រថយន្ត HINO ព្រលះជាមួយ RX 330 ស្លាប់ម្នាក់ របួសស្រាលម្នាក់
ខេត្តសៀមរាប៖ រថយន្តយីឌុប (HINO) ឡើងវ៉ារថយន្តមួយផ្សេងទៀត ប៉ុន្តែមិនផុតក៏រ៉េចង្កូតមកវិញ បុកជាមួយរថយន្តឡិចស៊ីស RX 330 ពេញទំហឹង បណ្តាលឱ្យដាច់កង់មុខ ក្រឡាប់ផ្ងារជើង
ខេត្តសៀមរាប៖ រថយន្តយីឌុប (HINO) ឡើងវ៉ារថយន្តមួយផ្សេងទៀត ប៉ុន្តែមិនផុតក៏រ៉េចង្កូត បុកជាមួយរថយន្តឡិចស៊ីស RX 330 ពេញទំហឹង បណ្តាលឱ្យដាច់កង់មុខក្រឡាប់ផ្ងារជើងឡើងលើ បណ្ដាលឱ្យអ្នកបើករថយន្ដឡិចស៊ិសបានស្លាប់ភ្លាមៗនៅនឹងកន្លែង ចំណែកអ្នករួមដំណើររងរបួសស្រាល ។ ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោង០២និង៥០នាទីរសៀលថ្ងៃទី០១ ខែមិនា ស្ថិតនៅតាមបណ្តោយផ្លូវជាតិលេខ៦ ក្នុងភូមិគោកភ្នៅ ឃុំសសរស្តម្ភ ស្រុកពួក ខេត្តសៀមរាប ។
លោកវរសេនីយ៍ត្រី ទេព ពុំសែន អធិការនគរបាលស្រុកពួក បានឱ្យដឹងថា នៅវេលាម៉ោង០៦និង៤០នាទីរសៀលថ្ងៃទី០១ ខែមិនា ឆ្នាំ២០១៦ ថា ហេតុការណ៍គ្រោះថ្នាក់ចរាចរណ៍ខាងលើ បង្ករឡើងដោយរថយន្តយីឌុប(HINO) ពាក់ស្លាកលេខព្រះសីហុន 3A-0641 បើកវ៉ារថយន្តមួយផ្សេងទៀត ពីលិចទៅកើត រួចជ្រុលចង្កូតទៅបុកជាមួយរថយន្តឡិចស៊ីស RX 330 ពាក់ស្លាកលេខភ្នំពេញ 2AG-3312 ធ្វើឱ្យដាច់កង់មុខ ក្រឡាប់ផ្ងារជើងឡើងលើ និងបណ្ដាលឱ្យអ្នកបើកបររថយន្ដឡិចស៊ិស RX330 បានស្លាប់ម្នាក់ និងអ្នករួមដំណើរ រងរបួសស្រាល ។
ឃើញដូចនេះអ្នកបើកបររថយន្តយីឌុប (HINO) ក៏បានចុះរត់គេចខ្លួនបាត់ភ្លាមៗផងដែរ ។ លោកអធិការនគរបាលស្រុក បានបន្តទៀតថា ជនរងគ្រោះក្នុងហេតុការណ៍ខាងលើ មានឈ្មោះ ណត ណែន ភេទប្រុស អាយុ២៧ឆ្នាំ រស់នៅភូមិពងទឹក ឃុំក្រាំងតាយ៉ង ស្រុកពាមជ័រ ខេត្តព្រៃវែង ជាអ្នកបើកបរបានស្លាប់ ក្រោយពេលបញ្ជូនទៅដល់មន្ទីរពេទ្យក្នុងក្រុងសៀមរាប ។ ចំពោះអ្នករួមដំណើរមានឈ្មោះ លាង ថន ភេទប្រុស អាយុ៦៧ឆ្នាំ រស់នៅភ្នំពេញ រងរបួសស្រាល ហើយអ្នកបើករថយន្តយីឌុប(HINO) បានគេចខ្លួនបាត់ស្រមោល ។
បច្ចុប្បន្នសពជនរងគ្រោះត្រូវបានឈ្មោះ លាង ថន ជាឪពុក យកទៅធ្វើបុណ្យតាមប្រពៃណី ។ ដោយឡែករថយន្តទាំង២ត្រូវបានកម្លាំងនគរបាល នៃអធិការដ្ឋាននគរបាលស្រុកពួក បានស្ទួចយកទៅរក្សាទុក រងចាំភាគីទាំងពីរដោះស្រាលតាមផ្លូវច្បាប់ ៕
ចែករំលែកព័តមាននេះ