ប្រទេសម៉ាឡេស៊ី ៖ ចាប់តាំងពីទសវត្សរ៍៧០រហូតមកដល់បច្ចុប្បន្ននេះ ប្រទេសម៉ាឡេស៊ីបានរៀបចំយុទ្ធសាស្ត្របង្កើតបណ្ដាញទំនាក់ទំនងក្នុងស្រុកចំនួន១៤ការិយាល័យ និង២២មជ្ឈមណ្ឌលព័ត៌មានទេសចរណ៍ ព្រមទាំងរៀបចំបណ្ដាញទំនាក់ទំនងអន្តរជាតិបានចំនួន៣៥ការិយាល័យ និង៨ការិយាល័យទីផ្សារ ។ ចំណែកនៅប្រទេសកម្ពុជាបានចាប់ផ្ដើមបង្កើតការិយាល័យទំនាក់ទំនងទីផ្សារឡើងនៅឆ្នាំ២០០៤ ។ ការបង្កើតបណ្ដាញគ្រប់ទិសទីបែបនេះ ក្នុងគោលបំណងដើម្បីស្រូបយកកំណើនភ្ញៀវទេសចរ និងពង្រីករយៈពេលនៃការស្នាក់ ព្រមទាំងបង្កើនការចំណាយជាមធ្យមរបស់ភ្ញៀវទេសចរនៅក្នុងប្រទេសរបស់ខ្លួន ។
កាលពីឆ្នាំមុនមានភ្ញៀវទេសចរខ្មែរបានធ្វើដំណើរទៅកាន់ប្រទេសម៉ាឡេស៊ី ចំនួន៧៥.០០០នាក់ ពោលគឺមានអត្រា១,៦% ក្នុងរយៈពេលដូចគ្នា បើធៀបនឹងឆ្នាំ២០១៤ ។
អគ្គនាយករងនៃក្រុមប្រឹក្សាម៉ាឡេស៊ី លោក Datuk Azizan Noordin បានលើកឡើងថា ៖ « ម៉ាឡេស៊ីនឹងទាក់ទាញភ្ញៀវទេសចរខ្មែរបន្តទៀត ហើយរំពឹងថា ភ្ញៀវទេសចរនឹងកើនឡើងចំនួន៨០.០០០នាក់នៅឆ្នាំនេះ » ។
ក្នុងរយៈពេល២-៣ឆ្នាំចុងក្រោយនេះ ប្រទេសម៉ាឡេស៊ីបានផ្សព្វផ្សាយអំពីទេសចរណ៍របស់ខ្លួនយ៉ាងខ្លាំងនៅកម្ពុជា ដូចជា ការបង្ហាញនៅតាមដងផ្លូវ ជាពិសេស នៅក្នុងពិធីបុណ្យផ្លាស់ប្តូរព័ត៌មានអាស៊ាន ដែលធ្វើកិច្ចសហប្រតិបត្តិការជាមួយសមាគមទេសចរណ៍ម៉ាឡេស៊ី ។ ការធ្វើសកម្មភាពផ្សព្វផ្សាយអំពីតំបន់ទេសចរណ៍របស់ម៉ាឡេស៊ីនេះ គឺជាការខិតខំប្រឹងប្រែងដើម្បីទាក់ទាញភ្ញៀវទេសចរណ៍ពីបណ្តាប្រទេសអាស៊ាន ជាពិសេស ទីផ្សារទេសចរណ៍ជនជាតិខ្មែរតែម្តង ។
អគ្គនាយករងនៃសមាគមទេសចរណ៍ម៉ាឡេស៊ី លោក Uzaidi Udanis បានបង្ហាញថា ៖ « សមាគមបានរៀបចំវគ្គសិក្សាសម្រាប់ការធ្វើជំនួញក្នុងទីផ្សារកម្ពុជា ដែលចូលរួមដោយភ្នាក់ងារទេសចរណ៍កម្ពុជាចំនួន២០ និងភ្នាក់ងារទេសចរណ៍ក្នុងស្រុករបស់ម៉ាឡេស៊ីចំនួន២០ ។ វគ្គសិក្សារយៈពេលកន្លះថ្ងៃនេះ នឹងបើកឱកាសថ្មីដល់ភ្ញៀវទេសចរម៉ាឡេស៊ី ក្នុងការធ្វើកិច្ចពិភាក្សាពីការធ្វើជំនួញថ្មី ព្រមទាំងបង្កើនភ្ញៀវទេសចរថ្មីក្នុងប្រទេសម៉ាឡេស៊ី ។ ជាងនេះទៀត ភ្នាក់ងារទេសចរណ៍ធំៗរបស់កម្ពុជា ក៏បានធ្វើដំណើរទៅទស្សនកិច្ចនៅម៉ាឡាកា និងកូឡាំពួរ ដើម្បីស្វែងរកផលិតផលទេសចរណ៍ថ្មីផងដែរ » ។
