ភ្នំពេញ៖ ករណីគ្រោះថ្នាក់ចរាចរណ៍ បង្កដោយបុរសម្នាក់ ជាជនជាតិចិន បើករថយន្តឡង់គ្រីស័រ ស៊េរីទំនើបមួយគ្រឿង បើកបុកខឿនផ្លូវ រួចព្យាយាមបើករត់គេចចេញពីកន្លែងកើតហេតុ ក៏មានអ្នកឃើញហេតុការណ៍ បើកដេញតាមឃាត់រថយន្តតាំងពីផ្លូវ២០០៤ រហូតដល់មហាវិថីសហព័ន្ធរុស្ស៊ី ខាងលិចស្ពានផ្សារដីហ៊ុយ ទើបបុរសជាជនជាតិចិនឈប់រថយន្ត។
ហេតុការណ៍នេះ បង្កឲ្យមានការភ្ញាក់ផ្អើល កាលពីវេលាម៉ោង ១០យប់ថ្ងៃអាទិត្យ ទី២៦ ខែកញ្ញា ឆ្នាំ២០២១ ស្ថិតនៅតាមបណ្តោយផ្លូវសហព័ន្ធរុស្សី សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញបុរសជាជនជាតិចិនម្នាក់ បើករថយន្តឡង់គ្រីស័រ ស៊េរីទំនើបឆ្នាំ២០២០ មួយគ្រឿង ពណ៌ស ពាក់ស្លាកលេខ ភ្នំពេញ 2BM-1888 បើកក្នុងស្ថានភាពស្រវឹង តាមបណ្តោយផ្លូវ២០០៤ ក្នុងទិសដៅពីលិចទៅកើត លុះដល់ចំណុចកើតហេតុ បានជ្រុលទៅបុកខឿនផ្លូវ បណ្តាលឲ្យរងការខូចខាតផ្នែកខាងមុខ ខាងឆ្វេងរថយន្ត ហើយជនជាតិចិន មិនព្រមឈប់រថយន្ត ក៏ព្យាយាមបើករត់ចេញពីកន្លែងកើតហេតុ ក៏មានយុវជនមួយក្រុមឃើញហេតុការណ៍ បានដេញតាមរថយន្តជនជាតិចិន តាំងពីចំណុចផ្លូវ២០០៤ ហើយបត់ទៅមហាវិថីសហព័ន្ធរុស្សី បើករត់រហូតទៅដល់ខាងលិចស្ពានផ្សាដីហ៊ុយ រថយន្តបែកកង់ខាងស្តាំទាំង២ បន្តដំណើរទៅមុខលែងរួច ក៏ក្រុមយុវជន មានគ្នា ៤ ទៅ ៥នាក់ ផ្ទុះហិង្សាវាយជនជាតិចិន ប៉ុន្តែដោយសារតែមានសមត្ថកិច្ច ឃាត់ទាន់។ តែរថយន្តនោះ ត្រូវគេវាយបែកកញ្ចក់ខាងស្តាំ និងខាងក្រោយរថយន្ត ខ្ទេចកាងខាងមុខខាងស្តាំរថយន្ត និងបែកកង់ខាងស្តាំទាំង ២គ្រាប់។
ក្រោយពេលកើតហេតុ សមត្ថកិច្ចបានរកអ្នកបកប្រែ មកសួរជនជាតិចិនថា អ្នកឯង បានបើករថយន្តប៉ះពាល់អ្វីបានជាមានគេដេញតាម ហើយមិនឈប់? តាមចម្លើយសារភាពរបស់ជនជាតិចិន ជាអ្នកបើកបរ តាមរយៈអ្នកបកប្រែ គឺជនជាតិចិននោះ បានបុកខឿនផ្លូវ នៅចំណុចផ្លូវ២០០៤ ដោយមិនបានបង្កអោយមានអ្នករងរបួសនោះទេ តែដោយសារតែភ័យពេក ទើបបើករត់គេច ហើយឃើញមានអ្នកដេញតាមពីក្រោយរឹតតែភ័យ ក៏បន្តបើករត់ កាន់តែលឿន លុះដល់ចំណុចខាងលិចស្ពានផ្សារដីហ៊ុយ ដោយសារតែរថយន្តបែកកង់ បន្តដំណើរទៅមុខលែងរួច។
សមត្ថកិច្ចខាងខណ្ឌពោធិ៍សែនជ័យ ក៏បានបោះដៃ អោយខាងសមត្ថកិច្ចខណ្ឌសែនសុខ ទៅពិនិត្យជាក់ស្តែង នៅទីតាំងកើតហេតុ ម្តុំផ្លូវ២០០៤ ឃើញថា មិនមានប៉ះពាល់ឲ្យខូចខឿនផ្លូវធ្ងន់ធ្ងរ និងមិនមានបង្កអោយមានអ្នករងរបួសទេ។ តែសមត្ថកិច្ចមូលដ្ឋាន បានឃាត់រថយន្តទុក ហើយសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ មកស្ទូចរថយន្ត យកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ និងរង់ចាំដោះស្រាយទៅតាមនីតិវិធីច្បាប់ នៅពេលក្រោយ។ អ្នកបើកបរ ជាជនជាតិចិននោះ ក៏ត្រូវនាំយកទៅសាកសួរផងដែរ ដោយសារតែបើកបរ ក្នុងស្ថានភាពស្រវឹង៕ យឹម ឈឿន
ចែករំលែកព័តមាននេះ