រហូតមកដល់ថ្ងៃទី២៩ ខែកញ្ញា ឆ្នាំ២០២១នេះ ប្រជាពលរដ្ឋរស់នៅចំណុចបរថ្មី ភូមិបរតាំងស៊ូ សង្កាត់បរយ៉ាខា និងភូមិសួនអំពៅកើត សង្កាត់ប៉ៃលិន ក្រុងប៉ៃលិន កំពុងនាំគ្នាព្រួយបារម្ភយ៉ាងខ្លាំង
ខេត្តប៉ៃលិន ៖ រហូតមកដល់ថ្ងៃទី២៩ ខែកញ្ញា ឆ្នាំ២០២១នេះ ប្រជាពលរដ្ឋរស់នៅចំណុចបរថ្មី ភូមិបរតាំងស៊ូ សង្កាត់បរយ៉ាខា និងភូមិសួនអំពៅកើត សង្កាត់ប៉ៃលិន ក្រុងប៉ៃលិន កំពុងនាំគ្នាព្រួយបារម្ភយ៉ាងខ្លាំង ចំពោះមើមដំឡូងមីនៅក្នុងចំការរបស់ខ្លួន ដោយសារតែមេឃបង្អុរភ្លៀងរាល់ថ្ងៃ ធ្វើឱ្យរងការរលួយអស់មួយចំនួន ។
ប្រភពព័ត៌មានពីបុរសម្នាក់ ឈ្មោះ ម៉ៅ អាយុ៥៥ឆ្នាំ ដាំដំឡូងមី៤ហិកតា រស់នៅភូមិបរតាំងស៊ូ និងស្ត្រីម្នាក់ឈ្មោះ សាន សុខា អាយុ៥៧ឆ្នាំ ដាំដំឡូងមី៣ហិកតា រស់នៅភូមិសួនអំពៅកើត សង្កាត់ប៉ៃលិន ក្រុងប៉ៃលិន បានរៀបរាប់ឱ្យដឹងដូចៗគ្នាថា ៖ ដំឡូងមីរបស់ពួកគាត់ បានចាប់ផ្តើមដាំតាំងពីដើមខែមីនា ឆ្នាំ២០២១ ហើយរហូតមកដល់ពេលនេះ បានដុះលូតលាស់យ៉ាងល្អ ។ ប៉ុន្តែអ្វីដែលធ្វើឱ្យពួកគាត់មានការព្រួយបាម្ភនោះ ដោយសារតែទឹកភ្លៀងជោកជាំខ្លាំងពេក បណ្តាលឱ្យមើមដំឡូងមីត្រង់កន្លែងដីទំនាបមួយចំនួន កំពុងតែរលួយជាបណ្តើរៗហើយ។
ប្រភពបន្តទៀតថា បើសិនជាមេឃនៅតែបន្តធ្លាក់ភ្លៀងបែបនេះទៀត ទោះបីជានៅកន្លែងដីខ្ពស់ក៏អាចនឹងរងការរលួយដែរ ព្រោះដីក្នុងចំការសើមជារៀងរាល់ថ្ងៃ អស់រយ:ពេលជិត១ខែមកហើយ ។ លើសពីនេះ នៅក្នុងដីចម្ការផ្សេងទៀតរបស់ពួកគាត់ ក៏បានដាំពោតក្រហម ដោយកន្លែងខ្លះរងការជ្រួចទឹក បណ្តាលឱ្យស្លឹកពណ៌ក្រហម លុះកន្លែងដីខ្ពស់ គឺដុះលូតលាស់យ៉ាងល្អ ។ មើលទៅទាំងដំឡូងមី និងដំណាំពោតក្រហម គឺមិនទទួលបានផលផ្លែពេញលេញដូចឆ្នាំមុននោះទេ ព្រោះភ្លៀងរាល់ថ្ងៃខ្លាំងពេក ។
ទោះបីជាបានផលតិចជាងឆ្នាំមុន តែបើសិនជាតម្លៃទីផ្សារឡើងខ្ពស់ មិនមានការធ្លាក់ចុះ គាត់អាចប្រមូលផលលក់ដូរឱ្យឈ្មួញ សម្រាប់យកទៅសងជំពាក់បំណុលគេ មិនបារម្ភចំពោះជីវភាពខ្វះខាតនោះឡើយ ។ ម្យ៉ាងវិញទៀត បើសិនជានៅថ្ងៃប្រមូលផលតម្លៃទាប គ្រួសារគាត់នឹងកាន់តែជំពាក់បំណុលមីក្រូហិរញ្ញវត្ថុកាន់តែច្រើនឡើងៗ មិនងាយសងគេរួចនោះទេ ៕
ចែករំលែកព័តមាននេះ