ឪពុកការពារសិល្បៈ វប្បធម៌ កូនការពារទឹកដី! ទីបំផុត កូនប្រុសតារាកំប្លែងខាត់ ចំរើន សម្រេចបំណងប្រាថ្នាឪពុកចូលបំពេញកាតព្វកិច្ចយោធាហើយ
- ភ្នំពេញ
រាជធានីភ្នំពេញ ៖ ថ្មីៗនេះ តារាចម្រៀងអ្នកនាង ខាត់ សុឃីម បានបង្ហោះសំណេរ អមដោយវីដេអូសកម្មភាពជូនដំណើរក្មួយប្រុសចូលបំពេញកាតព្វកិច្ចយោធា ថា «ព្រឹកនេះ ខាត់ ចំរើនមង្គល បានទៅបំពេញកាតព្វកិច្ចយោធា ជាថ្ងៃដែលប្អូនខ្ញុំ ខាត់ ចំរើន ចង់ឃើញ តែយ៉ាងណាក៏ក្មួយប្រុសអ៊ំ បានបំពេញក្តីប្រាថ្នា ឪពុកក្មួយ បានហើយ» ។
អ្នកនាងខាត់ សុឃីម និងក្រុមគ្រួសារទាំងមូលបានសម្តែងក្តីមោទនភាពយ៉ាងខ្លាំង ក្នុងពេលដែលបានឃើញក្មួយប្រុសដែលជាកូនបង្កើតរបស់លោក ខាត់ ចំរើន បានជាប់កាតព្វកិច្ចយោធា ដែលជាក្តីបំណងប្រាថ្នារបស់ឪពុក ។
អ្នកនាងចាត់ទុកថា ការចូលបំពេញកាតព្វកិច្ចយោធារបស់ក្មួយប្រុសនាពេលនេះ គឺជារឿងមួយដ៏ល្អ ព្រោះអាចគេចផុតអំពើអបាយមុខផ្សេងៗ ហើយបើទៅថ្ងៃអនាគត ក្មួយរបស់អ្នកនាងអាចចូលជាកងកម្លាំងតាមបំណងប្រាថ្នាមែន នោះគឺក្រុមគ្រួសារក៏មានមោទនភាពដែលមានកូនក្មួយជាអ្នកបម្រើជាតិមាតុភូមិ ។
ថ្លែងប្រាប់កោះសន្តិភាព តារាពហុជំនាញរូបនេះ បានអះអាងថា តាំងពីតូចមក ក្មួយរបស់អ្នកនាងមានចំណង់ចំណូលចិត្តក្នុងការធ្វើជាប៉ូលិស ហេតុនេះពេលរៀនចប់ គេក៏បានដាក់ពាក្យចូលប្រឡងខាងប៉ូលិសនេះតែម្តង ។
អ្នកនាងបន្តថា ប៉ុន្តែក្រោយពេលដាក់ពាក្យនោះ ក្មួយប្រុសនៅស្ទើរកម្ពស់ ដោយខាងប៉ូលិសឲ្យរង់ចាំ១ឆ្នាំឬ២ឆ្នាំទៀត ដោយសារហេតុនេះហើយ ក្មួយប្រុសក៏បានប្តូរមកដាក់ពាក្យចូលកាតព្វកិច្ចយោធាវិញ ដោយរំពឹងថា ពេលចប់កាតព្វកិច្ចយោធាគឺអាចចូលសាលាប៉ូលិសបាន ។
អ្នកនាងបន្តថា ក្មួយរបស់អ្នកនាងចូលចិត្តណាស់រឿងខាងកងកម្លាំងនេះ មិនថា ប៉ូលិស ប៉េអឹម ឬក៏ទាហាននោះឡើយ ខុសពីកូនៗ និងក្មួយៗដទៃទៀតដែលពួកគេចូលចិត្តខាងសិល្បៈដូចទៅនឹងឪពុកម្តាយពួកគេដែរ ។
