សិក្សាស្វែងយល់ពីបញ្ហាភ្នែកស្រលៀង
ជំងឺភ្នែកស្រលៀងឬភ្នែកកែកគេអាចកំណត់បាននៅពេលណាភ្នែកទាំងសងខាងមិនអាចសម្លឹងមើលក្នុងទិសដៅតែមួយបាន ដែលភ្នែកខ្លះស្រលៀងចេញ ខ្លះស្រលៀងចូល ស្រលៀងឡើងលី និងចុះក្រោម
ជំងឺភ្នែកស្រលៀងឬភ្នែកកែកគេអាចកំណត់បាននៅពេលណាភ្នែកទាំងសងខាងមិនអាចសម្លឹងមើលក្នុងទិសដៅតែមួយបាន ដែលភ្នែកខ្លះស្រលៀងចេញ ខ្លះស្រលៀងចូល ស្រលៀងឡើងលី និងចុះក្រោម គឺទៅតាមលក្ខណៈរបស់ភ្នែកស្រលៀង។
លោកវេជ្ជបណ្ឌិត ងី ម៉េង ប្រធានកម្មវិធីជាតិសុខភាពភ្នែក បានប្រាប់កោះសន្តិភាពពេលកន្លងមកឲ្យដឹងថា បញ្ហាភ្នែកស្រលៀងឬភ្នែកកែក កើតឡើងដោយសារតែភាពមិនប្រក្រតីនៃដុំសាច់ណាមួយរបស់ភ្នែក ទាញកន្ត្រាក់ ជាហេតុធ្វើឲ្យភ្នែកល្អៀងទៅរកទិសដៅផ្សេងជាលក្ខណៈខុសប្រក្រតីគឺសម្លឹងមើលវត្ថុអ្វីមួយមិនត្រង់។ មានកត្តាមួយចំនួនដែលបង្កឱ្យមានបញ្ហាភ្នែកនេះ ៖
-ស្រលៀងមកពីកំណើត
-ភ្នែកម្ញូបជិតដែលមិនបានធ្វើការព្យាបាលពីមុនមក
-ជំងឺដែលទាក់ទងទៅនឹងខួរក្បាលដូចជាៈ ការប៉ះទង្គិច ការដាច់សរសៃឈាមខួរក្បាល និងមានបញ្ហាដុំសាច់ជាដើម។
ជំងឺភ្នែកស្រលៀងឬភ្នែកកែកបានស្តែងចេញនូវរោគសញ្ញាមួយចំនួនដូចជា៖
-ភ្នែកម្ខាងឬភ្នែកទាំងសងខាងមិនអាចមើលមកត្រង់ចំទិសដៅតែមួយបាន
-ធ្លាក់ចុះនៃគំហើញ
-ចុករោយភ្នែកដោយសារការសម្លឹងយូរ
-ឈឺក្បាលឬវិលមុខ
-មើលរូបភាពបែកជាពីរ
-ងាកក្បាលដោយសារតែការប្រឹងសម្លឹង ។
ការព្យាបាលជំងឺភ្នែកស្រលៀងឬភ្នែកកែកមានគោលបំណងមួយចំនួនដូចជា៖
-ចៀសវាងការមានជំងឺភ្នែកទៅថ្ងៃក្រោយ
-សម្រួលការមើលឃើញរូបភាពពីរឲ្យមកនៅដូចធម្មតា
-កាត់បន្ថយការស្រលៀងភ្នែកកាន់តែខ្លាំងទៅៗ ។
ការព្យាបាលជំងឺនេះគប្បីធ្វើឡើងជាមួយគ្រូពេទ្យ ដែលមានឯកទេសពិតប្រាកដ ៕
ចែករំលែកព័តមាននេះ