ខេត្តត្បូងឃ្មុំ ម្ចាស់ជ័យលាភីលេខ១ សិល្បៈល្ខោននិយាយថ្នាក់ជាតិ
- ភ្នំពេញ
រាជធានីភ្នំពេញ៖ មហោស្រពល្ខោននិយាយទូទាំងប្រទេស ឆ្នាំ២០២៦ ក្រោមប្រធានបទ«ចង្កឹះមួយបាច់» រៀបចំឡើងនៅសាលមហោស្រពនាយកដ្ឋានសិល្បៈទស្សនីយភាព បានបិទបញ្ចប់នៅល្ងាចថ្ងៃទី២ ខែតុលា ឆ្នាំ២០២៦ ក្រោមអធិបតីភាពលោកជំទាវឡងឌី សាន់ណារ៉ា រដ្ឋលេខាធិការ តំណាងលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ។
បើតាមនាយកដ្ឋានសិល្បៈទស្សនីយភាព ជាលទ្ធផល សិល្បករចំនួន ៣ក្រុម ទទួលបានជ័យលាភីក្នុងវគ្គផ្តាច់ព្រ័ត្រ ៖
ជ័យលាភីលេខ១ ទទួលបានពានមាស១ អមដោយទឹកប្រាក់ បានទៅលើក្រុមមន្ទីរវប្បធម៌ និងវិចិត្រសិល្បៈ ខេត្តត្បូងឃ្មុំ ។
ជ័យលាភីលេខ២ ទទួលបានពានប្រាក់១ អមដោយទឹកប្រាក់ បានទៅលើក្រុមសិល្បៈអនុវិទ្យាល័យសម្ដេចឪ មកពីខេត្តព្រះសីហនុ ។
ជ័យលាភីលេខ៣ ទទួលបានពានសំរឹទ្ធិ១ អមដោយទឹកប្រាក់ បានទៅលើក្រុមសិល្បៈនៃមន្ទីរវប្បធម៌ និងវិចិត្រសិល្បៈរាជធានីភ្នំពេញ ។
ចំណាត់ថ្នាក់កិត្តិយសចំនួន២ក្រុម ទទួលបានប្រកាសនីយបត្រ អមដោយទឹកប្រាក់ បានទៅលើក្រុមសិល្បអភិវឌ្ឍកុមារ និងយុវជន ពីខេត្តកំពង់ស្ពឺ និងក្រុមរស្មីវប្បធម៌ ពីខេត្តកែប ។
ព្រឹត្តិការណ៍វប្បធម៌នេះធ្វើឡើងក្នុងគោលបំណងថែរក្សា ការពារ និងលើកស្ទួយទម្រង់សិល្បៈល្ខោននិយាយ ដែលជាមរតកវប្បធម៌ជាតិដ៏មានតម្លៃពុំអាចកាត់ថ្លៃបាន ដោយប្រព្រឹត្តទៅរយៈពេល២ថ្ងៃ ចាប់ពីថ្ងៃទី១ ដលថ្ងៃទី២ ខែតុលា ឆ្នាំ២០២៦ ដោយមានវត្តមានរបស់ក្រុមសិល្បករល្ខោននិយាយ ដែលមកពីបណ្តា រាជធានី-ខេត្ត បានដាក់ពាក្យចូលរួមប្រកួតប្រជែងសមត្ថភាព ។
ក្នុងឱកាសនោះលោកជំទាវអធិបតី បានសម្តែងនូវការអបអរសាទរចំពោះក្រុមសិល្បករល្ខោននិយាយទាំងអស់ដែលទទួលបាន ជ័យលាភីនៅក្នុងមហោស្រពនាថ្ងៃនេះ ។ ជាពិសេស លោកជំទាវបានលើកទឹកចិត្តដល់ ប្អូនៗក្រុមសិល្បករល្ខោននិយាយ ដែលមិនទទួលបានពានរង្វាន់ និងសុំបន្តការខិតខំប្រឹងប្រែងបន្តទៀត ដើម្បីរួមចំណែកលើកស្ទួយ វិស័យសិល្បៈទស្សនីយភាពឱ្យកាន់តែរីកចំរើន ប្រកបដោយ និរន្តរភាព ។
លោកជំទាវឡងឌី សាន់ណារ៉ា ថ្លែងថា «មហោស្រពល្ខោននិយាយ មិនគ្រាន់តែជាវេទិកាប្រកួតប្រជែងយកពានរង្វាន់នោះទេ ប៉ុន្តែគឺជាទីកន្លែងជួបជុំសិក្សាឈ្វេងយល់វាស់ស្ទង់សមត្ថភាព និងការចែករំលែក បទពិសោធន៍ និងចំណេះដឹងផងដែរ ។ ដូចនេះគោលដៅសំខាន់នៃការរៀបចំមហោស្រពល្ខោននិយាយនាពេលនេះ គឺដើម្បីផ្តល់ឱកាសក្នុងការសិក្សាពីចំណុចខ្លាំង និងចំណុចខ្សោយ សំដៅពង្រឹងសមត្ថភាព និងលើកកម្ពស់ វិស័យសិល្បៈទស្សនីយភាពមួយនេះ ឱ្យកាន់ទៅរីកចម្រើនបន្ថែម» ៕
ចែករំលែកព័តមាននេះ