អាចអនុញ្ញាតឲ្យរាជរដ្ឋាភិបាលធ្វើការគ្រប់គ្រងថវិកាបានកាន់តែប្រសើរ ដើម្បីបំពេញតម្រូវការក្នុងការវិនិយោគលើហេដ្ឋារចនាសម្ព័ន្ធនិងសុខុមាលភាពសង្គម ។ បច្ចុប្បន្ន រាជរដ្ឋាភិបាលធ្វើការប្រមូលចំណូលជាប្រាក់រៀល ប៉ុន្តែចំណាយលើហេដ្ឋារចនាសម្ព័ន្ធ និងគម្រោងអភិវឌ្ឍន៍ផ្សេងៗទៀតភាគច្រើនជាប្រាក់ដុល្លារអាមេរិក ។ នៅក្នុងរយៈកាលវែង ភាពមិនស៊ីគ្នានៃចំណូលជារូបិយវត្ថុ និងចំណាយជារូបិយប័ណ្ណនេះ នឹងជាឧបសគ្គសម្រាប់រាជរដ្ឋាភិបាល ក្នុងការគ្រប់គ្រងថវិកាឲ្យមានប្រសិទ្ធភាព ។
នៅកម្ពុជា ការអនុវត្តគោលនយោបាយសារពើពន្ធត្រូវបានកម្រិត ដោយសារបរិមាណប្រាក់ដុល្លារអាមេរិកដ៏ច្រើននៅក្នុងសេដ្ឋកិច្ច។ មូលហេតុនេះ បានដាក់កំហិតលើការខ្ចីរបស់រាជរដ្ឋាភិបាលពីសាធារណជន ក្នុងការអភិវឌ្ឍគម្រោងអភិវឌ្ឍន៍អាទិភាពនានា ដូចជាការសាងសង់ផ្លូវថ្នល់ ស្ពាន សាសារៀន មន្ទីរពេទ្យ និងកម្មវិធីកាត់បន្ថយភាពក្រីក្រផ្សេងៗទៀត។ ប្រសិនបើរាជរដ្ឋាភិបាលមានបំណងបង្កើនចំណាយសាធារណៈ រាជរដ្ឋាភិបាលមិនអាចខ្ចីប្រាក់ជារូបិយប័ណ្ណពីទីផ្សារក្នុងស្រុកនេះទេ ។ ដោយសារតម្រូវការប្រាក់ដុល្លារអាមេរិក នឹងកើនឡើង ដែលនឹងរឹតតែបង្កើនកម្រិតដុល្លាររូបនីយកម្មនៅកម្ពុជាថែមទៀត ។
ការលើកកម្ពស់ការប្រើប្រាស់ប្រាក់រៀល នឹងរួមចំណែកយ៉ាងសំខាន់ក្នុងការធ្វើឲ្យថវិការដ្ឋ មានភាពប្រសើរឡើង និងកាត់បន្ថយការដាក់ កំហិតលើគោលនយោបាយសារពើពន្ធ ។ ប្រសិនបើនៅលើទីផ្សារមានការប្រើប្រាស់ប្រាក់រៀលកាន់តែច្រើន រាជរដ្ឋាភិបាលអាចពិចារណាចេញផ្សាយមូលបត្រចារឹកប្រាក់រៀល ដើម្បីគ្រប់គ្រងថវិកា ក៏ដូចជាផ្តល់ហិរញ្ញប្បទានលើគម្រោងអភិវឌ្ឍន៍នានា ។ ដូចនេះ លទ្ធភាពក្នុងការគ្រប់គ្រងហិរញ្ញប្បទានក្នុងស្រុក នឹងអាចជួយឲ្យកម្ពុជាកាត់បន្ថយការពឹងផ្អែកលើបំណុលបរទេស ។
៤-ការប្រើប្រាស់ប្រាក់រៀលជំរុញបរិយាប័ន្នហិរញ្ញវត្ថុ ៖
យោងតាមការសិក្សារបស់ធនាគារពិភពលោក ការអភិវឌ្ឍសេដ្ឋកិច្ចមានទំនាក់ទំនងយ៉ាងជិតស្និទ្ធជាមួយនឹងការអភិវឌ្ឍវិស័យហិរញ្ញវត្ថុ។ ការអភិវឌ្ឍវិស័យហិរញ្ញវត្ថុមិនត្រឹមតែមានសារសំខាន់ចំពោះឧស្សាហកម្មធនាគារប៉ុណ្ណោះទេ តែថែមទាំងជំរុញបរិយាប័ន្នហិរញ្ញវត្ថុ ដែលអនុញ្ញាតឲ្យប្រជាជនកម្ពុជាអាចទទួលបានសេវាហិរញ្ញវត្ថុផ្លូវការនិងមានតម្លៃសមរម្យ ។ តាមរយៈកិច្ចខិតខំប្រឹងប្រែងកន្លងមក ប្រជាជនពេញវ័យប្រមាណ៤៦% អាចទទួលបានសេវាហរិញ្ញវត្ថុផ្លូវការ និងប្រមាណ២៣%មានគណនីនៅធនាគារ ។
