ប្រទេសណាមីប៊ី ៖ ប្រទេសណាមីប៊ី គ្រោងនឹងសម្លាប់សត្វព្រៃជាង ៧០០ក្បាល រួមទាំងសត្វដំរី ដំរីទឹក និងសេះបង្កង់ ហើយចែកចាយសាច់ដល់ប្រជាជនរបស់ខ្លួន ដែលកំពុងជួបវិបត្តិសន្តិសុខស្បៀងអាហារធ្ងន់ធ្ងរ…
ប្រទេសណាមីប៊ី ៖ ប្រទេសណាមីប៊ី គ្រោងនឹងសម្លាប់សត្វព្រៃជាង ៧០០ក្បាល រួមទាំងសត្វដំរី ដំរីទឹក និងសេះបង្កង់ ហើយចែកចាយសាច់ដល់ប្រជាជនរបស់ខ្លួន ដែលកំពុងជួបវិបត្តិសន្តិសុខស្បៀងអាហារធ្ងន់ធ្ងរ ខណៈដែលប្រទេសអាហ្វ្រិកប៉ែកខាងត្បូងមួយនេះ ជួបគ្រោះរាំងស្ងួតដ៏អាក្រក់បំផុតក្នុងរយៈពេល១០០ឆ្នាំ។
តាមប្រភពពីសារព័ត៌មាន CNN កាលពីសប្តាហ៍មុន បានរាយការណ៍ថា ក្រសួងបរិស្ថាន រុក្ខាប្រមាញ់ និងទេសចរណ៍របស់ប្រទេសណាមីប៊ីបានប្រកាសថា សត្វព្រៃដែលនឹងត្រូវសម្លាប់រួមមានដំរីចំនួន ៨៣ក្បាល ដំរីទឹក ៣០ក្បាល ក្របី ៦០ក្បាល ប្រឹស ៥០ ក្បាល គោព្រៃពណ៌ខៀវនៅអាហ្វ្រិក (Blue Wildebeest) ១០០ ក្បាល និងសេះបង្កង់ ៣០០ ក្បាលផងដែរ។ ក្រសួងបានបញ្ជាក់នៅក្នុងសេចក្តីប្រកាសមួយថា សត្វព្រៃទាំងនោះ នឹងត្រូវនាំមកពីឧទ្យានជាតិ និងតំបន់សហគមន៍ ហើយនឹងត្រូវបានសម្លាប់ដោយអ្នកពិឃាតសត្វអាជីព។ ក្រសួងបានបន្ថែមថា គោលបំណងនៃការពិឃាតសត្វព្រៃនេះ ដើម្បីជួយសម្រាលផលប៉ះពាល់បណ្តាលមកពីគ្រោះរាំងស្ងួតនៅក្នុងប្រទេស។
ប្រទេសណាមីប៊ីបានប្រកាសដាក់ប្រទេសក្នុងភាពអាសន្ន កាលពីខែឧសភា កន្លងទៅ ដោយសារផលប៉ះពាល់នៃគ្រោះរាំងស្ងួតកាន់តែអាក្រក់ទៅៗ។ ប្រជាជនប្រមាណ ១.៤លាននាក់ ប្រហែលពាក់កណ្តាលនៃចំនួនប្រជាជនសរុបរបស់ប្រទេសនេះជាង ៣លាននាក់នោះ ត្រូវបានរំពឹងថានឹងប្រឈមមុខកម្រិតខ្ពស់នៃការខ្វះខាតអាហារធ្ងន់ធ្ងរ។
ក្រសួងបានគូសបញ្ជាក់ថា ការពិឃាតសត្វព្រៃនឹងដកសម្ពាធចេញពីធនធានទឹក ដោយកាត់បន្ថយសត្វព្រៃក្នុងតំបន់ ដែលជាចំនួនលើសលើការស៊ីស្មៅ និងផឹកទឹក។ វាក៏មានគោលបំណងកាត់បន្ថយជម្លោះរវាងសត្វដំរី និងមនុស្ស ដែលអាចកើនឡើងអំឡុងពេលគ្រោះរាំងស្ងួត នៅពេលដែលសត្វព្រៃស្វែងរកអាហារ និងទឹកអាចនាំឱ្យពួកវាចូលទៅកាន់តំបន់មនុស្សរស់នៅ។
ណាមីប៊ី គឺជាប្រទេសមួយក្នុងចំណោមប្រទេសជាច្រើននៅទូទាំងអាហ្វ្រិកប៉ែកខាងត្បូងដែលកំពុងតស៊ូជាមួយគ្រោះរាំងស្ងួតដ៏អាក្រក់ ដែលជំរុញដោយបាតុភូតអេលនីណូ (El Nino) ដែលជាគំរូអាកាសធាតុធម្មជាតិដែលបាននាំឱ្យមានការថយចុះខ្លាំង នៃបរិមាណទឹកភ្លៀងនៅក្នុងតំបន់ ហើយកាន់តែធ្ងន់ធ្ងរឡើងដោយវិបត្តិអាកាសធាតុដែលបណ្តាលមកពីកត្តាមនុស្សផងដែរ។ កង្វះទឹកភ្លៀង រួមផ្សំនឹងសីតុណ្ហភាពក្តៅខ្លាំង បាននាំឱ្យដំណាំងាប់ និងកម្រិតនៃភាពអត់ឃ្លានកើនឡើង សម្រាប់ប្រជាជនរាប់សិបលាននាក់នៅក្នុងតំបន់៕ (ប្រភព ៖ CNN)
ចែករំលែកព័តមាននេះ