រាជធានីភ្នំពេញ ៖ នៅរសៀលថ្ងៃសៅរ៍ ទី២៧ កុម្ភៈ ខានស្អែកនេះ ការប្រកួតប្រដាល់អន្តរជាតិរបស់ស្ថានីយទូរទស្សន៍អាស៊ីអាគ្នេយ៍ នឹងចាប់ផ្ដើមទៀតហើយ អមដោយការប្រកួតវិលជុំរបស់កីឡាករ៨រូបនៅលើសង្វៀន។ កីឡាករកំពែង ខ្មៅ
រាជធានីភ្នំពេញ ៖ នៅរសៀលថ្ងៃសៅរ៍ ទី២៧ កុម្ភៈ ខានស្អែកនេះ ការប្រកួតប្រដាល់អន្តរជាតិរបស់ស្ថានីយទូរទស្សន៍អាស៊ីអាគ្នេយ៍ នឹងចាប់ផ្ដើមទៀតហើយ អមដោយការប្រកួតវិលជុំរបស់កីឡាករ៨រូបនៅលើសង្វៀន។ កីឡាករកំពែង ខ្មៅ និងអ៊ុង វិរៈ ដែលត្រូវប៉ះប្រកួតជាមួយកីឡាករបរទេសមកពីប្រទេសផ្សេងគ្នានោះ ទទួលការចាប់អារម្មណ៍ពីអ្នកស្នេហាការប្រដាល់មិនតិចនោះទេ ដោយសារតែពួកគេចង់ដឹងថា លទ្ធផលចុងក្រោយនឹងទៅជាយ៉ាងណា?
កីឡាករកំពែង ខ្មៅ ដែលគ្រាន់តែឮឈ្មោះក៏មានអ្នកញាក់សាច់រួចទៅហើយ នឹងត្រូវប្រកួតជាមួយកីឡាករថៃឈ្មោះ ចេន ភុប ក្នុងប្រភេទទម្ងន់៥៤គីឡូក្រាមនិងក្នុងនាមជាគូអន្តរជាតិបើកឆាក ។ កីឡាករទាំងពីរនឹងឡើងប៉ះគ្នានៅក្នុងព្រឹត្តិការណ៍ប្រដាល់ K-Cement ដែលក្នុងពេលនោះក៏មានការប្រកួតដណ្ដើមពិន្ទុក្នុងជុំទី១របស់កីឡាករ៨រូបដើម្បីឆ្ពោះទៅកាន់ការប្រកួតប្រជែងយកតំណែងជើងឯកនៅលើសង្វៀនផងដែរ។ ការប្រកួតរបស់គូនេះ ត្រូវគេកត់សម្គាល់ពីស្នាដៃរួចទៅហើយ ដោយសារតែកីឡាករកំពែង ខ្មៅ បើទោះជាមានប្រវត្តិឡើងរេញមិនច្រើនណាស់ណា ប៉ុន្តែថ្វីដៃរបស់គេលោតខ្លាំងមិនខុសពីឈ្មោះដែលបានដាក់ឡើងនោះឡើយ ។ ភាគីខាងកម្ពុជាគឺជាកីឡាករដែលមានឈ្មោះបោះសំឡេងនៅលើសង្វៀន ប៉ុន្តែកីឡាករចេន ភុប ក៏ត្រូវគេអះអាងថា មិនណយនោះដែរ ដោយសារតែក្នុងប្រទេសថៃកីឡាកររូបនេះ គឺជាអ្នកដែលមានប្រវត្តិ និងស្នាដៃច្រើនណាស់ក្នុងការវាយបំបាក់កីឡាករល្អៗ។