ប្រជាជនកម្ពុជាប្រមាណ៧០% កំពុងរស់នៅតាមជនបទ ហើយភាគច្រើនប្រកបរបរកសិកម្ម។ ប្រាក់រៀលបានដើរតួនាទីយ៉ាងសំខាន់ នៅក្នុងជីរភាពរស់នៅប្រចាំថ្ងៃរបស់ពួកគេ ដូចជា សម្រាប់ការជួញដូរ និងការចំណាយនានា។ បច្ចុប្បន្ន គ្រឹះស្ថានហិរញ្ញវត្ថុដែលធ្វើប្រតិបត្តិការនៅតាមជនបទ ទទួលបានមូលនិធីពីវិនិយោគិនបរទេស និងពីរអ្នកដាក់ប្រាក់បញ្ញើជាប្រាក់ដុល្លារអាមរិក ។ ដើម្បីបំពេញតម្រូវការប្រាក់រៀល គ្រឹះស្ថានហិរញ្ញវត្ថុទាំងនេះតែងតែប្តូរប្រាក់ដុល្លារអាមេរិកទៅជាប្រាក់រៀល ដែលអាចធ្វើឲ្យពួកគេប្រឈមនឹងហានិភ័យប្តូរប្រាក់។ ដើម្បីបង្ការហានិភ័យនេះ គ្រឹះស្ថានហិរញ្ញវត្ថុទាំងនេះបានកំណត់អត្រាការប្រាក់កម្ចីជាប្រាក់រៀលខ្ពស់ ដែលជាកត្តាធ្វើឲ្យកម្ចីជាប្រាក់រៀលមានអត្រាការប្រាក់ខ្ពស់ជាងកម្ចីជាប្រាក់ដុល្លារអាមេរិក ។
ជាទូទៅចំពោះប្រជាជននៅតាមទីក្រុង ប្រតិបត្តិការធំៗភាគច្រើនធ្វើឡើងជាប្រាក់ដុល្លារអាមេរិក ដែលអនុញ្ញាតឲ្យពួកគេចៀសផុតពីហានិភ័យប្រាក់បានមួយកម្រិតធំ ។ ផ្ទុយទៅវិញ ប្រជាជនដែលរស់នៅតាមជនបទភាគច្រើន និងប្រជាជនដែលមានចំណូលជារូបិយវត្ថុ ត្រូវប្រឈមនឹងអត្រាការប្រាក់កម្ចីខ្ពស់ ហើយប្រជាជនមួយចំនួនយល់ឃើញថា នេះជាឧបសគ្គចម្បងសម្រាប់ពួកគេក្នុងការប្រើប្រាស់សេវាហិរញ្ញវត្ថុ ដូចជា ការខ្ចីប្រាក់ពីធនាគារ ហើយមួយចំនួននៅតែបន្តខ្ចីពីអ្នកចងការប្រាក់ក្រៅផ្លូវការ ដែលទាញយកផលប្រយោជន៍ច្រើនហួសហេតុ។ ការជំរុញការប្រើប្រាស់ប្រាក់រៀលតាមរយៈការសន្សំ និងសកម្មភាពសេដ្ឋកិច្ចផ្សេងៗ អាចជួយកាត់បន្ថយចំណាយនៃកម្ចីជាប្រាក់រៀល និងជំរុញបរិយាប័ន្នហិរញ្ញវត្ថុកម្ពុជា ។ ការណ៍នេះនឹងជំរុញកំណើនសេដ្ឋកិច្ចនៅតាមជនបទ ជាពិសេសវិស័យកសិកម្ម ដែលរួមចំណែកប្រមាណ ៣០%នៃផ.ស.ស ។
៥-ការប្រើប្រាស់ប្រាក់រៀលចូលរួមចំណែកគរពូនទុនបម្រុងអន្តរជាតិ ៖
