រាជធានីភ្នំពេញ ៖ បច្ចុប្បន្នមានបងប្អូនប្រជាពលរដ្ឋខ្មែរយើងជាច្រើននាក់ បាននិងកំពុងប្រើប្រាស់សេវារបស់ធនាគារវឌ្ឍនៈអាស៊ីចំកាត់ “ABA” ដោយពួកគាត់អាចធ្វើប្រតិបត្តិការសេវាធនាគារដោយខ្លួនឯង ដូចជាវេរលុយ បង់វិក័យបត្រផ្សេងៗ និងទិញទំនិញតាមអនឡាញជាដើម ។…
រាជធានីភ្នំពេញ ៖ បច្ចុប្បន្នមានបងប្អូនប្រជាពលរដ្ឋខ្មែរយើងជាច្រើននាក់ បាននិងកំពុងប្រើប្រាស់សេវារបស់ធនាគារវឌ្ឍនៈអាស៊ីចំកាត់ “ABA” ដោយពួកគាត់អាចធ្វើប្រតិបត្តិការសេវាធនាគារដោយខ្លួនឯង ដូចជាវេរលុយ បង់វិក័យបត្រផ្សេងៗ និងទិញទំនិញតាមអនឡាញជាដើម ។ ក្នុងនោះដែរ ក៏មានបងប្អូនមួយចំនួន ធ្លាប់ផ្ទេរប្រាក់ខុសកុង ដោយសារតែមិនបានពិនិត្យលេខ និងឈ្មោះគណនីមួយទៀត ឲ្យបានច្បាស់លាស់ ។
ជាក់ស្តែង ម្ចាស់គណនីហ្វេសប៊ុក ដែលមានឈ្មោះ គុជ ប៊ុណ្ណារិទ្ធ បានសរសេរកាលពីថ្ងៃទី២៨ សីហា ២០២១ថា ៖ «ប្រាក់ក៏បង់-ថង់ក៏ដាច ។ កាលពីថ្ងៃទី២៥ កញ្ញា ២០២១ បងស្រីរបស់ខ្ញុំ បានផ្ទេរលុយច្រឡំលេខកុង ដោយសារគាត់មិនចេះភាសាបរទេស ។ ភ្លាមៗបងស្រីខ្ញុំ បានទូរសព្ទមកខ្ញុំឲ្យជួយ តែខ្ញុំអសមត្ថភាព គាត់ក៏ទូរសព្ទទៅធនាគារ ABA ហើយក៏បានទៅធនាគារ នៅកែងស្តុបសាលាសន្ធរម៉ុក ដោយស្នើសុំឲ្យភាគី អ្នកដែលទទួលបាន(លុយច្រឡំ)ឈ្មោះ Prum Panha សូមជួយផ្ទេរប្រាក់ត្រឡប់មកវិញ ។ នៅពេល បងស្រីខ្ញុំបានទៅដល់ធនាគារ ABA នៅវេលាម៉ោង០២និង៥២នាទីរសៀលថ្ងៃទី២៨ ខែឆ្នាំដដែល នៅបញ្ជរលេខ១៦ និងបានជួបភ្នាក់ងារ សួរនាំ ។ បន្ទាប់ពីភ្នាក់ងារបំពេញឯកសាររួចហើយ បានប្រាប់មកបងស្រីខ្ញុំ (kuch bunlim) ថា ត្រូវចំណាយប្រាក់អស់ ៥០ដុល្លារ ។ បងស្រីខ្ញុំគាត់មិនមានលុយទេ ភ្នាក់ងារនោះ ក៏ហែកឯកសារចោលនៅនឹងមុខបងស្រីខ្ញុំតែម្តង (ក្រុមហ៊ុនមានកាម៉េរ៉ា អាចឆែកមើលបាន) ។ តើកាយវិការនេះ បងប្អូនគិតថា ជាសីលធម៌ល្អដែរឬទេ ? ខ្ញុំឈឺចាប់ជំនួសបងស្រីខ្ញុំ ដែលត្រូវបានគេមើលងាយ ទើបផុស ដើម្បីផ្ញើជូនអតិថិជនដែលជួបបញ្ហាដូចខាងលើ សូមមេត្តាមានការខន្តីខ្ពស់ ពុំនោះទេ មុខជាបាត់លុយហើយ ត្រូវឈ្លោះគ្នាមួយតង់ទៀត ដូចសុភាសិតមួយពោលថា ប្រាក់ក៏បង់ ថង់ក៏ដាច» ។
ក្នុងករណីអ្នកផ្ញើរប្រាក់ ខុសគណនី ដូចបានរៀបរាបខាងលើ តើអ្នកត្រូវធ្វើបែបណា ?
