Daily Maiil កាលពីពេល ថ្មីៗកន្លងមកផ្សាយថា សត្វផេនគ្វីនពូជអាមេរិកខាងត្បូងព្យាយាមដើរក្នុងចម្ងាយផ្លូវប្រហែល៨.០០០គីឡូម៉ែត្រ ជារៀងរាល់ឆ្នាំចេញពីទីជម្រកដើម្បីស្វែងរកជួបលោក Joao Pereira De Sousa អាយុ៧១ឆ្នាំ អតីតជាជាងឥដ្ឋ និងមានអាជីពបន្ថែមជាអ្នកនេសាទនៅក្នុងភូមិមួយខាងក្រៅក្រុងរីយ៉ូដឺហ្សាណេរ៉ូ ប្រទេសប្រស៊ីល ។
លោក Joao Pereira De Sousa បានជួបផេនគ្វីនមួយក្បាលនោះ កាលពីឆ្នាំ២០១១ ខណៈពេលខ្លួនវាប្រឡាក់កំណកប្រេងពណ៌ខ្មៅ និងដេកនៅលើដុំថ្ម ។ អ្នកនេសាទបានជួយយកផេនគ្វីននោះទៅលាងកំណកប្រេង និងផ្តល់ត្រីឱ្យវាស៊ី ។ បន្ទាប់ពីវាជាសះស្បើយក្នុងរយៈពេល១សប្តាហ៍ លោក Sousa ក៏យកវាទៅលែងចូលសមុទ្រវិញ ។ ប៉ុន្មានខែក្រោយមកផេនគ្វីននោះត្រឡប់ទៅសួរសុខទុក្ខលោក Joao Pereira De Sousa ដែលជារឿងមិនគួរឱ្យជឿ ។ លោក Joao Pereira De Sousa ឱ្យផេនគ្វីននោះនៅផ្ទះជាមួយលោក លុះរយៈពេល៨ខែក្រោយមកនៅពេលដល់រដូវបន្តពូជទើបវាចាកចេញទៅកន្លែងវាវិញ ។
លោក Joao Pereira De Sousa បញ្ជាក់ថា ផេនគ្វីនមួយក្បាលនោះលោកដាក់ឈ្មោះ «Jin jing» ។ វាបានធ្វើដំណើរប្រហែល៨.០០០គីឡូម៉ែត្រពីទីជម្រកដើម្បីទៅជួបលោក ។ លោក Joao Pereira De Sousa មិនអនុញ្ញាតឱ្យនរណាម្នាក់ប៉ះពាល់Jin jing ទេ ដោយចិញ្ចឹមវាប្រៀបដូចជាកូន ឱ្យដេកនៅលើភ្លៅ ងូតទឹកឱ្យ រួមទាំងបញ្ចុកត្រីសាឌីនឱ្យវាស៊ីជាប្រចាំ ។ លើកទី២ Jin jing បានរស់នៅជាមួយលោកអស់រយៈពេល១១ខែ រហូតជ្រុះរោមប្តូររោមថ្មីទើបវាត្រឡប់ទៅទីជម្រកធម្មជាតិរបស់វាវិញ។
ជារៀងរាល់ឆ្នាំ Jin jing តែងតែធ្វើដំណើរទៅលេងលោក Joao Pereira De Sousa លោកចៅប៉ាវឡូ ក្រាហុីវស្គី អ្នកជីវវិទ្យាជនជាតិប្រេស៊ីលសម្តែងការភ្ញាក់ផ្អើលព្រោះមិនធ្លាប់ជួបរឿងបែបនោះពីមុនមក ។ លោកសន្និដ្ឋានថាផេនគ្វីននោះប្រហែលជាមានមនោសញ្ចេតនាចំពោះលោក Joao Pereira De Sousa ដែលមានគុណចំពោះវា ៕
ចែករំលែកព័តមាននេះ