រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការស្ថានីយអ្នកដំណើរថ្មី
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការស្ថានីយអ្នកដំណើរថ្មីនៃអាកាសយានដ្ឋានអន្តរជាតិភ្នំពេញ នាព្រឹកថ្ងៃទី១៦ មីនា ឆ្នាំ២០១៦ ថា កម្ពុជាមានពីរ៖ ទី១-គឺកម្ពុជាពិត និងទី២-កម្ពុជាលើទំព័រសារព័ត៌មាន ដែលមនុស្សមួយចំនួនបានបរិហារកេរ្តិ៍ ឬនិយាយអាក្រក់ពីកម្ពុជាសឹងតែជាឋាននរកលោកិយ ។
សម្តេចតេជោនាយករដ្ឋមន្ត្រី មានប្រសាសន៍គូសបញ្ជាក់ថា ប៉ុន្តែថ្ងៃនេះខ្ញុំសង្ឃឹមថា លោកជំទាវ អស់លោក លោកស្រី រួមទាំងលោកឯកអគ្គរដ្ឋទូតសាធារណរដ្ឋបារាំង និងបណ្តាឯកអគ្គរដ្ឋទូតនានាមកពីសហភាពអឺរ៉ុប ដែលអញ្ជើញចូលរួមនៅក្នុងឱកាសនេះ ពិតជាកំពុងរួមជាមួយយើងខ្ញុំ ស្ថិតនៅកម្ពុជាពិតតែម្តង ។
កម្ពុជាយើងខ្ញុំពិតជាមានពីរ កម្ពុជាពិតនិងកម្ពុជាលើទំព័រសារព័ត៌មាន ។ កម្ពុជាលើទំព័រសារព័ត៌មាននៅក្រៅប្រទេស តាមរយៈនៃការសរសេរផ្សាយរបស់មនុស្សមួយចំនួន រាប់ទាំងជនជាតិកម្ពុជាមួយចំនួន គឺកម្ពុជានេះមិនគួរឱ្យចង់រស់នៅ មិនគួរចង់មកទស្សនកិច្ចនោះទេ ហើយប្រហែលជាមិនមានវត្តមានក្រុមហ៊ុន VINCI ដែលរួមគ្នាសម្ពោធនៅថ្ងៃនេះទេ ។
នៅក្នុងក្របខណ្ឌនយោបាយបើកចំហជើងមេឃ បើកចំហជើងគោក និងបើកចំហជើងទឹក សម្តេចតេជោនាយករដ្ឋមន្ត្រី មានប្រសាសន៍ថា យើងពិតជាមានតម្រូវការហេដ្ឋារចនាសម្ព័ន្ធដើម្បីទ្រទ្រង់ឱ្យការអភិវឌ្ឍរបស់ប្រទេស ។ ខ្ញុំអាចនិយាយបានថា តាមរយៈនៃការអនុវត្តគោលនយោបាយបើកចំហជើងមេឃនោះហើយ ដែលតម្រូវឲ្យយើងបានកែទម្រង់កិច្ចព្រមព្រៀងជាបន្តបន្ទាប់ រហូតដល់ទៅ៦ដងរួចទៅហើយ នោះគឺផ្តើមចេញពីការអនុវត្តនយោបាយបើកចំហជើងមេឃរបស់យើង ដែលពីមុនគឺតម្រូវឲ្យមានព្រលានយន្តហោះមួយនៅទីក្រុងភ្នំពេញ និងមិនមានព្រលានយន្តហោះអន្តរជាតិដទៃទៀត ។
