ខេត្ដកំពង់ធំ ៖ បន្ទាប់ពីកោះសន្ដិភាពបានចុះផ្សាយព័ត៌មានក្រោមចំណងជើងថា “បុរសម្នាក់ដែលអស់សង្ឃឹមខ្វះការតស៊ូ សំរេចចិត្ដចង.កធ្វើអត្ដឃាត” កាលពីថ្ងៃទី១ កក្កដា ២០១០ មកធ្វើឱ្យសប្បុរសជនមាន ក្ដីអាណិតអាសូរជួយឧបត្ថម្ភចំពោះស្ដ្រីជាប្រពន្ធដែលឈឺស្លាប់មួយចំហៀងខ្លួនតាមរយៈកោះសន្ដិភាព ហើយភ្នាក់ងារយើងប្រចាំខេត្ដបាននាំយកទៅជូនដោយផ្ទាល់ដល់លំនៅឋានកាលពីរសៀលថ្ងៃទី៨ កក្កដា ២០១០ នៅភូមិស្នោ ឃុំត្រញំងឫស្សី ស្រុក កំពង់ស្វាយ។ ស្ដ្រីរូបនោះឈ្មោះបេង ផល អាយុ៤២ឆ្នាំ មានកូន៤នាក់ក្នុងបន្ទុក ។ ចំពោះអំណោយជូនគាត់ គឺទឹកប្រាក់ចំនួន១០ម៉ឺនរៀលជា របស់លោកលឹម កៅ លក់គ្រឿងសំណង់មានអាសយដ្ឋានលេខ១១២ មហាវិថីម៉ៅសេទុង សង្កាត់ទួលទំពូងី ខណ្ឌចំការមន រាជធានីភ្នំពេញ ។
បន្ទាប់ពីបានទទួលអំណោយ ស្ដ្រីពិការ និងកូនៗបានលើកដៃប្រណម្យបួងសួងជូនពរដល់សប្បុរសជនសូមឱ្យជួបតែសេចក្ដីសុខ និងសូមប្រកបការងារជួញដូរអ្វីមានការរីកចំរើន ។ ឆ្លៀតក្នុងឱកាសនោះ ស្ដ្រីពិការរូបនេះ បានរំលឹកទាំងទឹកភ្នែកឱ្យដឹងថា ប្ដីគាត់ ឈ្មោះប៉ន ជា អាយុ៤៤ឆ្នាំ ។ ចាប់តាំងពីពួក គាត់បានគ្នា ជាប្ដី ប្រពន្ធមក ទោះបីរស់នៅក្នុងជីវភាពក្រីក្រយ៉ាងណាក្ដីក៏ពុំដែល ឈ្លោះប្រកែកគ្នាដែរ។ បន្ទាប់ពីគាត់សំរាលកូនទី៤បាន៥ទៅ៦ខែមក គាត់កើតជំងឺរ៉ាំរ៉ៃ រហូតស្លាប់មួយចំហៀងខ្លួនខាងឆ្វេងពុំអាចជួយធ្វើការងារសំរាប់ដោះស្រាយជីវភាព គ្រួសារឡើយ គឺធ្លាក់ទៅលើបន្ទុកប្ដីគាត់ទាំងស្រុងដែលប្រកបរបរលក់កំលាំងពលកម្មតាមតែគេជួល គឺរកបានព្រឹក ខ្វះល្ងាច រកបានល្ងាច ខ្វះព្រឹក រស់នៅយ៉ាងក្រីក្រលំបាកវេទនា ហើយមានជំងឺទៀត ។
ស្ដ្រីពិការរូបនេះបន្ដឱ្យដឹងថា កាលពី២ ទៅ៣ថ្ងៃមុនពេលធ្វើអត្ដឃាតប្ដីគាត់បានទៅស៊ីឈ្នួលលើកភ្លឺស្រែឱ្យគេ ហើយពេលមក ដល់ផ្ទះតែងមានអាកប្បកិរិយាចំលែកគឺ ពេលអុជធូបបានបួងសួងឱ្យឪពុក ម្ដាយគាត់ ដែលចែកឋានទៅយកគាត់ទៅជាមួយផង ។ នៅថ្ងៃកើតហេតុ បន្ទាប់ពីហូបបាយថ្ងៃត្រង់ រួចហើយ កូនៗបានដើរលេងអស់នៅសល់តែគាត់ និងប្ដី ។ ខណៈពេលគាត់ដេកលក់មួយភាំង ភ្ញាក់ឡើងស្រាប់តែឃើញប្ដីចង.ក នឹងក្រមាលែងកំរើកទៅហើយ ។ ហេតុការណ៍នេះកើតឡើងនៅវេលាម៉ោង១ និង៣០នាទីរសៀល ថ្ងៃទី២៦ មិថុនា ២០១០ ។ ស្ដ្រីដដែលបន្ដថា ការស្លាប់នេះបន្សល់ទុក កូនៗចំនួន៤នាក់ ក្នុងនោះកូនទី១ឈ្មោះ ជា ភួង ភេទស្រី អាយុ១៧ឆ្នាំ កូនទី២ ឈ្មោះ ជា កុសល ភេទប្រុស អាយុ១៥ឆ្នាំ កូនទី៣ ឈ្មោះ ជា ជឹម ភេទប្រុស អាយុ១១ឆ្នាំ ត្រូវបងប្អូនខាងឪពុកដែលរស់នៅស្រុកអន្លង់វែង ខេត្ដឧត្ដរមានជ័យយកទៅនៅជាមួយបន្ទាប់ ពីធ្វើបុណ្យសពហើយ និងកូនទី៤ ឈ្មោះជា សំអូន ភេទប្រុស អាយុ៦ឆ្នាំ ។
ដោយសារ តែផ្ទះគាត់នៅដាច់ឆ្ងាយពីផ្ទះម្ដាយ បន្ទាប់ពីបុណ្យសពប្ដីហើយ គាត់បាននាំកូនៗចំនួន៣ នាក់ដែលនៅសល់ទៅរស់នៅក្នុងខ្ទមជាមួយ ម្ដាយឈ្មោះច ផន អាយុ៦០ឆ្នាំ នៅជាប់ដង ផ្លូវជាតិលេខ៦ក្នុងភូមិស្នោ ឃុំត្រញំងឫស្សី ស្រុកកំពង់ស្វាយ ដែលបច្ចុប្បន្ន ពួកគាត់រស់ នៅយ៉ាងលំបាកលំបិនពឹងផ្អែកលើអ្នកភូមិដាក់ទានជាអង្ករ១កំប៉ុង ឬ២កំប៉ុង ចំណែកកូន តូចៗពុំមានការងារធ្វើឡើយ។ ស្ដ្រីពិការឱ្យដឹងថា អំណោយដែលគាត់ ទទួលបានពេលនេះ គឺជាលើកដំបូងហើយ ។ គាត់អំពាវនាវដល់សមាគមជាតិកាកបាទ ក្រហមកម្ពុជាដែលមានលោកជំទាវបណ្ឌិត ប៊ុន រ៉ានី ហ៊ុន សែន ជាប្រធាន និងសប្បុរស ជននានាឱ្យដាក់ទានជាអំណោយផ្សេងៗដល់ គ្រួសារគាត់ផង ៕
ចែករំលែកព័តមាននេះ