- ភ្នំពេញ
ភ្នំពេញ៖ អំឡុងពេលបុណ្យភ្ជុំបិណ្ឌ ខាងមុខនេះ ក្រសួងការងារ ប្រកាសឲ្យមន្ត្រីរាជការ បុគ្គលិកកម្មករនិយោជិត ឈប់សម្រាក ៣ថ្ងៃ តាមប្រតិទិនឈប់សម្រាកការងារប្រចាំឆ្នាំ។ អំឡុងពេលឈប់សម្រាកបុណ្យភ្ជុំបិណ្ឌ…
ភ្នំពេញ៖ អំឡុងពេលបុណ្យភ្ជុំបិណ្ឌ ខាងមុខនេះ ក្រសួងការងារ ប្រកាសឲ្យមន្ត្រីរាជការ បុគ្គលិកកម្មករនិយោជិត ឈប់សម្រាក ៣ថ្ងៃ តាមប្រតិទិនឈប់សម្រាកការងារប្រចាំឆ្នាំ។ អំឡុងពេលឈប់សម្រាកបុណ្យភ្ជុំបិណ្ឌ នៅថ្ងៃទី៥-៦-៧ ខែតុលា សប្តាហ៍ក្រោយនេះ បើទោះបីជារាជរដ្ឋាភិបាល សម្រេចផ្អាកពិធីបុណ្យកាន់បិណ្ឌ និងភ្ជុំបិណ្ឌក៏ដោយ ក៏នៅតែមានអ្នកធ្វើដំណើរទៅជួបជុំញាត្តិមិត្ត និងក្រុមគ្រួសារ នៅស្រុកកំណើត ឬក៏ទៅលេងកម្សាន្តតាមរមណីយដ្ឋាន និងសហគមន៍ទេសចរណ៍ធម្មជាតិនានា។
ដូច្នេះហើយ បានជាក្រសួងការងារ និងបណ្តុះបណ្តាលវិជ្ជាជីវៈ បានប្រកាសណែនាំម្ចាស់ ឬនាយករោងចក្រ សហគ្រាសទាំងអស់ ត្រូវធ្វើតេស្ដរហ័ស រកមេរោគកូវីដ-១៩ ដល់កម្មករនិយោជិត នៅតាមរោងចក្រ សហគ្រាស នៅទូទាំងប្រទេសកម្ពុជា ក្រោយពេលឈប់សម្រាក ក្នុងពិធីបុណ្យភ្ជុំបិណ្ឌខាងមុខនេះ។ ការធ្វើតេស្តនេះ ដើម្បីរក្សាបាននូវសកម្មភាពអាជីវកម្ម ផលិតកម្ម និងការផ្តល់សេវាកម្ម ក៏ដូចជា ចូលរួមចំណែកប្រយុទ្ធ និងទប់ស្កាត់ការរីករាលដាលទ្រង់ទ្រាយធំនៃជំងឺកូវីដ-១៩ បណ្តាលមកពីមេរោគបំប្លែងថ្មី ប្រភេទដែលតា (Delta)។
ក្នុងសេចក្ដីណែនាំ ចេញផ្សាយកាលពីថ្ងៃទី២៨ ខែកញ្ញា ក្រសួងការងារ និងបណ្តុះបណ្តាលវិជ្ជាជីវៈ បានណែនាំដល់ម្ចាស់ ឬនាយករោងចក្រ សហគ្រាស ត្រូវត្រៀមឧបករណ៍ធ្វើតេស្តរហ័ស រកមេរោគកូវីដ-១៩ ឱ្យបានគ្រប់ចំនួន សម្រាប់ធ្វើតេស្តរកមេរោគកូវីដ-១៩ ដល់កម្មករនិយោជិតរបស់ខ្លួន ក្រោយពេលឈប់សម្រាក ក្នុងពិធីបុណ្យភ្ជុំបិណ្ឌ ឆ្នាំ២០២១។ ការធ្វើតេស្តរហ័សរកមេរោគកូវីដ-១៩ នេះ គឺជាបន្ទុករបស់ម្ចាស់ ឬនាយករោងចក្រ សហគ្រាស។
ក្រសួងការងារ ក៏បានណែនាំដល់កម្មករនិយោជិតទាំងអស់ ត្រូវចូលរួមធ្វើតេស្តរហ័សរកមេរោគកូវីដ-១៩ តាមការរៀបចំរបស់ម្ចាស់ ឬនាយករោងចក្រ សហគ្រាស។ ចំពោះកម្មករនិយោជិតណា ដែលមិនព្រមចូលធ្វើតេស្ត នឹងត្រូវចាត់ទុកថា បានល្មើសធ្ងន់ចំពោះវិធានខាងវិន័យសន្តិសុខ និងអនាម័យ ដូចមានចែងក្នុងមាត្រា៨៣ នៃច្បាប់ស្តីពីការងារ និងបទប្បញ្ញត្តិជាធរមាន ដែលបើកសិទ្ធិឱ្យនិយោជក អាចបញ្ឈប់កម្មករនិយោជិតពីការងារបាន។