បើដឹងថា អ្នកវេរលុយខុសគណនី អ្វីដែលអ្នកត្រូវធ្វើភ្លាមៗគឺ ធ្វើការទំនាក់ទំនងទៅកាន់ធនាគារ ABA តាមរយៈលេខទូរស័ព្ទ 023 225 333 បានគ្រប់ពេលវេលា ឬឆាតទៅកាន់ហ្វេសប៊ុកផេករបស់ធនាគារ ABA ដើម្បីប្រាប់ពីបញ្ហារបស់អ្នក ដូចជាប្រាប់ឈ្មោះ និងគណនីធនាគារដែលអ្នកបានផ្ញើរច្រឡំ ។
ពេលអ្នកបានទាក់ទងទៅធនាគារផ្ដល់ដំណឹងពីបញ្ហារបស់អ្នកហើយ ធនាគារនឹងធ្វើការបង្កក គណនីមួយទៀតដែលបានទទួលលុយរបស់អ្នក ដើម្បីកុំឲ្យគណនីនោះ ដកលុយអ្នកយកទៅចាយអស់ ។
បន្ទាប់មកអ្នកត្រូវទៅកាន់សាខាធនាគារ ដើម្បីបំពេញបែបបទ ស្នើសុំនូវចំនួនទឹកលុយ ដែលអ្នកបានផ្ញើរច្រឡំ ដោយទៅភ្ជាប់ជាមួយអត្តសញ្ញាណប័ណ្ណច្បាប់ដើម ឬលិខិតឆ្លងដែន ជាដើម ។
បើនិយាយពីលក្ខខណ្ឌរបស់ធនាគារវឌ្ឍនៈអាស៊ីចំកាត់ ABA វិញ រាល់ការដាក់សំណើរស្នើសុំប្រាក់ដែលផ្ទេរខុស មកវិញ ខាងធនាគារនឹងគិតកម្រៃសេវា ក្នុងការធ្វើការបង្កក នូវទឹកប្រាក់ដែលអ្នកវេរច្រឡំទៅលើភាគីម្ខាងទៀតដើម្បីកុំឲ្យគេយកលុយ ដែលអ្នកវេរច្រឡំនោះ ទៅប្រើប្រាស់អស់ ។
កម្រៃសេវា ក្នុងការធ្វើការបង្កកនេះ ខាងធនាគារគេគិត ២.៥% នៃទឹកប្រាក់ដែលអ្នកបានវេរច្រឡំ ឬក៏ទាប់បំផុត ចំនួន៥០ដុល្លារ ។ ដូច្នេះបើអ្នកច្រឡំវេរលុយខុសកុងនូវទឹកប្រាក់៥០ដុល្លារចុះក្រោម ប្រហែលជាមិនអាចទទួលបានលុយវេរច្រឡំមកវិញបានឡើយ (ស្មើនឹងបាត់បង់លុយនោះហើយ) ។ ឧទាហរណ៍ បើអ្នកវេរលុយច្រឡំ៥០ដុល្លារ តើអ្នកសុខចិត្តបង់ថ្លៃសេវាបង្កក់៥០ដុល្លារ ដើម្បីយកលុយ៥០ដុល្លារមកវិញទេ ។ បើអ្នកធ្វើបែបនេះមែនអ្នកមានតែខាតបង់ពេលវេលា ធ្វើដំណើរទៅធនាគារ និងរងចាំបន្ថែមទៀតនោះទេ ។
ទាក់ទងនឹងកម្រៃសេវាបង្កក់ ២.៥% នៃទឹកប្រាក់ដែលអ្នកបានវេរច្រឡំ ឬក៏ទាប់បំផុតចំនួន៥០ដុល្លារនេះ គឺអ្នកត្រូវបង់ថ្លៃ ប្រាក់សុទ្ធទៅខាងធនាគារភ្លាមៗ នៅពេលអ្នកទៅដាក់ពាក្យស្នើសុំលុយដែលបានវេរច្រឡំ ។
នៅពេលអ្នកបានបំពេញបែបបទស្នើសុំលុយវិញ អ្នកអាចទទួលលុយមកវិញបានលឿន បើសិនម្ចាស់គណនីដែលអ្នកច្រឡំផ្ញើរនោះ(ចិត្តល្អ) វេរលុយមកឲ្យអ្នកវិញ ។ តែបើម្ចាស់គណនីដែលទទួលលុយមិនផ្ញើរលុយមកទេ អ្នកត្រូវរងចាំតាមពេលរយៈ ដែលធនាគារបានកំណត់ ក្នុងការទទួលបានលុយអ្នកមកវិញ (អាចពី៣០ថ្ងៃ ទៅ៩០ថ្ងៃ) ។
ចំពោះ អ្នកទទួលប្រាក់ ដែលគេផ្ទេរឲ្យច្រឡំ បើមិនឲ្យគេវិញ តើអាចមានទោសស្មើនឹងបទលួច ឬទេ ?
