រាជធានីភ្នំពេញ ៖ បូកបន្ថែមទាំងវ៉ាក់សាំងចំនួន៣លានដូសទើបមកដល់ថ្ងៃទី២៨ ខែកញ្ញា កម្ពុជាមានវ៉ាក់សាំងបង្ការជំងឺកូវីដ១៩នៅក្នុងឃ្លាំង ជាង៦លានដូសសម្រាប់ចាក់ដូសជំរុញ ។ នេះបើតាមលោកជំទាវ យក់ សម្បត្តិ…
រាជធានីភ្នំពេញ ៖ បូកបន្ថែមទាំងវ៉ាក់សាំងចំនួន៣លានដូសទើបមកដល់ថ្ងៃទី២៨ ខែកញ្ញា កម្ពុជាមានវ៉ាក់សាំងបង្ការជំងឺកូវីដ១៩នៅក្នុងឃ្លាំង ជាង៦លានដូសសម្រាប់ចាក់ដូសជំរុញ ។ នេះបើតាមលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល ។
លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាលបានឲ្យដឹងខណៈអញ្ជើញទទួលវ៉ាក់សាំង៣លានដូស នៅព្រលានយន្តហោះអន្តរជាតិភ្នំពេញថា មកដល់ពេលនេះកម្ពុជាមានវ៉ាក់សាំងចំនួន៣៥.៥លានដូសហើយ ។ លោកជំទាវបញ្ជាក់ថា ៖«អីញ្ចឹងយើងមាន៣៥.៥លានដូសហើយ យើងមាននៅក្នុងឃ្លាំងយើងសល់ជាង៣លានដូស ហើយបូកបន្ថែម៣លានដូសទៀតអីញ្ចឹងយើងមានជាង៦លានដូសហើយ ។ ដូច្នេះយើងមានជាង៦លានដូសនេះ ដើម្បីចាក់ដូសជំរុញជូនប្រជាពលរដ្ឋដែលកំពុងចាក់ និងធ្វើយុទ្ធនាការចាក់» ។
សម្រាប់វ៉ាក់សាំងសម្រាប់ដាក់ជូនប្រជាពលរដ្ឋ លោកជំទាវក៏បានលើកឡើងថា កម្ពុជាមិនខ្វះវ៉ាក់សាំងសម្រាប់ចាក់ជូនប្រជាពលរដ្ឋនោះទេ ។ ដោយសារកម្ពុជាបន្តយកវ៉ាក់សាំងជាជំនួយពីមិត្តចិន និងជំនួសពីអង្គការកូវ៉ាក់ក៏ដូចជាខាងប្រទេសទ្វេរភាគីដែលសន្យាជួយ ។
ដូច្នេះប្រសិនបើកម្ពុជាបន្តចាក់ដូសជំរុញ ឬដូសផ្សេងទៀតរាជរដ្ឋាភិបាលមិនប្រងើយតណ្តើយនោះទេ គឺនឹងបញ្ជាទិញភ្លាមពីចិន ។
ជាមួយគ្នានោះដែរ លោកជំទាវក៏បានឲ្យដឹងទៀតថា រាជរដ្ឋាភិបាលនឹងបន្តទិញវ៉ាក់សាំងប្រទេសភេទស៊ីណូវ៉ាក់ និងស៊ីណូហ្វាម ដោយសារប្រមុខរាជរដ្ឋាភិបាលបានធ្វើការជាមួយក្រុមហ៊ុនេះយ៉ាងជិតស្និតតាមរយៈស្ថានទូតចិននៅកម្ពុជាក៏ដូចជា រដ្ឋាភិបាលចិន ។
យ៉ាងណាក្តីលោកជំទាវបានអះអាងថារាល់វ៉ាក់សាំំងដែលរដ្ឋាភិបាលបញ្ជាទិញមិនមានការកកស្ទះនោះទេ ៕
ចែករំលែកព័តមាននេះ