ខេត្តព្រះសីហនុ ៖ ដោយមានការដឹកនាំបញ្ជាពីសំណាក់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កម្លាំងនគរបាលជំនាញរបស់អធិការដ្ឋាននគរបាលក្រុងព្រះសីហនុ បានសហការជាមួយ សមត្ថកិច្ចនាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ និងកម្លាំងរបស់ស្នងការដ្ឋាននគរបាលខេត្តសៀមរាបបានឃាត់ខ្លួនជនសង្ស័យម្នាក់ មុខរបររត់ម៉ូតូកង់៣ ពីបទប្រើហិង្សា មានស្ថានទម្ងន់ទោស យកកាំបិតចាក់ជនជាតិចិនម្នាក់ បណ្តាលអោយរងរបួសធ្ងន់ធ្ងរ ក្នុងក្រុងព្រះសីហនុ រួចហើយគេចខ្លួនទៅខេត្តសៀមរាប ។
ករណីហិង្សានេះ កើតឡើងកាលពីវេលាម៉ោង០៤និង២១នាទីទៀបភ្លឺ ថ្ងៃទី១០ ខែតុលា ឆ្នាំ២០២១ នៅចំណុចទល់មុខសណ្ឋាគារស៊ីហ៊ូ ស្ថិតនៅក្រុម២ ភូមិ១ សង្កាត់លេខ៣ ក្រុងព្រះសីហនុ ។
ប្រភពពីមន្ត្រីនគរបាលខេត្តព្រះសីហនុ បានអោយដឹងថា ជនរងគ្រោះឈ្មោះ CHEN JIALI ភេទប្រុស អាយុ២៩ឆ្នាំ ជនជាតិចិន បានជួលម៉ូតូកង់បី ជិះជាមួយមិត្តស្រី ចេញពីឆ្នេរអូឈើទាល មកដល់ចំណុចកើតហេតុ ក៏កើតមានជម្លោះជាមួយអ្នកបើកម៉ូតូកង់បី ក្នុងពេលនោះ អ្នកបើកម៉ូតូកង់៣ បានចាក់ទៅលើជនរងគ្រោះ ត្រូវពោះផ្នែកខាងឆ្វេង បណ្តាលអោយរងរបួសធ្ងន់ធ្ងរ សន្លប់បាត់ស្មារតី បច្ចុប្បន្នកំពុងជួយសង្គ្រោះ នៅមន្ទីរពេទ្យថៃ ខាងក្នុងក្រុងព្រះសីហនុ បន្ទាប់មកជនសង្ស័យ បានគេចខ្លួន ទៅខេត្តសៀមរាប ។
ក្រោយការស្រាវជ្រាវតាមជំនាញ នៅវេលាម៉ោង ១៦និង០០នាទីល្ងាចថ្ងៃទី១៦ ខែតុលា ឆ្នាំ២០២១ កម្លាំងជំនាញរបស់អធិការដ្ឋាននគរបាលក្រុងព្រះសីហនុ បានសហការជាមួយកម្លាំងសមត្ថកិច្ចនាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ និងកម្លាំងរបស់ស្នងការដ្ឋាននគរបាលខេត្តសៀមរាប ធ្វើការស្រាវជ្រាវ និងឃាត់ខ្លួនជនសង្ស័យ ឈ្មោះ ថង សម្បត្តិ អាយុ៤៨ឆ្នាំ ជនជាតិខ្មែរ នៅចំណុចបេនឡានក្រុង បុរីសៀងណាំ ក្នុងក្រុងសៀមរាប ខេត្តសៀមរាប រួចបញ្ជូនមកអធិការដ្ឋាននគរបាលក្រុងព្រះសីហនុ ដើម្បីចាត់ការបន្តទៅតាមផ្លូវច្បាប់ ៕
ចែករំលែកព័តមាននេះ