រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត (គជប) បានប្រកាសថា ពលរដ្ឋដែលបានទៅចុះឈ្មោះបោះឆ្នោតថ្មីមានចំនួនជាង៣ម៉ឺននាក់ ខណៈអ្នកដែលនឹងត្រូវលុបចេញពីបញ្ជីឈ្មោះបោះឆ្នោតសរុបជា២ម៉ឺននាក់ ។
យោងតាមសេចក្តីប្រកាសព័ត៌មានរបស់ គ.ជ.ប នៅថ្ងៃទី១៤ តុលាបានឲ្យដឹងថា សរុបរយៈពេល៣ថ្ងៃ លទ្ធផលនៃការពិនិត្យបញ្ជីឈ្មោះ និងការចុះឈ្មោះទទួលបានមានប្រជាពលរដ្ឋដែលបានអញ្ជើញមកចុះឈ្មោះបោះឆ្នោតថ្មីសរុប មានចំនួន ៣៤.៩៤៤ នាក់ ។
អ្នកដែលនឹងត្រូវលុបឈ្មោះចេញពីបញ្ជីបោះឆ្នោតសរុប មានចំនួន ២០.២០៤ នាក់ អ្នកដែលបានកែតម្រូវទិន្នន័យសរុបមានចំនួន ៨០០១ នាក់ ។ អ្នកដែលបានផ្ទេរទីលំនៅចូលក្នុងឃុំ សង្កាត់ថ្មីសរុប មានចំនួន ១០.១៥៧ នាក់។ គ.ជ.ប.បានលើកឡើងថាការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២១ ប្រព្រឹត្តទៅចាប់ពីថ្ងៃទី១២ ខែតុលាដល់ថ្ងៃទី៣០ ខែវិច្ឆិកា ឆ្នាំ២០២១ គិតទាំងថ្ងៃសៅរ៍ និងថ្ងៃអាទិត្យ។
គ.ជ.ប.បានសូមអញ្ជើញប្រជាពលរដ្ឋទាំងអស់ ៖ ទៅពិនិត្យមើលឈ្មោះក្នុងបញ្ជីបោះឆ្នោតចុងក្រោយ ដើម្បីស្នើសុំកែទិន្នន័យ ប្រសិនបើមាន ចំណុចខុសឆ្គង ដែលទើបគ្រប់អាយុ១៨ឆ្នាំ (កើតមុន ឬកើតត្រឹមថ្ងៃទី៦ ខែមិថុនា ឆ្នាំ២០០៤) និងប្រជាពលរដ្ឋ ដែលមិនធ្លាប់ចុះឈ្មោះបោះឆ្នោតពីមុនមក អញ្ជើញទៅចុះឈ្មោះបោះឆ្នោតឱ្យបានគ្រប់ៗគ្នា។
យោងតាមសេចក្តីប្រកាសព័ត៌មានបានឲ្យដឹងទៀតថា លទ្ធផលបណ្តោះអាសន្នថ្ងៃទី៣ នៃការពិនិត្យបញ្ជីឈោះ្ម និងការចុះឈ្មោះបោះឆ្នោត ឆ្នាំ២០២១ថា តាមរបាយការណ៍ពីឃុំ សង្កាត់ ចំនួន ១.៥១០ លទ្ធផលបណ្តោះអាសន្នថ្ងៃទី៣ នៃការពិនិត្យបញ្ជី ឈ្មោះ និងការចុះឈ្មោះបោះឆ្នោត ឆ្នាំ២០២១ (សម្រាប់ថ្ងៃទី១៤ ខែតុលា ឆ្នាំ២០២១) នៅទូទាំងប្រទេស មានប្រជាពលរដ្ឋដែលបានអញ្ជើញមកចុះឈ្មោះបោះឆ្នោតថ្មី មានចំនួន ១០.២២៩ នាក់នឹងអ្នកដែលនឹងត្រូវលុបឈ្មោះចេញពីបញ្ជីបោះឆ្នោត មានចំនួន ៧២៤៦ នាក់។
គ.ជ.បក៏បានឲ្យដឹងថា អ្នកដែលបានកែតម្រូវទិន្នន័យ មានចំនួន ២៥០៣ នាក់ នឹងអ្នកដែលបានផ្ទេរទីលំនៅចូលក្នុងឃុំ សង្កាត់ថ្មី មានចំនួន ៣.០៥១ នាក់៕
ចែករំលែកព័តមាននេះ