រាជធានីភ្នំពេញ ៖ កាលពីវេលាម៉ោង០៣ និង៣០នាទីរសៀលថ្ងៃទី០៧ មីនា ២០១៦ នេះ ស្ថិតនៅចំណុចផ្សារមាន់អាំង តាមបណ្តោយផ្លូវលេខ៣១៥ ក្នុងសង្កាត់បឹងកក់២ ខណ្ឌទួលគោក មានការភ្ញាក់ផ្អើលមួយ បន្ទាប់ពីរថយន្តម៉ាកកូរ៉ូឡាមួយគ្រឿងបានបើកចេញពីផ្ទះជាប់ហ្គែរ ក៏ជ្រុលទៅបុករថយន្តម៉ាកកាមរីមួយគ្រឿងទៀតកំពុងបើក ហើយរថយន្តកាមរីនោះ ក៏បន្តបុករ៉ឺម៉កម៉ូតូមួយគ្រឿងកំពុងឈប់ដាក់អីវ៉ាន់ និងបុករុលចូលក្នុងផ្ទះលក់ចាប់ហួយទៀត ។ តែក្នុងហេតុការណ៍នេះ មិនបណ្តាលឱ្យមនុស្សណាម្នាក់រងគ្រោះថ្នាក់នោះទេ គ្រាន់តែបង្កកកស្ទះចរាចរណ៍តែប៉ុណ្ណោះ ។
ប្រភពឱ្យដឹងថា រថយន្តម៉ាកកាមរីឆ្លាម ពណ៌ទឹកមាស ពាក់ស្លាកលេខភ្នំពេញ 2M-5634 រីឯរថយន្តម៉ាកកូរ៉ូឡា ពណ៌ទឹកប៊ិច ពាក់ស្លាកលេខភ្នំពេញ 2A-0511 ខូចផ្នែកខាងមុខយ៉ាងដំណំ ។ បច្ចុប្បន្ន កម្លាំងនគរបាលចរាចរណ៍កំពុងចុះត្រួតពិនិត្យកន្លែងកើតហេតុ និងវាស់វែង ដើម្បីធ្វើការដោះស្រាយគ្នា ។
ចែករំលែកព័តមាននេះ