វៀតណាមបារម្ភជ្រុះតំណែងជាប្រទេសនាំអង្ករចេញធំជាងគេទី2
ប្រទេសវៀតណាម ៖ ការនាំចេញអង្កររបស់វៀតណាមត្រូវបានព្រមានថា នឹងត្រូវនាំមុខដោយការនាំចេញរបស់ថៃ និងកម្ពុជា ប្រសិនបើវៀតណាមមិនធ្វើការផ្លាស់ប្តូរគោលនយោបាយផលិតកម្ម
ប្រទេសវៀតណាម ៖ ការនាំចេញអង្កររបស់វៀតណាមត្រូវបានព្រមានថា នឹងត្រូវនាំមុខដោយការនាំចេញរបស់ថៃ និងកម្ពុជា ប្រសិនបើវៀតណាមមិនធ្វើការផ្លាស់ប្តូរគោលនយោបាយផលិតកម្ម និងការនាំចេញនាពេលបច្ចុប្បន្ននោះ ។
ប្រទេសកម្ពុជា ទើបតែចាប់ផ្តើមនាំចេញអង្ករទៅកាន់ប្រទេសចិនកាលពីពេលថ្មីៗនេះ ប៉ុន្តែបានទទួលកំណើននាំចេញខ្ពស់គួរឲ្យកត់សម្គាល់ ។ កាលពីឆ្នាំ២០១៥កន្លងមក ការនាំចេញអង្កររបស់កម្ពុជាទៅកាន់ទីផ្សារចិនមានចំនួន១១៦.០០០តោន កើនឡើង១៣៨% បើធៀបនឹងឆ្នាំ២០១៤ ។ ដូច្នេះហើយបានជាធ្វើឲ្យអ្នកជំនាញមួយចំនួននិយាយថា កម្ពុជាបានក្លាយជាដៃគូប្រកួតប្រជែងរបស់វៀតណាមយ៉ាងខ្លាំងក្លា ។
ទន្ទឹមនឹងនេះ ការគំរាមកំហែងពីប្រទេសថៃហាក់ដូចជាកាន់តែអាក្រក់ទៅទៀត ខណៈដែលប្រទេសនេះគ្រោងនឹងអនុវត្តយុទ្ធសាស្ត្រអង្ករស្រូវថ្មី ដោយទាញយកទឹកពីទន្លេមេគង្គទៅកាន់តំបន់កសិកម្មក្នុងភូមិភាគឦសាន ។
ទាក់ទងនឹងការលើកឡើងថា « ការនាំចេញអង្ករកម្ពុជាមានសន្ទុះគួរឲ្យចម្លែកនេះ » លោក Vo Tong Xuan អ្នកនាំចេញអង្ករធំជាងគេរបស់វៀតណាម បាននិយាយថា៖ « គ្មានអ្វីគួរឲ្យព្រួយបារម្ភទេ ព្រោះថាកម្ពុជាមិនអាចប្រកួតប្រជែងជាមួយវៀតណាមទៅលើតម្លៃថោក និងផលិតអង្ករគុណភាពមធ្យមបានឡើយ » ។
ទោះជាយ៉ាងណា លោក Vo Tong Xuan ទទួលស្គាល់ថា កម្ពុជាមានគុណសម្បត្តិលើសវៀតណាម ចំពោះផលិតផលអង្ករដែលមានគុណភាពខ្ពស់ បញ្ហាគឺកសិករវៀតណាមមិនចង់ទទួលផលត្រឹមតែ២-៣តោនក្នុង១ហិកតានោះទេ តែបែរជាចង់ទទួលទិន្នផលខ្ពស់ចាប់ពី៦-៧តោនក្នុង១ហិកតា ដែលនាំឲ្យគុណភាពអង្ករធ្លាក់ចុះ។
ទោះបីជាស្រូវផ្កាម្លិះរបស់វៀតណាម ក្នុង១ហិកតាទទួលបានទិន្នផល៥តោនក៏ដោយ ក៏នៅតែមិនអាចប្រកួតប្រជែងជាមួយនឹងទីផ្សារគុណភាពខ្ពស់របស់កម្ពុជា និងថៃបានដែរ ។
លោក Vo Tong Xuan បន្តថា ៖ « ចិននឹងនៅតែត្រូវការអង្ករពីវៀតណាម ដោយសារតែវាមានតម្លៃថោកសម្រាប់ប្រជាជនភាគច្រើន ថ្វីបើប្រជាជនចិនកាន់តែមានជីវភាពធូរធារ និងចង់ប្រើប្រាស់ផលិតផលគុណភាពខ្ពស់ក្តី » ។
គួរបញ្ជាក់ថា ភាពខុសគ្នារវាងគុណភាពអង្ករវៀតណាម ជាមួយថៃ ក៏ដូចជាកម្ពុជា គឺលើគុណភាពដាំដុះស្រូវ មានន័យថា វៀតណាមចង់បានតែទិន្នផលស្រូវខ្ពស់ប៉ុណ្ណោះ ខណៈដែលថៃ និងកម្ពុជាបានផ្តោតទៅលើការដាំដុះស្រូវមានគុណភាពខ្ពស់ ។
ទោះជាយ៉ាងណា អ្នកជំនាញស្រូវអង្ករជឿជាក់ថា វៀតណាមមិនគួរព្យាយាមប្រកួតប្រជែងជាមួយកម្ពុជា និងថៃ ទៅលើការដាំដុះស្រូវគុណភាពខ្ពស់នោះទេ ដោយសារតែការដាំដុះស្រូវទទួលបានទិន្នផលខ្ពស់របស់វៀតណាម គឺអាចរកប្រាក់ចំណេញបានច្រើនជាង ។
លើសពីនេះទៀត លោក Vo Tong Xuan បានឲ្យដឹងថា ៖ « វៀតណាមគួរតែកាត់បន្ថយការដាំដុះដំណាំនៅតំបន់ដែលមានជាតិអំបិលខ្ពស់ និងគួរតែដាំដុះដំណាំមួយប្រភេទនៅក្នុងរដូវភ្លៀង » ៕
ចែករំលែកព័តមាននេះ