អុចទានធូបថ្វាយគ្រូលើអាសនៈ ក្លាយជាអណ្តាតភ្លើងឆាបឆេះសន្ធោសន្ធៅ
- បន្ទាយមានជ័យ
ផ្ទះ០១ខ្នងត្រូវបានអណ្តាតភ្លើងលេបត្របាក់ឆាបឆេះយ៉ាងសន្ធោសន្ធៅ បង្កឲ្យមានការភ្ញាក់ផ្អើល
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ផ្ទះ០១ខ្នងត្រូវបានអណ្តាតភ្លើងលេបត្របាក់ឆាបឆេះយ៉ាងសន្ធោសន្ធៅ បង្កឲ្យមានការភ្ញាក់ផ្អើលកាលពីវេលាម៉ោង០៧និង៥០នាទីយប់ ថ្ងៃទី០១ ខែតុលា ឆ្នាំ២០២១ ស្ថិតនៅភូមិត្រពាំងថ្មខាងជើង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។
តាមប្រភពព័ត៌មានពីនគរបាលរដ្ឋបាលឃុំប៉ោយចារ បានឲ្យដឹងថា ផ្ទះដែលត្រូវបានព្រះអគ្គីឆាបឆេះខាងលើនេះ គឺធ្វើអំពីឈើប្រក់ស័ង្កសី ជញ្ជាំងក្តារ មានទំហំ០៧ម៉ែត្រគុណនឹង០៦ម៉ែត្រ ដែលមានម្ចាស់ឈ្មោះវី សាវ៉ៃ ភេទប្រុស អាយុ៥២ឆ្នាំ រស់នៅភូមិត្រពាំងថ្មខាងជើង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។
ប្រភពដដែលបានបញ្ជាក់ថា ម្ចាស់ផ្ទះខាងលើ គឺគាត់ជាអ្នកកាន់គ្រូ ហើយមុនពេលកើតហេតុ គាត់បានអុចទានធូបដើម្បីថ្វាយគ្រូនៅលើអាសនៈដែលបានរៀបចំនៅលើផ្ទះ រួចហើយមិនបាននៅមើលទានធូបនោះទេ ក៏ដើរទៅលេងផ្ទះអ្នកជិតខាងបាត់។ លុះពេលនោះ ភ្លើងទានធូបក៏បានឆាបឆេះបង្កឲ្យរាលដាលឆេះផ្ទះតែម្តង ។
ក្រោយពីទទួលបានព័ត៌មានភ្លាម កម្លាំងនគរបាលប៉ុស្តិ៍ និងកម្លាំងនគរបាលអធិការដ្ឋាន បានយករថយន្តពន្លត់អគ្គិភ័យ និងប្រជាពលរដ្ឋនៅក្បែរជួយអន្តរាគមន៍ពន្លត់អស់ទឹក២រថយន្ត ទើបភ្លើងរលត់ទៅវិញអស់ទាំងស្រុង ។ ចំណែកការខូចខាត គឺផ្ទះត្រូវភ្លើងឆេះអស់ប្រហែល២០% និងសម្លៀកបំពាក់ក៏ត្រូវភ្លើងឆេះអស់ដែរ តែមិនបង្កឲ្យមានគ្រោះថ្នាក់ដល់អាយុជីវិតមនុស្សឡើយ៕
ចែករំលែកព័តមាននេះ