អភិបាលខេត្តព្រះសីហនុ ព្រមានចាត់វិធានការ ចំពោះម្ចាស់អគារ សណ្ឋាគារ និងកាស៊ីណូ
- ព្រះសីហនុ
ខេត្តព្រះសីហនុ៖ នៅថ្ងៃទី២៧ ខែកញ្ញានេះ លោក គួច ចំរើន អភិបាលខេត្តព្រះសីហនុ បានចេញសេចក្តីជូនដំណឹង ព្រមានចាត់វិធានការរដ្ឋបាល និងច្បាប់…
ខេត្តព្រះសីហនុ៖ នៅថ្ងៃទី២៧ ខែកញ្ញានេះ លោក គួច ចំរើន អភិបាលខេត្តព្រះសីហនុ បានចេញសេចក្តីជូនដំណឹង ព្រមានចាត់វិធានការរដ្ឋបាល និងច្បាប់…
ខេត្តព្រះសីហនុ៖ នៅថ្ងៃទី២៧ ខែកញ្ញានេះ លោក គួច ចំរើន អភិបាលខេត្តព្រះសីហនុ បានចេញសេចក្តីជូនដំណឹង ព្រមានចាត់វិធានការរដ្ឋបាល និងច្បាប់ ចំពោះម្ចាស់អគារ សណ្ឋាគារ និងកាស៊ីណូ ដែលប្រើប្រាស់ហត្ថពលករដោយបង្ខំ។
ក្នុងលិខិត លើកឡើងថា ក្នុងរយៈពេលកន្លងមក រដ្ឋបាលខេត្តព្រះសីហនុ បានសង្កេតឃើញថា ការជ្រើសរើស ការគ្រប់គ្រង ការចាត់ចែង ការអនុវត្តកិច្ចសន្យាការងាររវាងនិយោជក និងបុគ្គលិក កម្មករ និយោជិតមួយចំនួន នៅមិនទាន់ស្របតាមនីតិវិធីច្បាប់នៅឡើយ ដែលជាហេតុបណ្តាលឲ្យកើតមានវិវាទការងារ ហើយរដ្ឋបាលខេត្ត ក៏បានទទួលពាក្យបណ្តឹង និងដោះស្រាយវិវាទការងារជាបន្តបន្ទាប់ច្រើនករណីមកហើយ។
ដើម្បីដោះស្រាយ និងកាត់បន្ថយវិវាទការងារប្រកបដោយប្រសិទ្ធភាព និងទាន់ពេលវេលា ជាពិសេសដើម្បីទប់ស្កាត់ការបំពេញការងារដោយបង្ខំ ឬជាកាតព្វកិច្ច ដែលអាចប្រឈមនឹងការជួញដូរមនុស្ស និងអំពើធ្វើអាជីវកម្មផ្លូវភេទ ក្រោមរូបភាពរកការងារឲ្យធ្វើ ក្នុងទម្រង់កេងប្រវ័ញ្ចពលកម្ម រដ្ឋបាលខេត្តព្រះសីហនុ ដាក់ចេញនូវវិធានការម៉ឺងម៉ាត់ តាមច្បាប់ ៥ ចំណុច រួមមាន៖ ១-ការងារដោយបង្ខំ ឬជាកាតព្វកិច្ច ត្រូវហាមឃាត់ដាច់ខាត។ ២-ការជួលមនុស្សឲ្យធ្វើការងារ ដើម្បីកាត់ជំពាក់ ត្រូវហាមឃាត់។ ៣-ការកាត់ប្រាក់ឈ្នួល ក្នុងគោលបំណងឲ្យអ្នកទទួលរកការឲ្យធ្វើ ទោះបីដោយចំពោះក្តី ឬមិនចំពោះក្តី ឲ្យទៅនិយោជក អ្នកតំណាងនិយោជក ឬអន្តរការីណាម្នាក់ ដូចជា ភ្នាក់ងារទទួលជ្រើសរើសហត្ថពលករជាដើម ត្រូវហាមឃាត់។ ៤-ជនណា ដែលនាំយកជនដទៃ ចេញដោយមិនស្របច្បាប់ ក្នុងគោលដៅស្វែងរកប្រយោជន៍ ឈ្លានពានខាងផ្លូវភេទ ផលិតរូបភាពអាសអាភាស រៀបអាពាហ៍ពិពាហ៍ផ្ទុយពីឆន្ទៈរបស់ជនរងគ្រោះ ស្មុំកូន ឬទម្រង់ណាមួយនៃការកែងប្រវ័ញ្ចផ្សេងទៀត នឹងត្រូវផ្តន្ទាទោសតាមច្បាប់។ ៥-បុគ្គល ដែលចាប់ ឬឃុំឃាំង ឬដែលបង្ខាំងបុគ្គលផ្សេងទៀត ដោយគ្មានបញ្ហាពីអាជ្ញាធរស្របច្បាប់ ឬក្រៅពីករណី ដែលច្បាប់អនុញ្ញាត ត្រូវផ្តន្ទាទោសតាមច្បាប់។
