ទីក្រុងម៉ូស្គូ៖ ភ្នាក់ងារសម្ងាត់របស់រដ្ឋជាសមាជិកអង្គការណាតូចំនួន២កំពុងសង្ស័យថារុស្ស៊ីទំនងជាសម្ងំផលិតអាវុធស៊េរីទំនើបដើម្បីបាញ់ទម្លាក់ផ្កាយរណបរបស់ក្រុមហ៊ុនស្តាលីង (Starlink) របស់លោកអ៊ីឡនម៉ាស់ (Elon Musk)។ អាវុធរបស់រុស្ស៊ីនោះគឺបង្គុំអំបែងគ្រាប់ប្រៀបដូចជាផ្ទាំងពពកហោះទៅជិតផ្កាយរណប រួចកម្ទេចចោលតែម្ដង។ គោលបំណងសំខាន់គឺបន្ថយឥទ្ធិពលរបស់ក្រុមបស្ចិមប្រទេសកុំឱ្យមានប្រៀបខ្លាំងពេកនៅក្នុងវិស័យអវកាសព្រោះពួកគេជួយអ៊ុយក្រែនច្រើនណាស់នៅក្នុងសង្គ្រាម។
ឯកសារសម្ងាត់ដែលអ្នកសារព័ត៌មានទទួលបាននោះអះអាងថាអាវុធរបស់រុស្ស៊ីនឹងវាយប្រហារផ្កាយរណបរបស់ក្រុមហ៊ុនស្តាលីងដោយអំបែងរាប់សែនគ្រាប់ដែលមានកម្ដៅខ្លាំងដែលអាចនឹងបាញ់កម្ទេចផ្កាយរណបច្រើនគ្រឿងនៅក្នុងពេលតែមួយ។ ប៉ុន្តែផ្កាយរណបដែលមិនមែនជាគោលដៅវាយប្រហារក៏អាចនឹងរងការវាយប្រហារដោយអចេតនាផងដែរ។
អ្នកវិភាគយល់ថាអាវុធប្រភេទនេះមិនទាន់ដឹងថាតើប្រើប្រាស់ដោយប្រសិទ្ធភាពដោយមិនប៉ះពាល់អារម្មណ៍ក្រុមហ៊ុន ឬប្រទេសដែលមានផ្កាយរណបនៅលើអាកាសដែរឬទេ។ នៅលើអាកាសក៏មានផ្កាយរណបរបស់ប្រទេសចិន រុស្ស៊ី និងសម្ព័ន្ធមិត្តរបស់ខ្លួនជាច្រើនផងដែរ។ ពួកគេប្រើផ្កាយរណបដើម្បីបម្រើឱ្យវិស័យទូរគមនាគមន៍ ការពារជាតិ និងតម្រូវការសំខាន់ៗដទៃទៀត។ បើសិនមានបញ្ហាប៉ះពាល់ដល់ថ្នាក់ហ្នឹង រុស្ស៊ីប្រហែលជាមិនដាក់ឱ្យប្រើប្រាស់អាវុធប្រភេទនេះទេ។ នេះបើយោងតាមអ្នកវិភាគ។
ប៉ុន្តែមេបញ្ជាការយោធាកាណាដាទទួលបន្ទុកខាងអវកាស ឧត្ដមសេនីយ៍គ្រីស្តូហ្វឺ ហនណឺ (Christopher Horner) ថ្លែងថាគេមិនអាចមើលស្រាលបានឡើយថារុស្ស៊ីមិនផលិតអាវុធប្រភេទនេះ។ កាលពីមុន អាមេរិកធ្លាប់ចោទប្រកាន់ថារុស្ស៊ីក៏កំពុងព្យាយាមដាក់ពង្រាយអាវុធនុយក្លេអ៊ែរនៅក្នុងទីអវកាសផងដែរ។ រុស្ស៊ីធ្លាប់បានស្នើសុំឱ្យអង្គការសហប្រជាជាតិបញ្ឈប់ការដាក់ពង្រាយអាវុធដែលអាចហោះហើរក្រឡឹងពីលើផែនដី។ រុស្ស៊ីអះអាងថាលោកពូទីនគ្មានគម្រោងដាក់ពង្រាយអាវុធនុយក្លេអ៊ែរនៅក្នុងទីអវកាសទេ។ នេះបើយោងតាមប្រភពពីអេប៊ីស៊ីអូស្ត្រាលី និងប្រភពដទៃទៀត៕
ចែករំលែកព័តមាននេះ