ខេត្តសៀមរាប ៖ ប្រជាការពារភូមិម្នាក់ចូលម៉ាស្សាមិនទាន់បានម៉ាស្សាផង ស្រាប់តែដាច់ខ្យល់ស្លា.ប់នៅក្នុងហាងម៉ាស្សាមួយកន្លែងយីហោ«7777» បង្កឱ្យមានការភ្ញាក់ផ្អើលជាខ្លាំង ហើយពេលនោះត្រូវសមត្ថកិច្ចនិងមានក្រុមគ្រូពេទ្យចុះមកពិនិត្យដល់កន្លែងកើតហេតុ រួចធ្វើការពិនិត្យតេស្តសំកណាករកកូវីដ-១៩ភ្លាមៗដែរ ។ ហើយជាលទ្ធផល គឺជនរងគ្រោះក៏បានរកឃើញមានវិជ្ជមានកូវីដ១៩. ហេតុការណ៍កើតឡើងនៅវេលាម៉ោង១៦នាទីរសៀលថ្ងៃទី៣០ កញ្ញា ឆ្នាំ២០២១ ស្ថិតនៅភូមិទក្សិណខាងត្បូង សង្កាត់គោកចក ក្រុង/ខេត្តសៀមរាប ។
ជនរងគ្រោះមានឈ្មោះ នៅ ណាត អាយុ៦០ឆ្នាំ ជាប្រជាការពារភូមិ មានអាសយដ្ឋាននៅភូមិស្វាយដង្គំ សង្កាត់ស្វាយដង្គំ ក្រុងសៀមរាប ខេត្តសៀមរាប។
បើតាមសមត្ថកិច្ចនគរបាលការិយាល័យជំនាញខេត្តបានឱ្យដឹងនៅព្រឹកថ្ងៃទី០១ តុលានេះថា មុនពេលកើតហេតុ នៅវេលាម៉ោងប្រហែល២រសៀលថ្ងៃទី៣០ កញ្ញា ឆ្នាំ២០២១ ជនរងគ្រោះ បានចូលកន្លែងម៉ាស្សា ហើយអង្គុយនិយាយលេងជាមួយអ្នកម៉ាស្សាឈ្មោះ ម៉ៅ កែវ ភេទស្រី អាយុ៣១ឆ្នាំ មិនទាន់បានម៉ាស្សាផងក៏ដកដង្ហើមថប់ៗ ហើយក៏រឹងខ្លួនឡើង បបូរមាត់ឡើងព៌ណស្វាយ ស្រាប់តែ មួយសន្ទុះដាច់ដង្ហើមស្លា.ប់តែម្ដងទៅ ។
បើតាមការឱ្យដឹងពីឈ្មោះតាន់ តុងហាក់ ភេទប្រុស អាយុ៣៨ឆ្នាំ ជាកូនប្រសារ បាននិយាយថា ឪពុកក្មេករបស់ខ្លួនធ្លាប់មានជំងឺ លើសឈាម និងជំងឺទឹកនោមផ្អែមប្រចាំកាយផង ។
ប្រភពបានបន្តទៀតថា បើតាមការត្រួតពិនិត្យរបស់សមត្ថកិច្ច និងក្រុមគ្រូពេទ្យបានធ្វើតេស្តយកសំណាករកមេរោគកូវីដ១៩ ជាលទ្ធផល (វិជ្ជមាន) ។ បច្ចុប្បន្ន សាកសពជនរងគ្រោះត្រូវបានក្រុមគ្រូពេទ្យដឹកយកទៅបូជានៅឈាបន ដ្ឋាន វត្តអរញ្ញរង្សី (ហៅ វត្តល្អក់) ស្ថិតនៅភូមិត្រពាំងទឹម ឃុំកណ្តែក ស្រុកប្រាសាទបាគង ខេត្តសៀមរាប ៕
ចែករំលែកព័តមាននេះ