សម្រាប់ប្រទេសដែលរូបិយវត្ថុជាតិ ត្រូវបានប្រើប្រាស់ជាទូទៅ រូបិយប័ណ្ណដែលហូរចូលមកក្នុងប្រទេសត្រូវប្តូរទៅជារូបិយវត្ថុជាតិ មុននឹងយកមកប្រើប្រាស់នៅក្នុងសកម្មភាពសេដ្ឋកិច្ចក្នុងស្រុក ។ ធនគារកណ្តាលមានតួនាទីស្រូបយករូបិយប័ណ្ណទាំងនេះតាមរយៈការប្តូរជារូបិយវត្ថុជាតិ ។ ប្រសិនបើមានតែប្រាក់រៀលដែលត្រូវបានប្រើប្រាស់ក្នុងសកម្មភាពសេដ្ឋកិច្ច កម្ពុជាអាចបង្កើនទុនបម្រុងអន្តរជាតិ បានយ៉ាងសន្ធឹកសន្ធាប់ តាមរយៈការគរពូនអតិរេកនៃលំហូររូបិយប័ណ្ណបរទេសមកក្នុងសេដ្ឋកិច្ចកម្ពុជាជារៀងរាល់ឆ្នាំ ។
ការគរពូនទុនបម្រុងអន្តរជាតិបង្កើនទ្រព្យសម្បត្តិជាតិ លើកកម្ពស់ជំនឿទុកចិត្តមកលើរូបិយវត្ថុ និងពង្រឹងមូលដ្ឋានរឹងមាំសម្រាប់ស្ថិរភាពម៉ាក្រូសេដ្ឋកិច្ច ។ ទុនបម្រុងអន្តរជាតិដែលមានបរិមាណខ្ពស់សមស្រប ក៏នឹងអនុញ្ញាតឲ្យធនាគារកណ្តាលមានលទ្ធភាពខ្ពស់ក្នុងការធ្វើអន្តរាគមន៍លើទីផ្សារប្តូរប្រាក់ដើម្បីកាត់បន្ថយការប្រែប្រួលខ្លាំងនៃតម្លៃរូបិយវត្ថុអន្តរជាតិ ក្នុងគោលបំណងសម្រេចបាននូវសមិទ្ធផលដែលគាំទ្រកំណើនសេដ្ឋកិច្ច ។ លើសពីនេះ កំណើនទុនបម្រុងអន្តរជាតិនឹងបង្កើនការវិនិយោគ ស្របតាមគោលការណ៍លំដាប់អាទិភាព ៖
-សុវត្ថិភាព ៖ វិនិយោគលើឧបករណ៍ហិរញ្ញវត្ថុដែលមានសុវត្ថិភាពក្នុងគោលបំណងចម្បងដើម្បីរក្សាដើមទុន ។
-កម្រិតសន្ទនីយភាពខ្ពស់៖ រក្សាជាឧបរកណ៍ដែលមានសន្ទនីយភាពខ្ពស់សម្រាប់យកទៅប្រើប្រាស់បានភ្លាមៗទៅតាមតម្រូវការរបស់ប្រព័ន្ធធនាគារ ។
-បង្កើនចំណូល ៖ វិនិយោគទៅលើឧបករណ៍ហិរញ្ញវត្ថុនានា ដើម្បីទទួលបានប្រាក់ចំណេញ សំដៅគរពូនទុនបម្រុងអន្តរជាតិបន្ថែម។ ប្រាក់ចំណេញនេះ នឹងត្រូវបែងចែករវាងធនាគារកណ្តាល (សម្រាប់ចំណាយប្រតិបត្តិការ) និងរាជរដ្ឋាភិបាល ដែលអាចត្រូវបានទៅប្រើប្រាស់ក្នុងការវិនិយោគ ដើម្បីការអភិវឌ្ឍនៅក្នុងប្រទេសវិញ ។ ដូច្នេះ ថ្វីដ្បិតតែមានបរិមាណសមស្របចំពោះទំហំសេដ្ឋកិច្ច ទុនបម្រុងអន្តរជាតិនៅកម្ពុជា អាចនឹងត្រូវបានគរពូនបន្ថែមយ៉ាងច្រើនថែមទៀត នៅពេលដែលប្រាក់រៀលត្រូវបានប្រើប្រាស់កាន់តែទូលំទូលាយនៅក្នុងប្រទេស ។
៦-ការប្រើប្រាស់ប្រាក់រៀលចូលរួមចំណែកបង្ការការក្លែងក្រដាសប្រាក់ ៖
