លោកយាយឃី មុំ អតីតគ្រូ និងតួឯកយីកេ កំពុងមានជំងឺ
- ភ្នំពេញ
រាជធានីភ្នំពេញ៖ លោកយាយព្រឹទ្ធាចារ្យឃី មុំ កំពុងសម្រាកព្យាបាលជំងឺនៅគេហដ្ឋាន ស្ថិតក្នុងភូមិតាកេរ្តិ៍ សង្កាត់កំបូល ខណ្ឌកំបូល រាជធានីភ្នំពេញ ។
កាលពីពេល ថ្មីៗកន្លងមក ឯកឧត្តមហ៊ឺ វីរៈ ប្រធាននាយកដ្ឋានជំរុញចលនាវប្បធម៌ សាសនា និងប្រវត្តិសាស្ត្រ និងជាប្រធានក្រុមការងារសហភាពសហព័ន្ធយុវជនកម្ពុជាវិស័យវប្បធម៌ និងវិចិត្រសិល្បៈ តំណាងលោកជំទាវបណ្ឌិតសភាចារ្យភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានទៅសួរសុខទុក្ខលោកយាយព្រឹទ្ធាចារ្យដល់គេហដ្ឋាន ។
បើតាមឯកឧត្តមហ៊ឺ វីរៈ ក្នុងឱកាសនោះ ឯកឧត្តម និងក្រុមការងារ បាននាំការផ្តាំផ្ញើសួរសុខទុក្ខពីឯកឧត្តមហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោកជំទាវបណ្ឌិតសភាចារ្យ ភឿង សកុណា ព្រមទាំងនាំយកផ្លែឈើ និងប្រាក់មួយចំនួនរបស់លោកជំទាវបណ្ឌិតសភាចារ្យ ជូនលោកយាយព្រឹទ្ធាចារ្យ ដើម្បីជួយសម្រាលការលំបាកក្នុងអំឡុងពេលព្យាបាលជំងឺ ។
ការទៅសួរសុខទុក្ខនេះបង្ហាញពីការយកចិត្តទុកដាក់របស់រាជរដ្ឋាភិបាល និងក្រសួងវប្បធម៌និងវិចិត្រសិល្បៈ ចំពោះសិល្បករ សិល្បការិនី និងព្រឹទ្ធាចារ្យសិល្បៈ តាមរយៈការផ្តល់ការគាំទ្រ និងឧបត្ថម្ភនៅពេលមានជំងឺ ព្រមទាំងជាការលើកទឹកចិត្ត និងតបស្នងចំពោះស្នាដៃសិល្បៈ ដែលបានរួមចំណែកដល់ការថែរក្សា អភិរក្ស និងលើកស្ទួយវប្បធម៌ជាតិ ។
លោកយាយ ឃី មុំ គឺជាព្រឹទ្ធាចារ្យសិល្បៈជំនាញផ្នែកល្ខោនយីកេ និងជាអ្នកចម្រៀងអមរបាំព្រះរាជទ្រព្យ ដែលមានទេពកោសល្យ និងបទពិសោធន៍ដ៏សម្បូរបែបក្នុងវិស័យសិល្បៈខ្មែរ។
កាលពីឆ្នាំ១៩៦៣ លោកយាយឃី មុំ មានភាពល្បីល្បាញជាតួឯកស្រីក្នុងការសម្ដែងល្ខោនយីកេ ដោយសម្ដែងជាគូជាមួយប្អូនប្រុសឃី ពៅ រហូតត្រូវបានសម្តេចព្រះមហាក្សត្រីយានី ស៊ីសុវត្ថិ កុសមនារីរ័ត្នសេរីវឌ្ឍនា អញ្ជើញឱ្យចូលសម្ដែងថ្វាយក្នុងព្រះបរមរាជវាំង ។
នៅឆ្នាំ១៩៧៩ លោកយាយឃី មុំ បានប្រមូលផ្តុំសាច់ញាតិ និងបង្កើតក្រុមល្ខោនយីកេឡើងវិញ ។ ចន្លោះឆ្នាំ១៩៨០ ដល់ឆ្នាំ២០១០ លោកយាយបានបំពេញតួនាទីជាគ្រូបង្រៀនសិល្បៈយីកេនៅសាកលវិទ្យាល័យភូមិន្ទវិចិត្រសិល្បៈ និងបានចូលរួមបណ្តុះបណ្តាលសិស្សនៅអង្គការសិល្បៈខ្មែរអមតៈ ។
តាមរយៈការងារសិល្បៈ និងការបណ្តុះបណ្តាលយុវជនជំនាន់ក្រោយ លោកយាយបានរួមចំណែកយ៉ាងសំខាន់ក្នុងការថែរក្សា អភិរក្ស និងបន្តវេនសិល្បៈបុរាណខ្មែរ ៕
ចែករំលែកព័តមាននេះ