ប្រទេសហ្វីលីពីន ៖ យោងតាមប្រភពពីទីភ្នាក់ងារសារព័ត៌មាន AP Arirang News បានរាយការណ៍ថា ភូមិមួយនៅប្រទេសហ្វីលីពីន ដែលមានប្រជាជនរស់នៅយ៉ាងច្រើន បាននឹងកំពុងបើកការប្រយុទ្ធប្រឆាំងនឹងជំងឺគ្រុនឈាម…
ប្រទេសហ្វីលីពីន ៖ យោងតាមប្រភពពីទីភ្នាក់ងារសារព័ត៌មាន AP Arirang News បានរាយការណ៍ថា ភូមិមួយនៅប្រទេសហ្វីលីពីន ដែលមានប្រជាជនរស់នៅយ៉ាងច្រើន បាននឹងកំពុងបើកការប្រយុទ្ធប្រឆាំងនឹងជំងឺគ្រុនឈាម ដោយអាជ្ញាធរផ្តល់ប្រាក់រង្វាន់ដល់ប្រជាជនដែលចាប់មូល និងដង្កូវទឹកទាំងងាប់ ឬនៅរស់។
យុទ្ធសាស្ត្រប្រយុទ្ធប្រឆាំងប្លែកមិនធម្មតានេះ ត្រូវបានអនុវត្តនៅភូមិ Addition Hills ស្ថិតក្នុងទីក្រុងម៉ាន់ដាលូយ៉ុង (Mandaluyong) កាលពីថ្ងៃពុធ ដោយឆ្លុះបញ្ចាំងពីការព្រួយបារម្ភកាន់តែខ្លាំងឡើងៗ បន្ទាប់ពីទីក្រុងកេហ្សុន (Quezon) នៅក្បែរនោះបានប្រកាសពីការផ្ទុះឡើងជំងឺគ្រុនឈាម កាលពីសប្តាហ៍មុន។ តំបន់៨ផ្សេងទៀត ក៏បានរាយការណ៍ថាមានការកើនឡើងករណីជំងឺគ្រុនឈាម ដែលអាចបណ្តាលឱ្យមនុស្សស្លាប់ផងដែរ។
យោងតាមស្ថិតិរបស់ក្រសួងសុខាភិបាលហ្វីលីពីន បានបង្ហាញថា គិតត្រឹមថ្ងៃទី១ ខែកុម្ភៈ ឆ្នាំ២០២៥ យ៉ាងហោចណាស់មានករណីជំងឺគ្រុនឈាមចំនួន ២៨,២៣៤ករណី ត្រូវបានកត់ត្រានៅប្រទេសហ្វីលីពីន សម្រាប់ឆ្នាំនេះ ដែលកើនឡើង ៤០% បើធៀបនឹងរយៈពេលដូចគ្នា កាលពីឆ្នាំមុន។ ទីក្រុងកេហ្សុនបានប្រកាសពីការផ្ទុះជំងឺគ្រុនឈាម កាលពីថ្ងៃសៅរ៍សប្តាហ៍មុន បន្ទាប់ពីករណីស្លាប់នៅឆ្នាំនេះ ឈានដល់១០នាក់ ភាគច្រើនជាកុមារ ក្នុងចំណោមអ្នកមានជំងឺគ្រុនឈាម ១,៧៦៩នាក់។
ភូមិ Addition Hills ដែលមានប្រជាជនរស់នៅជាង១០ម៉ឺននាក់ ដោយនៅតាមសង្កាត់មានមនុស្សច្រើនកកកុញ អគារខុនដូ និងលំនៅដ្ឋាន បាននាំគ្នាធ្វើការបោសសម្អាត និង បិទប្រឡាយ លូ និងយុទ្ធនាការអនាម័យ ដើម្បីប្រយុទ្ធប្រឆាំងនឹងជំងឺគ្រុនឈាម។ ប៉ុន្តែនៅពេលករណីជំងឺគ្រុនឈាមបានកើនឡើងដល់៤២ករណីក្នុងឆ្នាំនេះ ហើយសិស្សវ័យក្មេងពីរនាក់បានស្លាប់ផងនោះ លោក Carlito Cernal ដែលជាមេភូមិបានសម្រេចបង្កើនការប្រយុទ្ធប្រឆាំងដ៏ខ្លាំងក្លា។ លោកបានប្រាប់សារព័ត៌មាន AP ថា លោកមានវិធីដ៏ល្អមួយ ដោយអ្នកស្រុកនឹងទទួលបានប្រាក់រង្វាន់១ប៉េសូហ្វីលីពីន ឬស្មើនឹងប្រាក់រៀលខ្មែរ ៧០រៀល រាល់ពេលពួកគេចាប់មូស៥ក្បាលទាំងងាប់ ឬនៅរស់។ ទោះយ៉ាងណា ក្រុមអ្នករិះគន់បានព្រមានថា យុទ្ធសាស្ត្រនេះ គ្មានប្រសិទ្ធិភាពទេ ហើយសត្វមូសអាចត្រឡប់មកវិញ ដោយសារពលរដ្ឋចូលរួមយុទ្ធនាការនេះ ព្រោះតែប្រាក់រង្វាន់ប៉ុណ្ណោះ។
យ៉ាងណាមិញ នៅពេលយុទ្ធនាការបានចាប់ផ្តើម អ្នកប្រមាញ់មូសរាប់សិបនាក់បាននាំគ្នាបង្ហាញខ្លួននៅការិយាល័យភូមិ។ ក្រៅពីភូមិ Addition Hills ក្នុងទីក្រុងម៉ាន់ដាលូយ៉ុង អាជ្ញាធរនៅឯភូមិមួយទៀតក្នុងទីក្រុងកេហ្សុន ក៏កំពុងតែពិចារណាលែងហ្វូងសត្វកង្កែប ដើម្បីឱ្យទៅស៊ីសត្វមូស និងដង្កូវទឹកផងដែរ។
លោក Teodoro Herbosa លេខាធិការសុខាភិបាលហ្វីលីពីនបានថ្លែងថា វាមានសារៈសំខាន់ណាស់ក្នុងការសម្អាតកន្លែងមូសរស់នៅ ហើយសម្រាប់អ្នកអាចឆ្លងមេរោគ ត្រូវស្វែងរកការព្យាបាលជាបន្ទាន់។ លោកបន្តថា ទោះបីជាមានការកើនឡើងនៃការឆ្លងមេរោគគ្រុនឈាមក៏ដោយ ក៏ប្រទេសហ្វីលីពីនបានគ្រប់គ្រងអត្រាមរណភាពទាប។ ករណីជំងឺគ្រុនឈាមបានកើនឡើងដោយមិននឹកស្មានដល់នៅមុនរដូវវស្សា ដែលចាប់ផ្តើមនៅក្នុងខែមិថុនា ទំនងជាដោយសារតែមានភ្លៀងធ្លាក់ជាបន្តបន្ទាប់ ដែលធ្វើឱ្យមានទឹកដក់ច្រើនកន្លែង អំណោយផលដល់មូសបង្កជំងឺគ្រុនឈាមអាចបង្កាត់ពូជបាន។
ជំងឺគ្រុនឈាមជាមេរោគឆ្លងដោយមូសខ្លា មាននៅក្នុងប្រទេសត្រូពិចជុំវិញពិភពលោក។ ជំងឺគ្រុនឈាមអាចបណ្តាលឱ្យឈឺសន្លាក់ ចង្អោរ ក្អួត និងកន្ទួល ហើយក្នុងករណីធ្ងន់ធ្ងរអាចបណ្តាលឱ្យមានបញ្ហាផ្លូវដង្ហើម ហូរឈាម និងខូចសរីរាង្គ ខណៈពេលដែលមិនមានការព្យាបាលជាក់លាក់សម្រាប់ជំងឺនេះ ការថែទាំវេជ្ជសាស្ត្រដើម្បីរក្សាកម្រិតជាតិទឹកនៅក្នុងខ្លួនមនុស្សត្រូវបានគេមើលឃើញថាមានសារៈសំខាន់៕
ចែករំលែកព័តមាននេះ