ទន្ទឹមនឹងនេះ ក្រសួងការងារ និងបណ្តុះបណ្តាលវិជ្ជាជីវៈ ក៏បានណែនាំដល់កម្មករនិយោជិត ដែលបានឈប់សម្រាក ក្នុងពិធីបុណ្យភ្ជុំបិណ្ឌខាងមុខនេះ ត្រូវអនុវត្តឱ្យបានខ្ជាប់ខ្ជួននូវវិធានការ «៣ការពារ និង៣កុំ» ជាពិសេសពាក់ម៉ាស់ លាងដៃញឹកញាប់នឹងសាប៊ូ ឬអាល់កុល ព្រមទាំងរក្សាគម្លាតសុវត្ថិភាពបុគ្គល ក្នុងពេលធ្វើដំណើរ ដោយរថយន្តរួម និងត្រូវយកតាមខ្លួននូវទឹកអាល់កុល ឬអាល់កុល-ជែលលាងដៃ។
នៅពេលឈប់សម្រាកបុណ្យភ្ជុំបិណ្ឌ នៅសប្តាហ៍ក្រោយ នឹងមានអ្នកទៅលេងស្រុកច្រើន ពិសេសកម្មករកាត់ដេរ ហើយអ្នកខ្លះអាចចេញដំណើរពីភ្នំពេញ ទៅស្រុក តាំងពីល្ងាច ឬយប់ថ្ងៃសុក្រ ឬក៏ថ្ងៃសៅរ៍ចុងសប្តាហ៍នេះ។ ឡានដឹកកម្មករកាត់ដេរ ទៅស្រុកទាំងនោះ កន្លងមក ដាក់មនុស្សណែន និងហៀរៗពេញឡាន ដែលប្រឈមនឹងឆ្លងកូវីដ១៩ ដោយសារតែមិនអាចរក្សាគម្លាតសុវត្ថិភាពបុគ្គលបានឡើយ។ សូម្បីតែឡានដឹកកម្មករកាត់ដេរ រាល់ថ្ងៃ ក៏ដាក់ណែនៗ ឡើងប្រជ្រៀតគ្នាដដែល បើទោះបីជាកម្មករទាំងអស់ បានពាក់ម៉ាសគ្រប់គ្នាក៏ដោយ។
ម្យ៉ាងទៀត បុណ្យភ្ជុំបិណ្ឌនៅសប្តាហ៍ក្រោយនេះ អំឡុងពេលឈប់សម្រាកការងារ ៣ថ្ងៃ ចំថ្ងៃអង្គារ ពុធ និងថ្ងៃព្រហស្បតិ៍ អាចនឹងមានការលៃលកឈប់សម្រាកពីការងារ ប្រហែលជាដាច់ ១អាទិត្យតែម្តង ដោយឈប់សង ឬកាត់កងថ្ងៃផ្សេងក៏មាន។ ការឈប់សម្រាកយូរថ្ងៃ ក្នុងពេលបុណ្យភ្ជុំបិណ្ឌនេះ មិនមែនតែកម្មករកាត់ដេរនោះទេ មន្ត្រីរាជការ និងបុគ្គលិកក្រុមហ៊ុនខ្លះ ក៏អាចនឹងសារ៉េដូចគ្នា ដើម្បីបានឈប់សម្រាកយូរថ្ងៃ។ ក្នុងនោះ ក៏មានការធ្វើដំណើរចេញពីផ្ទះច្រើន ទោះបីជាផ្អាកបុណ្យកាន់បិណ្ឌ និងភ្ជុំបិណ្ឌ នៅតាមវត្តក៏ដោយ។
កំណើនអ្នកធ្វើដំណើរច្រើន ពិសេសអ្នកនៅភ្នំពេញ កម្មករកាត់ដេរ និងបុគ្គលិកក្រុមហ៊ុន ឬសិស្សនិស្សិត រួមទាំងអ្នកមកធ្វើការ រកស៊ី រៀនសូត្រ ត្រូវធ្វើដំណើរទៅស្រុកកំណើត ជួបជុំជីដូនជីតា ឪពុកម្តាយ បងប្អូន ញាត្តិមិត្តក្នុងរដូវបុណ្យភ្ជុំបិណ្ឌ តាមប្រពៃណី ទំនៀមទម្លាប់ ដូចពេលកន្លងមកនេះ ជាក្តីបារម្ភ ពីការផ្ទុះឡើងនូវការឆ្លងរាលដាលជំងឺកូវីដ១៩។ ជំងឺកូវីដ១៩ ដែលនៅប៉ុន្មានថ្ងៃមកនេះ នៅតែមានចំនួនអ្នកឆ្លងប្រចាំថ្ងៃខ្ពស់ រហូតដល់ជាង ៨០០នាក់ ទៅជិត ៩០០នាក់ ក្នុង ១ថ្ងៃៗ និងស្លាប់ជាមធ្យមជាង ១០នាក់ ទៅជាង ២០នាក់ រៀងរាល់ថ្ងៃ។
