ពន្ធនាគារខេត្តបន្ទាយមានជ័យ រងការគំរាមកំហែងដោយសារទឹកជំនន់ប៉ុន្មានថ្ងៃហើយ
- បន្ទាយមានជ័យ
ពន្ធនាគារខេត្តបន្ទាយមានជ័យ បានរងការគំរាមកំហែង ដោយសារគ្រោះទឹកជំនន់ ប៉ុន្តែអាចទប់ទល់ស្ថានភាពនេះបាន ទោះបីជាទឹកឡើងជិតកន្លះម៉ែត្រទៀតក៏ដោយ
ខេត្តបន្ទាយមានជ័យ ៖ ពន្ធនាគារខេត្តបន្ទាយមានជ័យ បានរងការគំរាមកំហែង ដោយសារគ្រោះទឹកជំនន់ ប៉ុន្តែអាចទប់ទល់ស្ថានភាពនេះបាន ទោះបីជាទឹកឡើងជិតកន្លះម៉ែត្រទៀតក៏ដោយ នេះគិតត្រឹមថ្ងៃទី២៨ ខែកញ្ញា ឆ្នាំ២០២១នេះ ស្ថិតនៅក្នុងភូមិគាប សង្កាត់ទឹកថ្លា ក្រុងសិរីសោភ័ណ។
នៅពេលដែលទឹកជំនន់កំពុងគំរាមកំហែងពន្ធនាគារខេត្តបន្ទាយមានជ័យឃើញវត្តមានឯកឧត្តម ប៉ែន ស៊ីណង អគ្គនាយករងនៃអគ្គនាយកដ្ឋានពន្ធនាគាបានចុះមកពិនិត្យមើលស្ថាន។
លោក អ៊ុង ស៊ីផាន ប្រធានពន្ធនាគាខេត្តបន្ទាយមានជ័យ បានអោយដឹងថា ទឹកជំនន់បានគំរាមកំហែងរយៈពេល២ទៅ៣ថ្ងៃមកហើយនៅពន្ធនាគារខេត្តបន្ទាយមានជ័យ តែជាការណែនាំពីឯកឧត្តមអគ្គនាយកដ្ឋានពន្ធនាគារហើយ កម្លាំងពន្ធនាគារខេត្តបន្ទាយមានជ័យបានដឹងជាមុន ហើយក៏បានត្រៀមយកការ៉ុងខ្សាច់ និងកំទេចថ្មជាង៥.០០០ការ៉ុង មកតម្រៀបជា២ជួរកម្ពស់ជាង១ម៉ែត្រដាក់ជុំវិញរបងពន្ធនាគារ និងបានចាក់សាប ដើម្បីការពារទុកជាមុន ទើបអាចទប់ទល់ស្ថានភាពរហូតមកដល់ពេលនេះ។
លោកបានបញ្ជាក់ថា ស្ថានភាពទឹកជំនន់ជុំវិញរបងខាងក្រៅ គឺមានកម្ពស់ជិត១ម៉ែត្រហើយ បើប្រៀបធៀបកាលពីឆ្នាំ២០២០កន្លងទៅ ខ្វះជិតកន្លះម៉ែត្រទៀត ហើយលោកក៏បានរៀបចំបិទប្រព័ន្ធលូបង្ហូរទឹក និងដាក់ម៉ាស៊ីនចំនួន៥គ្រឿងសម្រាប់មូបចេញជាប្រចាំដែលទឹកជ្រាបចូល ហើយរហូតដល់ពេលនេះ គឺអាចទប់ទល់ស្ថានភាពទឹកបាន ដោយសារតែការត្រៀបបម្រុងការពារទុកជាមុន។
ចំណែកលោក ប៉ែន ស៊ីណង អគ្គនាយករងនៃអគ្គនាយកដ្ឋានពន្ធនាគារ ក៏បានបញ្ជាក់ថា រហូតដល់ថ្ងៃទី២៨ ខែកញ្ញា ឆ្នាំ២០២១នេះ ស្ថានភាពទឹកដែលគំរាមកំហែងពន្ធនាគារខេត្តបន្ទាយមានជ័យ គឺមានរយៈពេល៣ទៅ៤ថ្ងៃហើយ ប៉ុន្តែដោយសារមន្ត្រីពន្ធនាគាខេត្តបានខិតខំយកចិត្តទុកដាក់ធ្វើការទប់ស្កាត់ បង្ការ និងត្រៀមបម្រុងជាមុន ដោយយកការ៉ុងខ្សាច់បិទខ្ទប់ជុំវិញរបងខាងក្រៅ និងបានដាក់ម៉ាស៊ីនបូមទឹកចេញចំនួន៥គ្រឿងជាប្រចាំទៀត ទើបរហូតដល់ពេលនេះ (ថ្ងៃទី២៨ កញ្ញា) ស្ថានភាព គឺអាចគ្រប់គ្រងបាន ទោះបីជាទឹកឡើងជិតកន្លះម៉ែត្រទៀត ក៏អាចទប់ទល់បានដែរ ដោយសារមើលតាមស្ថានភាព និងការទប់ស្កាត់ ព្រមទាំងបង្ការមុនជាស្រេច៕
ចែករំលែកព័តមាននេះ