ព្រះសិរអសុរមានលក្ខណៈពិសេស ត្រូវបានបញ្ជូនទៅរក្សាទុកនៅសារមន្ទីរជាតិ
- កំពង់ឆ្នាំង
ខេត្តកំពង់ឆ្នាំង៖ ព្រះសិរអសុរមួយមានលក្ខណៈពិសេស បានបញ្ជូនទៅរក្សាទុកនៅសារមន្ទីរជាតិ និងដេីម្បីតាំងបង្ហាញជាប្រយោជន៍សាធារណៈផងដែរ ។ ការបញ្ជូននេះចេញពីទីតាំងតម្កល់ទុកជាយូរមកហើយនៅខេត្តកំពង់ឆ្នាំង ។ តើព្រះសិរអសុរនោះមានលក្ខណៈពិសេសបែបណា ?
បើតាមមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង កាលពីពេល ថ្មីៗកន្លងមក មន្ត្រីមន្ទីរនេះដឹកនាំដោយលោកសិត ស អនុប្រធានមន្ទីរបានសហការជាមួយអាជ្ញាធរមូលដ្ឋានឃុំលង្វែក និងមានការអញ្ជើញចូលរួមពីមន្ត្រីជំនាញនៃសារមន្ទីរជាតិភ្នំពេញ និងភាគីម្ចាស់វត្ថុបុរាណ សរុបប្រមាណជា២០នាក់ បានចូលរួមក្នុងការរៀបចំបញ្ជូនព្រះសិរអសុរានោះ ។
ព្រះសិរអសុរ មានលក្ខណៈពិសេសត្រង់មានព្រះភ័ក្ត្រ២ មានក្បាច់រចនាលម្អស្ថិតក្នុងរចនាបថបាយ័ន ។ នេះបើយោងតាមការសន្និដ្ឋានរបស់មន្ត្រីជំនាញ នៃសារមន្ទីរជាតិភ្នំពេញ ។
វត្ថុបុរាណនោះបានយកទៅគោរពបូជា និងរក្សាទុកជាសម្បត្តិឯកជនក្នុងបរិវេណគេហដ្ឋានមួយ ស្ថិតក្នុងភូមិអន្លង់ត្នោត ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង តាំងពីឆ្នាំ២០០៤។ មកទល់នឹងបច្ចុប្បន្ននេះ ភាគីម្ចាស់វត្ថុបុរាណ បានយល់ព្រមប្រគល់ព្រះសិរអសុរ ឱ្យមកសារមន្ទីរជាតិភ្នំពេញ ដើម្បីអភិរក្ស ដាក់តាំងបង្ហាញជូនសាធារណជនទស្សនា និងស្រាវជ្រាវរកប្រភពដើមរបស់វត្ថុបុរាណ ដេីម្បីនាំយកទៅដាក់តម្កល់នៅទីតាំងដើមវិញ ។
មន្ត្រីរាជការ នៃមន្ទីរវប្បធម៌និងវិចិត្រសិល្បៈខេត្តកំពង់ឆ្នាំង និងសារមន្ទីរជាតិភ្នំពេញ បានថ្លែងអំណរគុណយ៉ាងជ្រាលជ្រៅចំពោះម្ចាស់វត្ថុបុរាណ ដែលមានចិត្តជ្រះថ្លាប្រគល់វត្ថុបុរាណមកឱ្យមន្ត្រីជំនាញសារមន្ទីរជាតិរក្សាទុកជាប្រយោជន៍ជាតិទៅថ្ងៃអនាគត ៕
ចែករំលែកព័តមាននេះ