លោកថៃ អ៊ូ អ្នកដឹកនាំកីឡាករថៃឲ្យមកប្រកួតបានបង្ហាញពីភាពជឿជាក់ក្នុងពេលដែលការអះអាងរបស់លោក បានទាញអ្នកគាំទ្រឲ្យទុកចិត្តកីឡាករ ចេន ភុប ច្រើនជាងកំពែង ខ្មៅ នៅក្នុងពេលនេះ ។ ភាពទុកចិត្តលើការអះអាងរបស់លោកថៃ អ៊ូ កើតឡើងក្នុងមួយរយៈចុងក្រោយក្នុងពេលកីឡាករថៃមកប្រកួតសឹងតែគ្រប់គ្នាប្រមូលយកជ័យជម្នះពីកីឡាករកម្ពុជាទៅអស់ ។ កីឡាករកម្ពុជាមិនថាអ្នកស្ថិតក្នុងជួរទី១ ឬជួរទី២នោះទេ គឺទោះជាក្នុងប្រភេទទម្ងន់ណាក៏ដោយ សុទ្ធតែត្រូវកីឡាករថៃវាយឲ្យបាក់ភាគច្រើននៅលើសង្វៀន ។ មានការយល់ឃើញថា កីឡាករថៃដែលមកប្រកួតនៅលើសង្វៀនទូរទស្សន៍អាស៊ីអាគ្នេយ៍ កាន់តែពិបាកឲ្យជើងខ្លាំងកម្ពុជាយកឈ្នះ ដោយសារតែកីឡាករថៃដែលបាននាំមកគឺជាកីឡាករអាជីពរបស់ថៃ និងដោយសារតែកីឡាករកម្ពុជាកាន់តែល្បីកាន់តែធ្លាក់ដៃ ដែលខុសពីកីឡាករបរទេសគឺកាន់តែមានមុខកាន់តែពិបាករកគូប្រកួតនោះ។
លោកថៃ អ៊ូ បានអះអាងថា កីឡាករ ចេន ភុប នឹងធ្វើឲ្យកំពែង ខ្មៅ ពិបាកទប់ ។ ប៉ុន្តែលោកក៏បានបង្ហាញការព្យាករចំពោះកីឡាករកម្ពុជាថា នឹងមានសំណាងផងដែរបើគេអាចចាប់ចំណុចខ្សោយរបស់កីឡាករថៃ ហើយវាយបកបានល្អ ។ លោកថា កីឡាករចេន ភុប ធ្លាប់ប្រកួតបាន៤៩ដង ឈ្នះ៤៦ដង និងចាញ់៣ដង ប៉ុន្តែសម្រាប់ប្រវត្តិរបស់កីឡាកររូបនេះ លោកហ៊ានអះអាងថាខ្លាំងទាំងកែង ម៉ាត់ និងជើងព្រមគ្នា ។ លោកថា ការប្រកួតចាញ់៣លើករបស់គេ គឺចាញ់តាំងពីគេមិនទាន់មានបទពិសោធន៍ច្រើននោះទៅទៀត ចំណែកការប្រកួតមួយរយៈចុងក្រោយ គឺកីឡាកររូបនេះពិតជាពិបាករកអ្នកប្រដូច ។
យ៉ាងណាក៏ដោយ អ្នកព្យាករចំពោះកីឡាករកម្ពុជាក៏មានរំពឹង និងមិនជឿតាមការប្រកាសរបស់លោកថៃ អ៊ូ ទាំងស្រុងនោះដែរ ដោយសារសំអាងថា កីឡាករកម្ពុជាគឺជាជើងខ្លាំងល្អម្នាក់ ។ កំពែង ខ្មៅ ឆ្លងកាត់ការប្រកួតបាន៦៥លើក ឈ្នះ៥៧លើក ចាញ់៨លើក និងជាសិស្សគុនរបស់ក្លិបអប្សរាគុនខ្មែរ។ ដូច្នេះទាំងបទពិសោធន៍ និងភាពប៉ិនប្រសប់របស់កីឡាកររូបនេះគឺមិនអាចឲ្យថៃសម្រេចគោលដៅបានទេ បើទោះជាគេជាជើងខ្លាំងយ៉ាងណាក៏ដោយ ។ ក្រុមអ្នកទុកចិត្តគ្រូបង្វឹកប្រចាំនៅក្នុងក្លិបអប្សរាគុនខ្មែរ នៅតែផ្ដល់ទំនុកចិត្តមួយភាគថា កីឡាករកម្ពុជានឹងទទួលបានជ័យជម្នះនៅរសៀលខានស្អែក ។
