រាជធានីភ្នំពេញ៖ កាលពីថ្ងៃទី 30 ខែតុលា ឆ្នាំ 2025 ធនាគារជាតិកាណាដា ដែលជាធនាគារមួយក្នុងចំណោមគ្រឹះស្ថានហិរញ្ញវត្ថុធំបំផុតក្នុងប្រទេសកាណាដា និងជាភាគហ៊ុនិករបស់ធនាគារ ABA…
រាជធានីភ្នំពេញ៖ កាលពីថ្ងៃទី 30 ខែតុលា ឆ្នាំ 2025 ធនាគារជាតិកាណាដា ដែលជាធនាគារមួយក្នុងចំណោមគ្រឹះស្ថានហិរញ្ញវត្ថុធំបំផុតក្នុងប្រទេសកាណាដា និងជាភាគហ៊ុនិករបស់ធនាគារ ABA បានរៀបចំសិក្ខាសាលាធុរកិច្ចកាណាដា-កម្ពុជា នៅទីស្នាក់ការកណ្តាលរបស់ធនាគារ ក្នុងទីក្រុងម៉ុងរ៉េអាល់។ កម្មវិធីនេះ ទទួលបានការចូលរួមពីសំណាក់មន្ត្រីរដ្ឋាភិបាលប្រទេសកម្ពុជា អ្នកតំណាងពីវិស័យឯកជន ព្រមទាំងអ្នកវិនិយោគកាណាដាជាច្រើន ក្នុងគោលបំណងពិភាក្សាស្វែងរកមធ្យោបាយ ក៏ដូចជាឱកាសថ្មីៗសម្រាប់ពាណិជ្ជកម្ម និងវិនិយោគទ្វេភាគីរវាងប្រទេសទាំងពីរ ។
សិក្ខាសាលានេះ ត្រូវបានរៀបចំជាផ្នែកមួយនៃបេសកកម្មទាក់ទាញ និងជំរុញវិនិយោគ របស់កម្ពុជា នៅសហរដ្ឋអាមេរិក ដែលបានដឹកនាំដោយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី1 ក្រុមប្រឹក្សាអភិវឌ្ឍន៍កម្ពុជា។ គណៈប្រតិភូ រួមមានមន្ត្រីជាន់ខ្ពស់ពីបណ្តាក្រសួងពាក់ព័ន្ធ ព្រមទាំងអ្នកតំណាងសហគ្រាសធំៗក្នុងប្រទេសកម្ពុជា – ជាពិសេស ធនាគារ ABA ។
ដោយត្រូវបានរៀបចំឡើងដើម្បីពង្រឹងទំនាក់ទំនងសេដ្ឋកិច្ច និងទាក់ទាញវិនិយោគិនកាណាដាមកប្រទេសកម្ពុជា កម្មវិធីនេះក៏ទទួលបានការចូលរួមពីបណ្ដាក្រុមហ៊ុនធំៗនៃប្រទេសកាណាដា រួមមាន សមាជិកនៃបេសកកម្មពាណិជ្ជកម្មក្រុមការងារកាណាដា ឆ្នាំ 2025 ដែលបានធ្វើទស្សនកិច្ចមកកាន់ទីក្រុងភ្នំពេញ កាលពីខែឧសភា 2025 កន្លងទៅនេះ ។
ជាផ្នែកមួយនៃបេសកកម្មទាក់ទាញ និងជំរុញការវិនិយោគ ឯកឧត្តម ស៊ុន ចាន់ថុល ក៏បានជួបពិភាក្សាជាមួយលោក Laurent Ferreira អគ្គនាយក និងជានាយកប្រតិបត្តិនៃធនាគារជាតិកាណាដា ក្នុងកម្មវិធីទទួលទានអាហារធុរកិច្ចថ្ងៃត្រង់ នៅទីស្នាក់ការកណ្តាលរបស់ធនាគារផ្ទាល់ ។ ជំនួបនេះ បានផ្តល់ជាវេទិកាសម្រាប់ការជជែកពិភាក្សាក្រៅផ្លូវការ ជុំវិញកិច្ចសហប្រតិបត្តិការផ្នែកហិរញ្ញវត្ថុ ការសម្របសម្រួលពាណិជ្ជកម្ម និងការវិនិយោគប្រកបដោយចីរភាព។ ភាគីទាំងសងខាង ក៏បានបញ្ជាក់ជាថ្មីនូវចំណាប់អារម្មណ៍រួម ក្នុងការពង្រីកភាពជាដៃគូយូរអង្វែង ដែលផ្សារភ្ចាប់ធុរកិច្ចប្រទេសកាណាដា ជាមួយនឹងសេដ្ឋកិច្ចដែលកំពុងអភិវឌ្ឍយ៉ាងឆាប់រហ័សរបស់ប្រទេសកម្ពុជា ។
