ខ្លាចនគរបាលផាកពិន័យជិះម៉ូតូបុកបារ៉ាស់
រាជធានីភ្នំពេញ ៖ បុរស២នាក់ដោយសារតែភ័យខ្លាចនគរបាលចរាចរណ៍ផាកពិន័យ ជិះម៉ូតូទៅបុកបារ៉ាស់គោលដៅរឹតបន្តឹងច្បាប់ចរាចរណ៍ផ្លូវគោក កាលពីវេលាម៉ោង៩និង៣០នាទីយប់ថ្ងៃទី១៦
រាជធានីភ្នំពេញ ៖ បុរស២នាក់ដោយសារតែភ័យខ្លាចនគរបាលចរាចរណ៍ផាកពិន័យ ជិះម៉ូតូទៅបុកបារ៉ាស់គោលដៅរឹតបន្តឹងច្បាប់ចរាចរណ៍ផ្លូវគោក កាលពីវេលាម៉ោង៩និង៣០នាទីយប់ថ្ងៃទី១៦ មីនា ត្រង់ចំណុចមុខវិទ្យាល័យសន្ធរម៉ុក តាមបណ្ដោយផ្លូវកម្ពុជាក្រោម សង្កាត់ទឹកល្អក់១ ខណ្ឌទួលគោក ។
បុរសដែលជាអ្នកបើកម៉ូតូទៅបុកបារ៉ាសគោលដៅរឹតបន្តឹងច្បាប់ចរាចរណ៍ផ្លូវគោក ឈ្មោះ ថា សុខ អានីន អាយុ២៤ឆ្នាំ មានស្រុកកំណើតក្នុងភូមិវាលធំ ឃុំពាមឧកញ៉ាអុង ស្រុកល្វាឯម ខេត្តកណ្តាល ម៉ូតូម៉ាកហុងដាឌ្រីម ពណ៌ខ្មៅ ជិះគ្នា២នាក់ ទិសដៅពីកើតទៅលិចក្នុងល្បឿនលឿន ។ ចំណែកអ្នករួមដំណើរជាមួយមិនស្គាល់ឈ្មោះ ។
មន្ត្រីសមត្ថកិច្ចបានឲ្យដឹងថា មុនពេលកើតហេតុ កម្លាំងនគរបាលនៃស្នងការដ្ឋានរាជធានីភ្នំពេញ សហការជាមួយនគរបាលខណ្ឌទួលគោកបានដាក់គោលដៅរឹតបន្តឹងច្បាប់ចរាចរណ៍ផ្លូវគោកនៅចំណុចខាងលើបានមួយសន្ទុះ ស្រាប់តែមានម៉ូតូមួយគ្រឿងជិះគ្នា២នាក់ក្នុងល្បឿនលឿន លុះមកដល់ចំណុចកើតហេតុ សមត្ថកិច្ចធ្វើសញ្ញាឱ្យចូលកន្លែងត្រួតពិនិត្យ បែរជាម៉ូតូខាងលើមិនព្រមបន្ថយល្បឿនហើយបន្ថែមល្បឿនរហូតភ័យពេកជ្រុលចង្កូតទៅបុកបារ៉ាស់ដែកដែលដាក់នៅមុខកុងត្រូលត្រួតពិនិត្យនោះ តែមិនបណ្ដាលឱ្យរងរបួសដល់ម្ចាស់ម៉ូតូ និងសមត្ថកិច្ចនោះទេ ។
ក្រោយពេលកើតហេតុ ជនសង្ស័យទាំង២នាក់ត្រូវសមត្ថកិច្ចនាំខ្លួនទៅកន្លែងត្រួតពិនិត្យ ហើយអ្នកជាម្ចាស់ម៉ូតូបានសុំទោសសមត្ថកិច្ច ចំណែកខាងសមត្ថកិច្ចក៍មិនប្រកាន់និងផាកពិន័យទេ ព្រោះពួកគេមិនមានកំហុស ដោយគ្រាន់តែណែនាំម្ចាស់ម៉ូតូខាងលើឱ្យចូលរួមគោរពច្បាប់ចរាចរណ៍ថ្ងៃក្រោយកុំធ្វើបែបនេះទៀត ព្រោះអាចបង្កឱ្យសមត្ថកិច្ច ក៍ដូចជាអ្នកដទៃគ្រោះថ្នាក់ផងដែរ ៕
ចែករំលែកព័តមាននេះ