ប៉ុន្តែនៅឆ្នាំ១៩៩៧ យើងក៏សម្រេចឱ្យមានការហោះហើរត្រង់ទៅព្រលានយន្តហោះនៅខេត្តសៀមរាប ដែលពុំបានគិតទៅដល់អំពីបញ្ហាថា ក្រុមហ៊ុនអាកាសចរណ៍ណាចំណេញឬខាតទេ ក៏ប៉ុន្តែយើងគិតទៅដល់បញ្ហាសេដ្ឋកិច្ចជាតិទាំងមូលតែម្តង ។ ពេលនោះ មានអ្នករកស៊ីខាងសេវាទេសចរណ៍នៅទីក្រុងភ្នំពេញ មានប្រតិកម្មយ៉ាងខ្លាំងជាមួយនឹងការអនុញ្ញាតបើកចំហសម្រាប់ការចុះចតអាកាសយាននៅឯខេត្តសៀមរាប ។ ប៉ុន្ដែក្រោយមកគេបានឃើញច្បាស់ថា របៀបអនុវត្តដែលបានធ្វើនោះ គឺពិតជាត្រឹមត្រូវ ។
ដូច្នេះហើយបានជាក្រុមហ៊ុន VINCI ត្រូវពង្រីកខ្លួនពីព្រលានយន្ដហោះអន្ដរជាតិភ្នំពេញទៅកាន់សៀមរាប ហើយក៏ត្រូវពង្រីកខ្លួនទៅកាន់ខេត្តព្រះសីហនុដែរ ។ ការរីកចម្រើននេះ គឺទាក់ទងនឹងគោលនយោបាយរបស់រាជរដ្ឋាភិបាលក្នុងការបើកចំហជើងមេឃឱ្យមានការហោះហើរត្រង់ទៅសៀមរាប និងខេត្តព្រះសីហនុ ។
សម្ដេចតេជោ បានថ្លែងការកោតសរសើរក្រុមហ៊ុន VINIC ដោយនៅពេលដែលវិបត្ដិសេដ្ឋកិច្ចហិរញ្ញវត្ថុសាកលមកដល់ ពេលនោះកម្ពុជាពិតជាការបារម្ភជាមួយនឹងការអាក់ខានទៅលើគម្រោងវិនិយោគមួយចំនួនពីបរទេសដែលមានការខ្វះខាតទុននៅក្នុងការវិនិយោគ ។ ក្នុងនោះក៏មានការបារម្ភចំពោះក្រុមហ៊ុន VINCI ផងដែរ តើអាចអនុវត្ដទៅតាមគម្រោងដែលបានគ្រោងទុកឬអត់? នេះជាបញ្ហាកង្វល់់របស់រាជរដ្ឋាភិបាលនៅក្នុងដណាក់កាលនោះ ។ ប៉ុន្ដែក្រុមហ៊ុន VINCI មិនបានធ្វើឲ្យកម្ពុជាអាក់អន់ចិត្ត ឬខកចិត្តដោយសារវិបត្ដិសេដ្ឋកិច្ចសាកលរារាំងសកម្មភាពរបស់ក្រុមហ៊ុននៅក្នុងការអភិវឌ្ឍ និងគម្រោងវិនិយោគដែលត្រូវបានផ្ដល់សម្រាប់ព្រលានយន្ដហោះទាំង៣នោះទេ គឺនៅភ្នំពេញ សៀមរាប និងនៅក្រុងព្រះសីហនុ ។
សម្ដចេតេជោនាយករដ្ឋមន្ដ្រី មានប្រសាសន៍បញ្ជាក់ថា ព្រលានយន្ដហោះភ្នំពេញ ដែលជាភ្នំពេញពិត ហើយជាកម្ពុជាពិត ក៏បានសាកល្បងរួចទៅហើយ នូវការទទួលយន្ដហោះធំៗដែលមកចុះចតនៅទីក្រុងភ្នំពេញ ជាពិសេសនៅក្នុងឆ្នាំ២០១២ ពេលដែលកម្ពុជាធ្វើជាប្រធានអាស៊ាន យន្ដហោះដ៏ធំដឹកប្រធានាធិបតីសហរដ្ឋអាមេរិក លោក បារ៉ាក់ អូបាម៉ា ធ្លាប់បានមកចុះចត និងសំចតនៅព្រលានយន្ដហោះភ្នំពេញរួចមកហើយ ។
ដូច្នេះមានន័យថា បើសិនគ្មានសុវត្ថិភាពទេ គ្មានសន្ដិភាពទេ តើមេដឹកនាំប្រទេសណាប្រើយន្ដហោះធុនធ្ងន់មកចុះនៅព្រលានយន្ដហោះនៅទីក្រុងភ្នំពេញ ។