នៅលើសង្វៀននេះដែរ កីឡាករ អ៊ុង វិរៈ មកពីក្លិបទ័ពឆត្រយោង៩១១ ក៏នឹងត្រូវប៉ះប្រកួតជាមួយកីឡាករជនជាតិបារាំង ឈ្មោះ តូម៉ាស់ មេនឌិស ក្នុងនាមជាគូអន្តរជាតិទី២ និងជាគូឯកនៅលើសង្វៀន ។ កីឡាករបារាំងរូបនេះ ធ្លាប់មានប្រវត្តិឡើងប្រកួតជាមួយកីឡាករថៃ និងកីឡាករមកពីប្រទេសផ្សេងច្រើននាក់មកហើយ បន្ទាប់ពីគេសម្ងំហ្វឹកហាត់ក្បាច់គុន នៅក្នុងប្រទេសថៃ។ សមាសភាពរបស់គេត្រូវគេមើលឃើញថានឹងជួយឲ្យកីឡាករកម្ពុជាដណ្ដើមបានជ័យជម្នះភាគច្រើន ដោយសារតែកីឡាករបារាំង សម្រាប់ការប្រកួតជាលក្ខណៈប្រដាល់សេរី គឺមិនងាយមានគ្រឹះហើយប្រកួតបានល្អដូចគ្នានឹងកីឡាករថៃ ឬកីឡាករកម្ពុជាដែលជាម្ចាស់ក្បាច់គុនដើមនោះឡើយ។ អ្នកទស្សនាភាគច្រើនបានយល់ឃើញថា កីឡាករបារាំង នឹងមិនអាចទៅរួចជាមួយកីឡាករកម្ពុជាបានទេ បើទោះជាគេមានស្នាដៃរួចជាស្រេចមុនពេលប៉ះអ៊ុង វិរៈក្ដី ។ ម្យ៉ាងកីឡាករ តូម៉ាស់ មេនឌិស ទើបតែឡើងប្រកួតបាន២៥លើក ឈ្នះ២៣លើក និងចាញ់២លើក ដែលអាចនិយាយបានតួលេខឡើងប្រកួតក្នុងចំនួនប៉ុណ្ណេះ គឺមិនស្មើនឹងតួលេខឡើងប្រកួតក្រៅផ្លូវការរបស់អ៊ុង វិរៈនោះផង ។
លោកញាណ សុធី អ្នករៀបចំការប្រកួតបានអះអាងថា កីឡាករបារាំងបើទោះជាប្រកួតបានតិចតួច ប៉ុន្តែសមត្ថភាពរបស់គេក៏ល្អដែរ ទើបគណៈកម្មការរៀបចំឲ្យប៉ះប្រកួតជាមួយកីឡាករអ៊ុង វិរៈដែលមានប្រវត្តិឡើងប្រកួតបាន៧៩លើក ឈ្នះ៦៩លើក ចាញ់៩លើក និងស្មើ១លើក ។
នៅសង្វៀនទូរទស្សន៍ប៉ុស្ដិ៍លេខ៥ចាប់ពីម៉ោង៥ល្ងាចថ្ងៃសៅរ៍ទី២៧ កុម្ភៈនោះដែរ ក៏មានការប្រកួតរវាងគូល្អផងដែរនៅក្នុងព្រឹត្តិការណ៍កំពូលអ្នកប្រដាល់ស៊ីម៉ង់ត៍អូដ្ឋ។ ការប្រកួតនេះ ត្រូវគេអះអាងថា មានកីឡាករសុទ្ធតែខ្លាំងៗប៉ះគ្នាដើម្បីរំលេចសង្វៀនមុនការរៀបចំព្រឹត្តិការណ៍ដណ្ដើមជើងឯកវគ្គ៣ចាប់ផ្ដើម៕
ចែករំលែកព័តមាននេះ