នៅប៉ុន្មានថ្ងៃនេះ កូវីដក៏ផ្ទុះឆ្លងខ្លាំង នៅតាមបណ្តាខេត្តជាច្រើន ដូចជា នៅសៀមរាប ព្រះវិហារ បន្ទាយមានជ័យ ខេត្តប៉ៃលិន ព្រៃវែង និងខេត្តស្វាយរៀង ជាដើម។ ផ្សារជាច្រើន ក៏បានបិទដោយសារតែឆ្លងកូវីដ ខណៈដែលនៅសៀមរាប និងខេត្តព្រះវិហារ ក៏បានបិទខ្ទប់ភូមិឃុំសង្កាត់ រួមទាំងបិទផ្សារជាច្រើន ដោយសារតែឆ្លងកូវីដ។ នៅភ្នំពេញ ក៏មិនទាន់ស្ងប់ស្ងាត់ដែរ កូវីដបន្តឆ្លង ហើយក៏មានប្រភេទ ដែលតា ឆ្លងចូលផ្សារ និងផ្ទុះឆ្លងចូលវត្តមួយចំនួនថែមទៀត។
ដូច្នេះនៅពេលឈប់សម្រាកបុណ្យភ្ជុំបិណ្ឌសប្តាហ៍ក្រោយនេះ ម្នាក់ៗគួរតែបន្តស្នាក់នៅផ្ទះ។ តែបើថា ត្រូវទៅស្រុកកំណើត ក៏ត្រូវប្រយ័ត្នប្រយែង។ ពេលទៅដល់ផ្ទះនៅស្រុកភូមិហើយ កុំចេញទៅណា បិទទ្វាររបង ជួបជុំត្រឹមតែក្រុមគ្រួសារមួយៗ ដោយរក្សាជាប់ជានិច្ចនូវវិធានការសុខាភិបាល ការពារកុំឲ្យឆ្លងកូវីដ «៣កុំ និង៣ការពារ» ដោយពាក់ម៉ាសគ្រប់គ្នា លាងសម្អាតដៃញឹកញាប់ រក្សាគម្លាតសុវត្ថិភាពយ៉ាងតិច ១ម៉ែត្រកន្លះពីម្នាក់ ទៅម្នាក់ និងកុំប៉ះពាល់គ្នា។ នេះមិនមែនជាការរើសអើងទេ។ តែកូវីដ មិនស្គាល់ជីដូនជីតា ឪពុកម្តាយកូនចៅ ញាត្តិមិត្ត ឬអ្នកជិតខាងឡើយ។ ឲ្យតែប្រហែស គឺឆ្លងហើយ។ ក្នុងនោះ ក៏មិនដឹងថា កូនចៅទៅលេងស្រុក ជាអ្នកយកកូវីដទៅផ្ញើជីដូនជីតា ឪពុកម្តាយ និងសាច់ញាត្តិនៅស្រុក ឬក៏កូនចៅទៅលេងស្រុកនោះ ទៅយកកូវីដពីស្រុក ក៏មើលមិនឃើញ និងមិនដឹងទាំងអស់គ្នា។
មួយវិញទៀត អំឡុងពេលឈប់សម្រាកនេះ បើមិនដេកផ្ទះទេ ឬក៏ចង់ទៅដើរលេង ក៏គួរតែរកទីកន្លែង ដែលមានសុវត្ថិភាព ហើយជ្រើសរើសយកមធ្យោបាយធ្វើដំណើរផ្ទាល់ខ្លួន របៀបក្រុមគ្រួសារ និងស្នាក់នៅ ក៏ត្រូវដាច់ដោយឡែកពីគេឯង គឺនៅតែក្រុមគ្រួសារមួយៗ ជៀសវាងការជួបជុំមនុស្សច្រើន ដែលជាហានិភ័យនៃការឆ្លងកូវីដ។
ជាសរុបមក ក្នុងកាលៈទេសៈនេះ ម្នាក់ៗ ត្រូវតែរក្សាខ្លួន កុំឲ្យឆ្លងកូវីដ។ យើងមិនខ្វះពេលទៅលេងស្រុក ទៅជួបជុំជីដូនជីតា ឪពុកម្តាយ បងប្អូន ញាត្តិមិត្តទេ។ ការដើរលេង ក៏ដូចគ្នា។ ទាំងការទៅលេងស្រុកកំណើត និងទាំងការដើរលេង ក្នុងពេលឈប់សម្រាកបុណ្យភ្ជុំបិណ្ឌនេះ ឬក៏ពេលណាណាក៏ដោយ គឺដើម្បីជួបជុំក្រុមគ្រួសារ និងញាត្តិមិត្ត ធ្វើបុណ្យទាន និងដើម្បីសប្បាយ។ ដូច្នេះដើម្បីកុំឲ្យសប្បាយក្លាយជាទុក្ខ មានតែការពារ ប្រុងប្រយ័ត្ន ហើយបើអាចអត់ធ្មត់បាន ក៏គួរតែរង់ចាំដល់ឆ្នាំក្រោយ ពេលស្ងប់កូវីដ ក៏មិនយឺតពេលនឹងជួបជុំគ្នា នៅស្រុកកំណើត ឬក៏ដើរលេងនោះឡើយ៕
ចែករំលែកព័តមាននេះ