នៅក្នុងកិច្ចពិភាក្សានោះផងដែរ ឯកឧត្តម ស៊ុន ចាន់ថុល ក៏បានគូសបញ្ជាក់អំពី វឌ្ឍភាពបន្តនៃកំណែទម្រង់សេដ្ឋកិច្ចរបស់កម្ពុជា និងការជំរុញរបស់រដ្ឋាភិបាលឆ្ពោះទៅកាន់សេដ្ឋកិច្ចបរិស្ថានានុគ្រោះ និងពោរពេញដោយនវានុវត្តន៍។ អាទិភាពទាំងនេះ ដើរស្របជាមួយការប្តេជ្ញាចិត្តយុទ្ធសាស្ត្ររបស់ធនាគារជាតិកាណាដា ទៅលើការអភិវឌ្ឍប្រកបដោយចីរភាព តាមរយៈក្រុមហ៊ុនបុត្រសម្ពន្ធរបស់ខ្លួន គឺ ធនាគារ ABA ដែលជាធនាគារស្ថិតក្នុងចំណោមធនាគារដែលរីកចម្រើនលឿនបំផុតក្នុងប្រទេសកម្ពុជា ។
សម្រាប់ធនាគារជាតិកាណាដា ជំនួបនេះបានបញ្ជាក់កាន់តែច្បាស់បន្ថែមទៀតនូវភាពជឿជាក់របស់ខ្លួនមកលើទិដ្ឋភាពហិរញ្ញវត្ថុរបស់ប្រទេសកម្ពុជា និងការប្តេជ្ញាចិត្តទៅលើភាពជាដៃគូយូរអង្វែងតាមរយៈ ABA ។ ការធ្វើពាណិជ្ជកម្មទ្វេភាគីរវាងប្រទេសកាណាដា និងប្រទេសកម្ពុជាកើនឡើងលើស 1 ប៊ីលានដុល្លារអាមេរិក សម្រាប់បីត្រីមាសដំបូង គិតត្រឹមត្រីមាសទី 3 ក្នុងឆ្នាំ 2025 ដែលស្ដែងឲ្យឃើញកាន់តែច្បាស់ពីសន្ទុះនៃកិច្ចសហការស៊ីជម្រៅរវាងប្រទេសទាំងពីរ ។
ជំនួបនេះ ក៏ជាព្រឹត្តិការណ៍ 2 ឆ្នាំជាប់ៗគ្នាដែលគណៈប្រតិភូវិនិយោគកម្ពុជា បានធ្វើទំនាក់ទំនងដោយផ្ទាល់ជាមួយធនាគារជាតិកាណាដា – ជាសក្ខីភាពដ៏ស៊ីជម្រៅនៃភាពជាដៃគូរវាងប្រទេសទាំងពីរ។ ក្នុងដំណើរនេះ ធនាគារ ABA បានដើរតួយ៉ាងសកម្មក្នុងការសម្របសម្រួល និងទំនាក់ទំនងរវាងភាគីពាក់ព័ន្ធក្នុងប្រទេសកម្ពុជា ជាមួយគ្រឹះស្ថាននានាក្នុងប្រទេសកាណាដា ។
ដំណើររបស់ ABA ស្របជាមួយចក្ខុវិស័យអភិវឌ្ឍយូអង្វែងរបស់ប្រទេសកម្ពុជា។ ខណៈពេលដែលប្រទេសជាតិបន្តពង្រឹងទិដ្ឋភាពវិនិយោគរបស់ខ្លួន និងពង្រីកដៃគូសហការលើសកលលោក ធនាគារ ABA បន្តប្តេជ្ញាចិត្តពង្រឹងវិស័យធនាគារ ប្រកបដោយភាពរឹងមាំខ្លាំងក្លា មានបរិយាបន្ន និងមាននវានុវត្ត – ដែលបន្តជំរុញវឌ្ឍនភាពក្នុងប្រទេសកម្ពុជា និងពង្រឹងភាពជាដៃគូរវាងប្រទេសទាំងពីរ ។
អំពីធនាគារជាតិកាណាដា
គិតត្រឹមថ្ងៃទី31 ខែកក្កដា ឆ្នាំ 2025 ជាមួយទ្រព្យសកម្មជាទឹកប្រាក់ចំនួន 400 ប៊ីលានដុល្លារអាមេរិក ធនាគារជាតិកាណាដា បានក្លាយជាធនាគារមួយក្នុងចំណោមធនាគារទាំង 6 ដែលមានសារសំខាន់ជាប្រព័ន្ធ ក្នុងប្រទេសកាណាដា។ ធនាគារ មានបុគ្គលិកប្រមាណ 34,000 នាក់ ដែលស្ថិតនៅក្នុងតួនាទីដែលត្រូវការចំណេះដឹងខ្ពស់ និងដំណើរការតាមរយៈប្រភេទធុរកិច្ច 3 ផ្នែក រួមមាន ធនាគារសម្រាប់រូបវន្តបុគ្គល និងធុរកិច្ច, ការគ្រប់គ្រងទឹកប្រាក់, និងទីផ្សារហិរញ្ញវត្ថុ។ ផ្នែកទី 4 ជា ជំនាញអន្តរជាតិ និងហិរញ្ញវត្ថុឯកទេសអាមេរិក ដែលបានបំពេញបន្ថែមទៅលើកំណើននៃប្រតិបត្តិការក្នុងស្រុក។ មូលបត្ររបស់ធនាគារ បានចុះបញ្ចីក្នុងផ្សារហ៊ុនតូរ៉ូនតូ (TSX:NA)។ សូមឈ្វេងយល់បន្ថែមអំពីសកម្មភាពរបស់ធនាគារ តាមគេហទំព័រ nbc.ca ឬបណ្តាញសង្គមផ្សេងៗ ៕ អត្ថបទសហការ
ចែករំលែកព័តមាននេះ