ប្រទេសជប៉ុន ៖ កញ្ញា យូកា គីណូស៊ីតា (Yuka Kinoshita) ដែលជាបុគ្កលមានឥទ្ធិពលលើការប្រកួតញ៉ាំ ក៏ដូចជាតារាយូធូបដែលផលិតវីដេអូញ៉ាំអាហារជនជាតិជប៉ុនដ៏ល្បី បានប្រកាសត្រឡប់ទៅផលិតវីដេអូញ៉ាំរបស់ខ្លួនឡើងវិញ…
ប្រទេសជប៉ុន ៖ កញ្ញា យូកា គីណូស៊ីតា (Yuka Kinoshita) ដែលជាបុគ្កលមានឥទ្ធិពលលើការប្រកួតញ៉ាំ ក៏ដូចជាតារាយូធូបដែលផលិតវីដេអូញ៉ាំអាហារជនជាតិជប៉ុនដ៏ល្បី បានប្រកាសត្រឡប់ទៅផលិតវីដេអូញ៉ាំរបស់ខ្លួនឡើងវិញ ក្រោយបាត់មុខពីបណ្តាញសង្គមអស់រយៈពេលជាច្រើនខែ ដោយសារតែរងការជេរប្រមាថ និងការគំរាមកំហែងគ្រប់រូបភាពតាមអ៊ីនធឺណិត។ នេះបើតាមប្រភពពីកាសែត South China Morning Post ចេញផ្សាយនៅថ្ងៃទី៣ ខែកញ្ញា ឆ្នាំ២០២៤។
ប្រភពដដែលបានឱ្យដឹងថា កាលពីថ្ងៃទី២៤ សីហា កន្លងទៅ ពោល៧ខែបន្ទាប់ពីបាត់មុខពីអ៊ីនធឺណិត យូកា គីណូស៊ីតា បានបង្ហោះសារមួយលើបណ្តាញសង្គម X អតីត Twitter ថា កញ្ញាបានធូរស្រាលច្រើនហើយពីជំងឺបាក់ទឹកចិត្តធ្ងន់ធ្ងរ ហើយនឹងចាប់ផ្តើមការងារឡើងវិញជាបណ្តើរៗ នៅពេលដែលមានអារម្មណ៍ថាអាចធ្វើទៅបាន។
យូកា គីណូស៊ីតា អាយុ៣៩ឆ្នាំ ដែលញ៉ាំអាហារមួយដងស្មើនឹងមនុស្ស២ទៅ៣នាក់ បានឱ្យដឹងថា កញ្ញាខ្លាចមិនហ៊ានមើលសារតាមបណ្តាញសង្គមទាំងជាសាធារណៈ ឬឯកជន ដោយសារតែបញ្ហាសុខភាពផ្លូវចិត្តធ្ងន់ធ្ងរ ដែលបង្កឡើងដោយមតិអវិជ្ជមានដ៏ច្រើន ដែលកញ្ញាទទួលបានពីមុន។ កញ្ញាក៏មានការភ័យខ្លាចក្នុងការចូលរួមសកម្មភាពសង្គមដោយផ្ទាល់ខ្លួន ដូច្នេះហើយបានជាស្នាក់នៅតែក្នុងផ្ទះអស់រយៈពេលរាប់ខែ។ យូកា គីណូស៊ីតា ជាបុគ្គលមានឥទ្ធិពល និងល្បីល្បាញបំផុតរបស់ពិភពលោក នៅលើការផលិតវីដេអូពាក់ព័ន្ធការញ៉ាំអាហារដ៏ឈ្ងុយឆ្ងាញ់ ពិសេសការញ៉ាំនៅក្នុងបរិមាណដ៏ច្រើនខុសប្លែកពីមនុស្សធម្មតា ដែលប្រៀបដូចជាក្រពះយក្ស។
កញ្ញា យូកា គីណូស៊ីតា មានអ្នកចុច Subscribe ជាង ៥.២លាននាក់នៅលើកម្មវិធីយូធូប (YouTube) និង ២២៧,០០០នាក់ នៅលើបណ្តាញសង្គម X ។ ឈ្មោះរបស់តារាអនឡាញដែលកើតនៅក្នុងទីក្រុងគីតាគីស៊ូ (Kitakyushu) ខេត្តហ្វូគូអូកា (Fukuoka) រូបនេះ បានលេចឡើងដំបូងក្នុងឆ្នាំ ២០០៩ នៅកម្មវិធីប្រកួតប្រជែងញ៉ាំអាហាររបស់ជប៉ុន The Battle of Big Eaters ដោយមានការចូលរួមពីបេក្ខជន បេក្ខនារី និងម្ចាស់ជើងឯកកំពូលអ្នកញ៉ាំអាហារជាច្រើននាក់ផ្សេងទៀត។ គីណូស៊ីតា បានចាប់ផ្តើមផលិតវីដេអូអនឡាញនៅក្នុងឆ្នាំ ២០១៤ ដោយបានបង្ហោះវីដេអូញ៉ាំអាហារ ឬ Mukbang ដោយទទួលបានការចាប់អារម្មណ៍ និងការគាំទ្រយ៉ាងច្រើនពីទស្សនិកជន។
ប៉ុន្តែទោះយ៉ាងណាក៏ដោយ អ្នកមិនពេញចិត្ត និងបង្ខូចកេរ្តិ៍ឈ្មោះ គីណូស៊ីតា បានបង្ហោះមតិរិះគន់ និងប្រមាថលើអ៊ីនធឺណិត ដោយនិយាយថា នាងមើលទៅធាត់ និងចាស់ ហើយនាងលែងញ៉ាំច្រើនដូចកាលពីមុនទៀតហើយ។ ពួកអ្នកប្រកួតប្រជែងញ៉ាំប្រឈមមុខនឹងហានិភ័យដ៏ធំចំពោះសុខភាពពួកគេ ហើយជួនកាលរបៀបរស់នៅរបស់ពួកគេនាំទៅរកការស្លាប់មុនអាយុ។ ដោយពួកគេលើកឡើងអំពីរឿងរ៉ាវកាលពីឆ្នាំមុន ដែលតារាយូធូបដ៏ល្បីខាងញ៉ាំអាហារជនជាតិជប៉ុន កញ្ញា ឈីណារី តាកាហាស៊ី (Chinari Takahashi) បានទទួលមរណភាពក្នុងអាយុ៣០ឆ្នាំ បន្ទាប់ពីមានជំងឺផ្លូវចិត្តបាត់បង់ចំណង់អាហារ និងការញៀនស្រាអស់ជាច្រើនខែ៕ (ប្រភព ៖ South China Morning Post)
ចែករំលែកព័តមាននេះ