សេចក្តីជូនដំណឹង ក៏បានលើកឡើងថា សកម្មភាពដូចបានរៀបរាប់ខាងលើ គឺជាអំពើឧក្រិដ្ឋកម្ម ដែលត្រូវផ្តន្ទាទោស និងមានស្ថានទម្ងន់ទោសធ្ងន់ធ្ងរ ព្រោះជាអំពើប៉ះពាល់ដល់មនុស្សជាតិ។ ជាងនេះទៀត រដ្ឋបាលខេត្ត នឹងចាត់វិធានការរដ្ឋបាល និងច្បាប់ចំពោះម្ចាស់អាគារ សណ្ឋាគារ និងកាស៊ីណូ ដែលមានការពាក់ព័ន្ធ ទោះក្នុងរូបភាពដោយប្រយោល ឬដោយផ្ទាល់ក្តី ទៅលើការបង្ខាំង ការបង្ខំឲ្យមនុស្សធ្វើការ ការជួញដូរតាមរូបភាពទទួលមនុស្សឆ្លងដែនដោយខុសច្បាប់ឲ្យធ្វើការ ដែលមានការចាត់តាំង ជាដើម…។ល។
សេចក្តីជូនដំណឹង បន្ថែមថា ក្នុងករណីរកឃើញម្ចាស់អគារ សណ្ឋាគារ និងកាស៊ីណូ ប្រព្រឹត្តបទល្មើស ដូចមានចែងខាងលើ រដ្ឋបាលខេត្តព្រះសីហនុ នឹងចាត់វិធានការផ្អាកទីតាំងអាជីវកម្មជាបណ្តោះអាសន្ន និងកសាងសំណុំរឿងបញ្ជូនទៅតុលាការ ដើម្បីផ្តន្ទាទោសបុគ្គល ដែលមានការពាក់ព័ន្ធស្របតាមច្បាប់ជាធរមាន ព្រមទាំងស្នើសុំរាជរដ្ឋាភិបាល ដើម្បីលុបអាជ្ញាប័ណ្ណអាជីវកម្មជាស្ថាពរ។
សេចក្តីជូនដំណឹងខាងលើនេះ បានធ្វើឡើង ភ្លាមៗ ក្រោយពីមានការផ្សព្វផ្សាយនូវវិដេអូខ្លីប នៅថ្ងៃទី២៧ ខែកញ្ញានេះ ពីបុរសខ្មែរម្នាក់ វ័យ ៣៣ឆ្នាំ បានចេញវិដេអូខ្លីប ដោយអះអាងថា ខ្លួនត្រូវថៅកែចិន ខាងអាជីវកម្មកាស៊ីណូ អនឡាញ បង្ខាំងទុកលក់បន្ត ក្នុងតម្លៃ ១០០០ដុល្លារ។ ប៉ុន្តែលក់មិនដាច់ ក៏ថៅកែចិននោះ ឲ្យរូបគេបង់លុយ ៥០០ដុល្លារ ដើម្បីបានរួចខ្លួនមកវិញ។
ក្នុងខ្លីបវិដេអូ បុរសរូបនោះ អះអាងថា ដំបូងឡើយ ខ្លួនបានដាក់ពាក្យធ្វើការ នៅកាស៊ីណូ អនឡាញ តាមរយៈបុគ្គលិកខ្មែរ ហើយក៏ត្រូវថៅកែ យល់ព្រមឲ្យធ្វើការ ដោយសន្យាថា ឲ្យប្រាក់ខែពី ៧០០ដុល្លារ ទៅ ៨០០ដុល្លារ។ តែនៅពេលចូលធ្វើការ បែរជាត្រូវថៅកែចិន ចាប់បង្ខាំងខ្លួន ទុកលក់បន្តឲ្យថៅកែចិនផ្សេងទៀត។
យ៉ាងណាក៏ដោយ ករណីនេះ ត្រូវបានប៉ូលិសខេត្តព្រះសីហនុ រកឃើញបុរសខ្មែរម្នាក់នោះ ដែលអះអាងថា ត្រូវថៅកែចិន ចាប់បង្ខាំងទុកលក់ ហើយលក់មិនដាច់ ទើបឲ្យរូបគេ រកលុយមកលោះ ៥០០ដុល្លារ ដើម្បីបានរួចខ្លួន។
ប៉ុន្តែព័ត៌មានលម្អិត និងគួរឲ្យជឿជាក់ មិនទាន់ត្រូវបានបង្ហាញទេ។ រីឯថៅកែចិន និងកន្លែងកាស៊ីណូ អនឡាញ នៅខេត្តព្រះសីហនុ ដែលជាកន្លែងឃុំឃាំងបុរសខ្មែរម្នាក់នោះ ក៏មិនត្រូវបានបង្ហាញ និងចាប់ថៅកែចិនខុសច្បាប់នោះ នៅឡើយទេ៕
ចែករំលែកព័តមាននេះ