សម្ដេចតេជោ គូសបញ្ជាក់ថា នេះគឺជាកម្ពុជាពិត មិនមែនកម្ពុជាលើទំព័រសារព័ត៌មានទេ ។ ទោះបីព្រលានយន្ដហោះភ្នំពេញមិនទាន់មានចម្ងាយគ្រប់គ្រាន់មែន ដោយសាររាជរដ្ឋាភិបាលមិនអាចផ្តល់ដីបាន ។ ក៏ប៉ុន្តែវាក៏មិនមែនជាឧបសគ្គមករារាំងដំណើរចុះចតនូវយន្តហោះធំៗនោះទេ រាប់ទាំងយន្តហោះដែលដឹកថ្នាក់ដឹកនាំ ជាប្រធានាធិបេតី ជានាយករដ្ឋមន្ត្រី មកទស្សនកិច្ចនៅព្រះរាជាណាចក្រកម្ពុជា ជាយន្តហោះធុនធំ ។
នេះជាកម្ពុជាពិត បើសិនជាកម្ពុជានៅលើទំព័រសារព័ត៍មាន គឹជានរកលោកិយរបស់អ្នកនយោបាយខ្លះ ដែលដើរសម្អុយកេរ្តិ៍ឈ្មោះកម្ពុជា ស្របនឹងសារព័ត៍មានមិនសុចរិតទៀត ។
សម្តេចតេជោនាយករដ្ឋមន្ត្រី បានអំពាវនាវដល់មន្ត្រីពាក់ព័ន្ធទាំងអស់ដែលនៅបំពេញការងារនៅក្នុងព្រលានយន្តហោះនេះ ធ្វើកិច្ចការឲ្យបានល្អ ធ្វើយ៉ាងណាឲ្យកម្ពុជាក្លាយជាចំណុចទាក់ទាញនៃវិស័យទេសចរណ៍ ឲ្យគេមកកម្ពុជាហើយ គេត្រឡប់មកវិញដោយនាំមកជាមួយនូវភ្ញៀវទេសចរបន្ថែមទៀត គេមកហើយ គេនឹងនាំគ្នាមកថែមទៀត ។ សូមកុំធ្វើឲ្យភ្ញៀវទេសចររាងចាល…មានរឿងនេះ រឿងនោះមិនចេះចប់ រហូតទៅដល់តំបន់ទេសចរណ៍ ។
លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី មានប្រសាសន៍ថា ជាការពិត សមិទ្ធផលទាំងនេះប្រាកដជាមិនកើតឡើងបានទេ បើសិនជាគ្មានកិច្ចខិតខំប្រឹងប្រែង គោលនយោបាយយុទ្ធសាស្រដ៏ត្រឹមត្រូវរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ ជាក់ស្តែងគោលនយោបាយឈ្នះ ឈ្នះ របស់សម្តេចតេជោ បាននាំមកនូវសុខសន្តិភាព និងស្ថិរភាព ឯកភាពជាតិពេញផ្ទៃប្រទេស ដែលពុំធ្លាប់មានក្នុងរយៈកាលប្រមាណ៥០០ឆ្នាំចុងក្រោយនៃប្រវត្តិសាស្ត្រដ៏យូរលង់របស់កម្ពុជា ។
លោកឧបនាយករដ្ឋមន្ត្រី មានប្រសាសន៍ថា សន្តិភាព និងស្ថិរភាពនយោបាយ គឺជាមូលដ្ឋានគ្រឹះដ៏ចាំបាច់សម្រាប់ការអភិវឌ្ឍលើគ្រប់វិស័យ ជាពិសេសវិស័យអាកាសចរណ៍ស៊ីវិល និងទេសចរណ៍ ។ ព្រមជាមួយគ្នានេះ គោលនយោបើកចំហជើងមេឃរបស់សម្តេចតេជោ បានធ្វើឲ្យវិស័យទេសចរណ៍មានការអភិវឌ្ឍ យ៉ាងឆាប់រហ័សនាពេលកន្លងមក ដោយចំនួនទេសចរអន្តរជាតិមកទស្សនាកម្ពុជាបានកើនឡើងប្រមាណ ២សែននាក់នៅឆ្នាំ១៩៩៧ រហូតដល់ជាង៤,៧លាននាក់ នៅឆ្នាំ២០១៥ ។