ដោយសេដ្ឋកិច្ចកម្ពុជា ប្រើប្រាស់ក្រដាសប្រាក់ជាមូលដ្ឋាន ជាពិសេសការប្រើប្រាស់ក្រដាសប្រាក់ដុល្លារអាមេរិកយ៉ាងទូលំទូលាយ កម្ពុជាអាចជាគោលដៅនៃការហូរចូលក្រដាសប្រាក់ដុល្លារអាមេរិកក្លែងក្លាយ ដោយសារតែសាធារណជន មិនសូវស្គាល់ច្បាស់ពីរូបិយប័ណ្ណបរទេស និងមិនអាចបែងចែកក្រដាសប្រាក់ពិតនិងក្លែងក្លាយ ។ ក្នុងបរិការណ៍នេះ កាលើកទឹកចិត្តឲ្យមានការប្រើប្រាស់រៀលកាន់តែទូលំទូលាយ មានសារសំខាន់ណាស់ក្នុងការទប់ស្កាត់ការចរាចររូបិយប័ណ្ណក្លែងក្លាយនៅកម្ពុជា ហើយក៏រួមចំណែកកាត់បន្ថយកម្រិតដុល្លាររូបនីយកម្មបន្តិចម្តងៗផងដែរ ។
ការប្រើប្រាស់រូបិយវត្ថុជាតិដែលប្រជាជនស្គាល់ច្បាស់ នឹងជួយកាត់បន្ថយនូវការក្លែងក្រដាសប្រាក់និងជួយបង្ការការក្លែងប្រដាសប្រាក់រូបិយប័ណ្ណបរទេស ដោយសារតែរូបិយប័ណ្ណទាំងនេះ នឹងហូរចូលទៅក្នុងសេដ្ឋកិច្ចតាមរយៈប្រព័ន្ធធនាគារ ។
៧-ចំណូលពីការបោះពុម្ពក្រដាសប្រាក់ ៖
ចំណូលពីការបោះពុម្ពក្រដាសប្រាក់ គឺជាភាពខុសគ្នារវាងតម្លៃចារឹករបស់ក្រដាសប្រាក់និង ចំណាយផលិតកម្ម ។ ឧទាហរណ៍ ក្រដាសប្រាក់ប្រភេទ១០.០០០រៀល ត្រូវការថ្លៃចំណាយបោះពុម្ពចំនួន៣០០រៀល ។ នៅពេលដែលក្រដាសប្រាក់ប្រភេទ១០.០០០រៀលនេះ ត្រូវបានបោះផ្សាយ និងដាក់ឱ្យចរាចរដល់សាធារណជន ក្រដាសប្រាក់នេះអាចទិញទំនិញក្នុងតម្លៃ ១០.០០០រៀល ។ ដូច្នេះ ចំណូលពីការបោះពុម្ពស្មើនឹង៩.៧០០រៀល ។ កំណើនតម្រូវការប្រាក់រៀលនឹងធ្វើឱ្យធនាគារជាតិនៃកម្ពុជាអាច បោះផ្សាយក្រដាសប្រាក់រៀលកាន់តែច្រើន ។ ជាលទ្ធផល នៅពេលដែលក្រដាសប្រាក់រៀលត្រូវបានបោះពុម្ពកាន់តែច្រើន កម្ពុជានឹងអាចទទួលបានចំណូលពីការបោះពុម្ពកាន់តែច្រើនដែរ ។
សេដ្ឋកិច្ចដែលមានដុល្លារូបនីយកម្មខ្ពស់បានដាក់កំហិតលើលទ្ធភាពរបស់ប្រទេសក្នុងការ ទទួលបានចំណូលពីការបោះពុម្ពនេះ ដោយសារសាធារណជនកាន់រូបិយប័ណ្ណជាចម្បង ជំនួសឱ្យរូបិយវត្ថុជាតិ ។ ដូច្នេះ ការកាន់កាប់រូបិយប័ណ្ណមានន័យថាស្មើនឹងការខាតបង់ចំណូល ពីការបោះពុម្ព ។ លើសពីនេះ ការកាន់កាប់នេះក៏ធ្វើឱ្យកម្ពុជាបាត់បង់ឱកាសទទួលបាននូវចំណូលការប្រាក់ពីការដាក់ប្រាក់បញ្ញើ និងការវិនិយោគរូបិយប័ណ្ណ (ដែលត្រូវស្រូបយកដោយធនាគារកណ្តាលក្នុងករណីគ្មានដុល្លារូបនីយកម្ម) នៅក្នុងទីផ្សារហិរញ្ញវត្ថុអន្តរជាតិ ។
តាមរយៈការបោះពុម្ពក្រដាសប្រាក់រៀលកាន់តែច្រើន រាជរដ្ឋាភិបាលនឹងទទួលបានមូលនិធិក្នុងនាមជាអ្នកខ្ចីពីសេដ្ឋកិច្ច ដោយមិនមានការប្រាក់ដើម្បីយកទៅធ្វើការវិនិយោគក្នុងសេដ្ឋកិច្ចឬចំណាយសំដៅអភិវឌ្ឍវិស័យសេដ្ឋកិច្ចអាទិភាពនានា ៕
ចែករំលែកព័តមាននេះ