អត្តពលិកអាមេរិកត្រូវតែចាក់វ៉ាកសាំងបង្ការកូវីដ មុនអាចចូលរួមអូឡាំពិកចិននៅឆ្នាំក្រោយ
សហរដ្ឋអាមេរិក ៖ អត្តពលិកអាមេរិកទាំងអស់ ត្រូវតែចាក់វ៉ាក់សាំងបង្ការកូវីដ១៩ មុនពេលពួកគេអាចធ្វើដំណើរទៅចូលរួមការ
សហរដ្ឋអាមេរិក ៖ អត្តពលិកអាមេរិកទាំងអស់ ត្រូវតែចាក់វ៉ាក់សាំងបង្ការកូវីដ១៩ មុនពេលពួកគេអាចធ្វើដំណើរទៅចូលរួមការប្រកួតកីឡាអូឡាំពិក និងប៉ារ៉ាឡាំពិករដូវរងាទីក្រុងប៉េកាំងឆ្នាំ ២០២២ ខាងមុខ។ នេះបើយោងតាមសេចក្តីណែនាំរបស់គណៈកម្មាធិការអូឡាំពិក និងប៉ារ៉ាឡាំពិកសហរដ្ឋអាមេរិក (USOPC)។
សេចក្តីណែនាំរបស់ USOPC បានឱ្យដឹងថា សុខភាព និងសុខុមាលភាពអត្តពលិកទាំងអស់គឺជាអាទិភាពកំពូល។ ហើយជំហាននេះ នឹងបង្កើនសមត្ថភាពបង្កើតបរិយាកាសសុវត្ថិភាព និងប្រសិទ្ធភាពសម្រាប់អត្តពលិក និងប្រតិភូរបស់ក្រុមសហរដ្ឋអាមេរិក។ ហើយក៏អនុញ្ញាតឱ្យយើងស្តារភាពស្ថិតស្ថេរក្នុងការរៀបចំផែនការ និងសេវាកម្មល្អបំផុតដល់អត្តពលិក។
យោងតាមច្បាប់ USOPC បានចែងថា ចាប់ពីថ្ងៃទី១ ខែវិច្ឆិកា ឆ្នាំ២០២១ តទៅ បុគ្គលិក, អត្តពលិក រួមទាំងក្រុមការងារពាក់ព័ន្ធផ្សេងទៀត ដែលចូលទៅកន្លែងរបស់ខ្លួន ត្រូវតែទទួលការចាក់វ៉ាក់សាំងបង្ការកូវីដ១៩។
យ៉ាងណាមិញ USOPC ក៏បានលើកឡើងថា ខ្លួននឹងពិចារណាការលើកលែងដោយផ្អែកលើករណីនីមួយៗរបស់បុគ្គលរៀងខ្លួន។
បុគ្គលដែលមិនទទួលការចាក់វ៉ាក់សាំងការពារនឹងទទួលបានការលើកលែង ប៉ុន្តែតម្រូវឱ្យធ្វើតេស្តជាប្រចាំ ដែលរ៉ាប់រងថ្លៃសេវាដោយ USOPC។ ទោះយ៉ាងណា រហូតមកដល់ពេលនេះ USOPC មិនទាន់បានបញ្ជាក់ពីកាលបរិច្ឆេទសម្រាប់អត្តពលិកណាម្នាក់ ដែលត្រូវចាក់វ៉ាក់សាំងនៅឡើយទេ។
សម្រាប់ព្រឹត្តិការណ៍កីឡាអូឡាំពិករដូវរងានឹងប្រព្រឹត្តទៅចាប់ពីថ្ងៃទី ៤-២០ ខែកុម្ភៈ ឆ្នាំ ២០២២ ខណៈកីឡាប៉ារ៉ាឡាំពិកនឹងចាប់ផ្តើមពីថ្ងៃទី ៤-១៣ ខែមីនា ឆ្នាំដដែល។
សូមរំលឹកថា កាលពីអូឡាំពិកទីក្រុងតូក្យូឆ្នាំ ២០២០ អត្តពលិកអាមេរិកប្រហែល១០០នាក់ ក្នុងចំណោម៦១៣នាក់ មិនបានចាក់វ៉ាក់សាំងបង្ការកូវីដនោះទេ ដែលនាំឱ្យមានរិះគន់។ ស្របពេលកីឡាករហែលទឹក Michael Andrew ដែលមិនចាក់វ៉ាក់សាំង មិនបានពាក់ម៉ាស់ថែមទៀត អំឡុងពេលធ្វើបទសម្ភាសន៍៕ (ដកស្រង់ចេញពី BBC)
ចែករំលែកព័តមាននេះ