ធ្វើតេស្តតាមវត្ត នៅភ្នំពេញ នាថ្ងៃទី២៤កញ្ញានេះ រកឃើញវិជ្ជមានប្រមាណ ២០អង្គ-នាក់
- ភ្នំពេញ
ភ្នំពេញ៖ លទ្ធផលនៃការធ្វើតេស្ត រកកូវីដ នៅតាមវត្តនានា ក្នុងរាជធានីភ្នំពេញ នាថ្ងៃទី២៤ ខែកញ្ញានេះ រកឃើញព្រះសង្ឃ និងអ្នកនៅវត្ត ឆ្លងកូវីដ…
ភ្នំពេញ៖ លទ្ធផលនៃការធ្វើតេស្ត រកកូវីដ នៅតាមវត្តនានា ក្នុងរាជធានីភ្នំពេញ នាថ្ងៃទី២៤ ខែកញ្ញានេះ រកឃើញព្រះសង្ឃ និងអ្នកនៅវត្ត ឆ្លងកូវីដ ប្រមាណ ២០ អង្គ-នាក់។ ក្នុងមួយវត្ត វិជ្ជមានកូវីដ ត្រឹមតែ ១ ឬ២-៣អង្គ-នាក់ប៉ុណ្ណោះ។ នេះបើតាមប្រធានមន្ទីរធម្មការ និងសាសនា រាជធានីភ្នំពេញ លោក ទេព គង្គា។
លោក ទេព គង្គា បានឲ្យដឹងថា ស្ថានភាពកូវីដ នៅតាមវត្ត មិនធ្ងន់ធ្ងរទេ ដោយសារតែក្នុងចំណោមព្រះសង្ឃ តាអាចារ្យ និងអ្នកស្នាក់នៅវត្ត ដែលរកឃើញវិជ្ជមានកូវីដ១៩ ប្រមាណ ២០អង្គ-នាក់ គឺនៅក្នុងតែប្រមាណ ១០វត្តប៉ុណ្ណោះ។ នៅភ្នំពេញ មានវត្តសរុប ចំនួន ១៥១វត្ត ដោយមានព្រះសង្ឃ និងអ្នកស្នាក់នៅវត្ត សរុប ប្រមាណ ២ម៉ឺនអង្គ-នាក់។ រហូតដល់ម៉ោងជិត ៧យប់ ថ្ងៃទី២៤កញ្ញានេះ ការធ្វើតេស្ត យកសំណាក ក្នុងវត្ត សម្រេចបានជាង ៨០%ហើយ។
ករណីឆ្លងកូវីដ ក្នុងវត្តនេះ ត្រូវបានលោក ទេព គង្គា បញ្ជាក់ថា ដោយសារតែប្រជាពុទ្ធបរិស័ទ ចម្លងដល់ព្រះសង្ឃ ពេលទៅវត្ត ពេលទៅវត្តធ្វើបុណ្យកាន់បិណ្ឌប៉ុន្មានថ្ងៃដំបូងនេះ។
កាលពីល្ងាចថ្ងៃទី២៣ ខែកញ្ញា ឆ្នាំ២០២១ រាជរដ្ឋាភិបាលកម្ពុជា បានចេញនូវសេចក្តីសម្រេចមួយ ស្តីពី ការផ្អាកការរៀបចំពិធីបុណ្យកាន់ និងភ្ជុំបិណ្ឌ ដើម្បីទប់ស្កាត់ការឆ្លងរាលដាល នៃជំងឺកូវីដ១៩ ព្រោះក្នុងរយៈពេល ២ថ្ងៃ នៃការរៀបចំពិធីបុណ្យកាន់បិណ្ឌកន្លងទៅនេះ រាជរដ្ឋាភិបាលពិនិត្យឃើញថា មានការជួបជុំ និងប្រមូលផ្តុំមនុស្សជាច្រើន នៅតាមបណ្តាវត្តអារាម ដើម្បីប្រារព្ធពិធីបុណ្យកាន់បិណ្ឌ ដែលមិនអាចធានាបានការអនុវត្តត្រឹមត្រូវតាមវិធានការសុវត្ថិភាពផ្នែកសុខាភិបាល ក្នុងការបង្ការ និងទប់ស្កាត់ការឆ្លងរាលដាល នៃជំងឺកូវីដ១៩ ដែលអាចធ្វើឲ្យព្រះរាជាណាចក្រកម្ពុជា ត្រូវប្រឈមនឹងហានិភ័យខ្ពស់ នៃការឆ្លងរាលដាលទ្រង់ទ្រាយធំនៅទូទាំងប្រទេស នៃជំងឺកូវីដ១៩ ជាពិសេស មេរោគបំលែងថ្មីដែលតា ( Delta ) ដែលមានកម្រិត នៃការឆ្លងរាលដាលឆាប់រហ័សបំផុត។
សេចក្តីសម្រេចរបស់រាជរដ្ឋាភិបាល ផ្អាកពិធីបុណ្យកាន់បិណ្ឌ និងភ្ជុំបិណ្ឌនេះ ក្រោយពីផ្ទុះការឆ្លងរាលដាលជំងឺកូវីដ១៩ នៅតាមវត្តមួយចំនួន នៅពេលប្រារព្ធពិធីបុណ្យដាក់បិណ្ឌ និងភ្ជុំបិណ្ឌ បាន ២ថ្ងៃ គឺនៅថ្ងៃទី២២កញ្ញា និងថ្ងៃទី២៣ ខែកញ្ញា។ ក្នុងនោះ គ្រាន់តែវត្តចំពុះក្អែក នៅខណ្ឌច្បារអំពៅ រកឃើញព្រះសង្ឃឆ្លងកូវីដ ៤៦អង្គ និងអ្នកនៅវត្ត ចំនួន ៣នាក់ ហើយនៅវត្តនាគវ័ន មានតាអាចារ្យ ម្នាក់ និងអ្នកនៅវត្ត ២នាក់ ឆ្លងកូវីដ រកឃើញនៅថ្ងៃដាក់បិណ្ឌ១ កាលពីថ្ងៃទី២២ ខែកញ្ញា។
រដ្ឋបាលរាជធានីភ្នំពេញ តម្រូវឲ្យធ្វើតេស្ត រកកូវីដ នៅតាមវត្តទាំង ១៥១វត្ត នៅក្នុងខណ្ឌទាំង ១៤ ក្នុងរាជធានីភ្នំពេញ នាថ្ងៃទី២៤ និងថ្ងៃទី២៥ ខែកញ្ញា៕
ចែករំលែកព័តមាននេះ