សំនួរនេះ យោងតាមគណនីហ្វេសប៊ុកឈ្មោះ Sotheara បានធ្វើការបកស្រាយថា «អំពើទទួលប្រាក់ដោយគ្មានមូលហេតុ (មានន័យយថា នៅស្ងៀមៗស្រាប់តែបាន) ដូចជាបុគ្គលអ្នកទទួលមិនបានផ្តល់សេវា ឬមិនបានប្រគល់ទំនិញឲ្យអ្នកផ្ទេរប្រាក់សោះ ឬ ប្រាក់ដែលផ្ទេរនោះមិនមែនជាអំណោយមកឲ្យខ្លួន អំពើនេះ បើតាមច្បាប់ គេហៅថា “សេចក្តីចម្រើនដោយឥតហេតុ” ។ អ្នកដែលទទួលប្រាក់ដែលគេផ្ទេរមកដោយច្រឡំ គឺជាអ្នកដែលទទួលសេចក្តីចម្រើនដោយឥតហេតុ ។ បុគ្គលដែលទទួលនោះ មានកាតព្វកិច្ចត្រូវប្រគល់ប្រាក់ដែលខ្លួនទទួលបានដោយចៃដន្យនោះ ឲ្យម្ចាស់ប្រាក់ដែលផ្ញើ/ផ្ទេរច្រឡំ នោះវិញ ។
យោងតាមបទប្បញ្ញត្តិ នៃមាត្រា៧៣៦ នៃក្រមរដ្ឋប្បវេណី បានចែងថា “ទោះបីជាគ្មានមូលហេតុលើផ្លូវច្បាប់ក៏ដោយ បុគ្គលដែលបានទទួលផលប្រយោជន៍ដោយសារទ្រព្យសម្បត្តិ ឬ ពលកម្មរបស់អ្នកដទៃ ហើយធ្វើឲ្យកើតមានការបាត់បង់ផលប្រយោជន៍ដល់អ្នកដទៃ ដោយសារការទទួលនោះ មានករណីយកិច្ចត្រូវសងផលប្រយោជន៍នោះ ត្រឹមកម្រិតដែលផលប្រយោជន៍នោះមាន” ។
មាត្រា៣៥៣ នៃក្រមព្រហ្មទណ្ឌ ចែងថា អំពើលួច គឺជាអំពើដកហូតដោយទុច្ចរិតនូវទ្រព្យសម្បត្តិ ឬ វត្ថុផ្សេងទៀតរបស់អ្នកដទៃ តាមគ្រប់មធ្យោបាយក្នុងគោលបំណងយកមកធ្វើជាកម្មសិទ្ធិរបស់ខ្លួន។
មាត្រា៣៥៦ នៃក្រមព្រហ្មទណ្ឌ កំណត់ថា អំពើលួច ត្រូវផ្តន្ទាទោសដាក់ពន្ធនាគារពី៦ខែ ទៅ៣ឆ្នាំ និងពិន័យជាប្រាក់ពី១លានរៀល ទៅ៦លានរៀល ។
សរុបមក អ្នកទទួលប្រាក់ដែលគេផ្ទេរមកដោយច្រឡំ ត្រូវតែផ្ទេរត្រឡប់ឲ្យទៅម្ចាស់ដើមវិញ ទោះបីម្ចាស់ប្រាក់ដឹងថា គេបានច្រឡំ ឬមិនទាន់ដឹងថាច្រឡំក៏ដោយ ដើម្បីចៀសវាងការទទួលខុសត្រូវតាមផ្លូវច្បាប់ជាយថាហេតុ» ។
អ៊ីចឹងទេ ចំពោះបងប្អូនដែលមានតម្រូវការផ្ទេរប្រាក់តាមកុងធនាគារ ដោយប្រើប្រាស់តាមទូរសព្ទដៃ (ABA Mobile App) សូមពិនិត្យឲ្យមែនទែន ព្រោះថា ការវេរលុយខុសកុងធនាគារ កើតមានច្រើនករណីរួចមកហើយ ។ ដោយឡែកបើអ្នកធ្លាប់ ទទួលប្រាក់ដែលគេផ្ទេរមកដោយច្រឡំ សូមបង្វិលប្រាក់នោះ ឲ្យម្ចាស់គេវិញផង ៕
ចែករំលែកព័តមាននេះ