ដោយសារកត្តាទាំងនេះ រួមជាមួយធនធានបេតិកភណ្ឌធម្មជាតិដ៏សម្បូរបែប កម្ពុជាគឺជាគោលដៅទេសចរណ៍បេតិកភណ្ឌនិងអេកូទេសចរណ៍ប្រកបដោយសក្ដានុពលខ្ពស់មួយនៅក្នុងតំបន់ ក៏ដូចជានៅក្នុងពិភពលោក ជាពិសេសនៅតំបនើអាស៊ាន ដែលជាទីផ្សារដ៏ធំមួយមានភ្ញៀវទេសចរអន្តរជាតិ មកទស្សនាចំនួន១០៥លាននាក់កាលពីឆ្នាំ២០១៥កន្លងមក ។
តាមការព្យាករណ៍របស់ក្រសួងទេសចរណ៍កម្ពុជារំពឹងថា នឹងទទួលភ្ញៀវទេសចរអន្តរជាតិរហួតដល់ជាង៧លាននាក់នៅឆ្នាំ២០២០ ។ ទន្ទឹមនឹងនេះ វិស័យអាកាសចរណ៍ស៊ីវិលកម្ពុជា ក៏មានការរីកចម្រើនគួរឲ្យកត់សម្គាល់ជាលំដាប់ផងដែរ ។ ជាក់ស្ដែងក្នុងឆ្នាំ២០១៥ អាកាសយានដ្ឋានអន្តរជាតិទាំង៣របស់កម្ពុជា បានទទួលអ្នកដំណើរសរុបរហូតដល់៦,៤លាននាក់ គឺមានការកើនឡើងចំនួន៣០០%បើប្រៀបធៀបទៅនឹងឆ្នាំ២០០៥ដែលមានចំនួនតែ២,២លាននាក់់ ជាកំណើនមួយដល់ខ្ពស់ក្នុងរយៈពេល១០ឆ្នាំចុងក្រោយ ។
នាយកក្រុមហ៊ុន VINCI លោក Xavier Huillard មានប្រសាសន៍ថា យើងខ្ញុំតែងតែផ្តល់អាទិភាពដល់ការសម្របសម្រួល និងពិគ្រោះយោបល់គ្នាក្នុងកិច្ចសហប្រតិបត្តិការ។ យើងបានឆ្លងកាត់ដំណាក់កាលដែលមានកំណើនខ្ពស់ខាងផ្នែកចរាចរណ៍ជើងអាកាស ក៏ដូចជាពេលដែលសេដ្ថកិច្ចធ្លាក់ចុះ ជាពិសេសនៅឆ្នាំ២០០៨។ ចំនួនអ្នកដំណើរនៅអាកាសយានដ្ឋានទាំង២បានកើនយ៉ាងខ្លាំងចាប់តាំងពីឆ្នាំ២០០៩មកជាពិសេសនៅចន្លោះឆ្នាំ២០១០-២០១៣ ជាមួយនឹងកំណើនលើសពី១៥% ។
អាកាសយានដ្ឋានទាំងពីរបានស្វាគមន៍អ្នកដំណើរលើសពី៣លាននាក់នៅឆ្នាំ២០១៤ សម្រាប់ខេត្តសៀមរាប និងភ្នំពេញ ។ នៅក្នុងបរិបទនេះដែលបានពិគ្រោះយោបល់និងបានឯកភាពជាមួយអាជ្ញាធរកម្ពុជា យើងខ្ញុំបានអនុវត្តគម្រោងពង្រីកស្ថានីយអ្នកដំណើរដ៏ធំទាំងពីរដើម្បីទទួលអ្នកដំណើរបាន៥លាននាក់ក្នុងមួយឆ្នាំៗ ៕
ចែករំលែកព័តមាននេះ