ទោះបីជាយ៉ាងណា បើតាមអ្នកនាង ខាត់ សុឃីម បន្ទាប់ពីឃើញការប្រកាសឈ្មោះក្មួយរបស់អ្នកនាងជាប់កាតព្វកិច្ចយោធានោះគឺទាំងរូបអ្នកនាង និងម្តាយរបស់ក្មួយប្រុស មានការសប្បាយចិត្តយ៉ាងខ្លាំង ព្រោះជាបំណងប្រាថ្នារបស់ឪពុក និងក្មួយផ្ទាល់។
អ្នកនាងបញ្ជាក់ថា ការចូលបំពេញកាតព្វកិច្វយោធារយៈពេល២ឆ្នាំនេះ គឺនាងគិតថា ពិតជាល្អ ដោយសារក្មួយអាចរៀនសូត្រចេះដឹងច្បាប់ទម្លាប់ ជាពិសេសការហាត់ពុតលត់ដុំ ហើយការចេញទៅនេះ ម្តាយរបស់គេក៏សប្បាយរីករាយដែរ ព្រោះបើកូនរៀនចប់ ហើយបណ្តែតបណ្តោយឲ្យកូនដោយមិនមានការងារធ្វើច្បាស់លាស់នោះគឺបារម្ភអាចបណ្តាលឲ្យកូនចូលទៅក្នុងក្រុមបនភឿនដែលមិនល្អ ។
ដោយឡែកពាក់ព័ន្ធជម្លោះព្រំដែនជាមួយថៃនោះ ត្រូវបានអ្នកនាង ខាត់ សុឃីម គូសបញ្ជាក់ថា ប្រសិនថ្ងៃណាមួយបញ្ហាព្រំដែនមានភាពរង្គោះរង្គើ បងប្អូនយើងមិនមានក្តីសុខ ដោយសារចោរឈ្លានពាន ហើយក្មួយរបស់អ្នកនាងត្រូវបានគេបញ្ជូនទៅនោះអ្នកនាងជឿជាក់ថា ក្មួយរបស់អ្នកនាងនឹងមិនរុញរាចំពោះរឿងនេះទេ ខណៈពេលដែលអ្នកនាង និងគ្រួសារទាំងមូលក៏អត់មានភាពរុញរាក្នុងចិត្តដែរ ផ្ទុយទៅវិញ វាគឺជាមោទនភាពដែលយើងមានគ្រួសារបម្រើជាតិមាតុភូមិ ។
សម្រាប់រឿងនេះដែរ អ្នកនាង ខាត់ សុឃីម ក៏បានធ្វើការសំណូមពរទៅកាន់អាណាព្យាបាលទាំងអស់គឺបញ្ចូនកូនមកបំពេញកាតព្វកិច្ចយោធា ដើម្បីឲ្យកូនៗហាត់ពុតលត់ដំខ្លួនឯងឲ្យក្លាយជាមនុស្សដែលរឹងមាំ ព្រោះជាទូទៅសាលាយោធាគឺជាសាលាដែលបង្ហាត់ក្មេងៗឲ្យមានភាពរឹងមាំ និងមានច្បាប់វិន័យសម្រាប់ខ្លួនឯង គ្រួសារ និងប្រទេសជាតិ ។
ជាការកត់សម្គាល់ បន្ទាប់ពីអ្នកនាង ខាត់ សុឃីម បានបង្ហោះសំណេរ និងវីដេអូបង្ហាញសកម្មភាពជូនដំណើរក្មួយប្រុសរបស់ខ្លួនចូលបំពេញកាតព្វកិច្ចយោធានៅលើបណ្តាញសង្គមរួចមក គេសង្កេតឃើញមានមហាជនជាច្រើនបានសម្តែងការគាំទ្រយ៉ាងខ្លាំង និងជូនពរឱ្យជោគជ័យ ហើយក៏មានមហាជនខ្លះលើកឡើងថា «ឪពុកការពារសិល្បៈ វប្បធម៌ ចំណែកកូនការពារទឹកដី» ៕
ចែករំលែកព័តមាននេះ