លោក Uzaidi Udanis បន្តថា ៖ « ការចុះឈ្មោះវីសាតាមរយៈប្រព័ន្ធអេឡិចត្រូនិក បានទាក់ទាញភ្ញៀវទេសចរចិនជាង១ម៉ឺននាក់មកកម្សាន្តនៅប្រទេសម៉ាឡេស៊ី នៅក្នុងសប្តាហ៍នេះ។ ជាក់ស្តែង ភ្ញៀវទេសចរចិនបានចំណាយប្រាក់យ៉ាងតិច ក៏១.៧២៣ដុល្លារដែរសម្រាប់ដំណើរកម្សាន្តរយៈពេល៥ថ្ងៃ ជាហេតុធ្វើឲ្យភ្នាក់ងារទេសចរណ៍ ម្ចាស់ភោជនីយដ្ឋាន និងមជ្ឈមណ្ឌលលក់ទំនិញរបស់ម៉ាឡេស៊ី ទទួលបានចំណូលពីវិស័យទេសចរណ៍នេះ » ។
លោកបន្ថែមថា ៖ « ការកើនឡើងនៃការចំណាយរបស់ភ្ញៀវទេសចរចិន គួរតែលើកទឹកចិត្តដល់សហគ្រាសធុនតូចនិងមធ្យម ក៏ដូចជាលើកស្ទួយផលិតផលក្នុងស្រុករួមមាន កាហ្វេ និងសម្បុកសត្វ ដែលផលិតផលនេះពេញនិយមនៅប្រទេសចិន ។ ដូច្នេះ សហគ្រាសទាំងនោះគួរត្រូវបានលើកទឹកចិត្តដល់ការជ្រៀតចូលក្នុងទីផ្សារចិន ឲ្យកាន់តែមានប្រសិទ្ធភាព » ។
គួរបញ្ជាក់ថា ប្រទេសម៉ាឡេស៊ីបានដាក់ទិសដៅស្រូបយកចំណូលពីវិស័យទេសចរណ៍ឲ្យបាន១៦៨ប៊ីលានរីងហ្គីត នៅឆ្នាំ២០២០ ។
តាមរយៈការផ្ដល់សម្ភាសន៍ជាមួយអ្នកយកព័ត៌មានកោះសន្ដិភាពនៅឯពហុកីឡដ្ឋាន Sepang International Circuit កាលពីចុងខែតុលា ឆ្នាំ២០១៥ លោក Y. Bhg. Dato Hj. Azizan Norrdin អគ្គនាយករងផ្នែកផ្សព្វផ្សាយអន្តរជាតិ នៃវិស័យទេសចរណ៍ម៉ាឡេស៊ី បានថ្លែងថា ៖ « ភ្ញៀវទេសចរអន្តរជាតិដែលបានមកទស្សនានៅម៉ាឡេស៊ី នឹងកើនឡើងយ៉ាងពិតប្រាកដ ព្រោះយើងបានរៀបចំព្រឹត្តិការណ៍ធំៗប្រចាំឆ្នាំចំនួន៥០ ដូចជា ពិធីបុណ្យវប្បធម៌ប្រពៃណីជាតិ និងអន្តរជាតិសំខាន់ៗ ព្រឹត្តិការណ៍ប្រណាំងរថយន្ត Formula 1 ការប្រណាំង MotorGP អន្តរជាតិ ការជិះម៉ូតូបោះជុំ និងកម្មវិធីពិសេសៗជាច្រើនទៀត ដើម្បីស្វាគមន៍ដំណើរកម្សាន្ដរបស់ភ្ញៀវទេសចរពីជុំវិញពិភពលោក ។ ជាមួយគ្នានេះ នៅឆ្នាំ២០២០ខាងមុខ យើងបានដាក់ទិសដៅថា នឹងប្ដេជ្ញាសម្រេចឲ្យបាននូវកំណើនភ្ញៀវទេសចរមកទស្សនានៅម៉ាឡេស៊ីចំនួន៣៦លាននាក់ និងស្រូបយកចំណូលឲ្យបានចំនួន១៦៨ប៊ីលានរីងហ្គីត» ៕
ចែករំលែកព័តមាននេះ