ខេត្តកំពង់ឆ្នាំង ៖ ទារិកាអាយុ៨ខែម្នាក់បានស្លា.ប់ពេលដឹកទៅសង្គ្រោះនៅមន្ទីរពេទ្យខេត្ត និងមនុស្សប្រុសស្រី៤នាក់ទៀត រងរបួសធ្ងន់និងស្រាល ក្នុងហេតុការណ៍គ្រោះថ្នាក់ចរាចរណ៍មួយ
ខេត្តកំពង់ឆ្នាំង ៖ ទារិកាអាយុ៨ខែម្នាក់បានស្លាប់ពេលដឹកទៅសង្គ្រោះនៅមន្ទីរពេទ្យខេត្ត និងមនុស្សប្រុសស្រី៤នាក់ទៀត រងរបួសធ្ងន់និងស្រាល ក្នុងហេតុការណ៍គ្រោះថ្នាក់ចរាចរណ៍មួយបង្កឡើងដោយសារតែរថយន្តក្រុងមួយគ្រឿងព្យាយាមបើកជែងវ៉ារថយន្តមួយគ្រឿងទៀតរួចជ្រុលទៅបុកម៉ូតួសណ្តោងរ៉ឺម៉ក កាលពីវេលាម៉ោង១០និង២០នាទីព្រឹកថ្ងៃទី១៥ មីនា នៅលើកំណាត់ផ្លូវជាតិលេខ៥ ស្ថិតនៅក្នុងភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង ។
មន្ត្រីសមត្ថកិច្ចនគរបាលក្រុងកំពង់ឆ្នាំង បានឱ្យដឹងថា មុនពេលកើតហេតុ មានម៉ូតូមួយគ្រឿងម៉ាកស្មាស់រីវ៉ូ ពណ៌បៃតង មានសណ្តោងរ៉ឺម៉កពីក្រោយដែលមានមនុស្សជិះសរុប៤នាក់ បើកបរដោយបុរសឈ្មោះ ថន សុខខៃ អាយុ៣៣ឆ្នាំ ពីត្បូងទៅជើង លុះពេលមកដល់ចំណុចកើតហេតុ ស្រាប់តែមានរថយន្តក្រុងមួយគ្រឿង បើកបរដោយជនពុំស្គាល់ឈ្មោះ ទិសដៅពីជើងទៅត្បូង ដោយព្យាយាមបើកជែងវ៉ារថយន្តមួយគ្រឿងទៀតក៏ជ្រុលចង្កូតទៅបុកម៉ូតូសណ្តោងរ៉ឺម៉កពេញទំហឹង បណ្តាលអ្នកជិះក្នុងរ៉ឺម៉ករងរបួសធ្ងន់និងស្រាល ត្រូវបានដឹកទៅសង្គ្រោះនៅមន្ទីរពេទ្យខេត្ត តែជាអកុសលទារិកាម្នាក់បានស្លាប់ក្នុងមន្ទីរពេទ្យ ។
ប្រភពដដែលបានបន្តថា ទារិកាដែលស្លាប់ ឈ្មោះ ខុន សុវណ្ណា អាយុ៨ខែ ។ ចំណែកអ្នករងរបួសទាំង៤នាក់ មាន ១-ឈ្មោះ ផាន់ សម្បតិ្ត អាយុ១៧ឆ្នាំ ២-ឈ្មោះ ស៊ី្រម តយ អាយុ១៧ឆ្នាំ ៣-ឈ្មោះ ថន សុខខៃ អ្នកបើកម៉ូតូ និង៤-ឈ្មោះ ស៊ន ចាន់ស៊ី អាយុ២៨ឆ្នាំ ជាប្រពន្ឋថន សុខខៃ ។ អ្នករងគ្រោះទាំងអស់មានទីលំនៅភូមិកំពង់ខ្លាញ់ ឃុំជលសារ ស្រុកជលគីរី ។
ក្រោយពេលកើតហេតុ អ្នកបើកបររថយន្តក្រុងបានព្យាមបើករត់រហូតដល់មុខសាលាស្រុកបរិបូរណ៍ក៏ឈប់រថយន្តរួចចុះរត់គេចខ្លួនបាត់ស្រមោល ។ ចំណែករថយន្តនិងម៉ូតូសណ្តោងរ៉ឺម៉ក ត្រូវបានសមត្ថកិច្ចនាំយកទៅរក្សាទុក ដើម្បីរង់ចាំការដោះស្រាយតាមនីតិវិធី ៕
ចែករំលែកព័តមាននេះ