សហរដ្ឋអាមេរិក៖ តាមបណ្ដារូបភាពគេឃើញកងឆ្មាំព្រំដែនអាមេរិក ជិះសេះដេញរុញច្រានទាំងកម្រោល ពួកអន្តោប្រវេសន៍ នៅជិតក្រុង DEL RIO រដ្ឋតិចសាស់ ដែលអំពើបែបនោះនាំឲ្យមានភាពក្ដុកក្ដួលយ៉ាងខ្លាំងនៅសហរដ្ឋអាមេរិក ដែលរដ្ឋាភិបាលលោកប្រធានាធិបតីចូបៃដិន ប្រកាសបើកការស៊ើបអង្កេតមួយលើរឿងនោះ។
រូបភាពថតដោយអ្នកកាសែតម្នាក់ បង្ហាញភ្នាក់ងារឆ្មាំព្រំដែន ជិះសេះដេញចាប់បុរសម្នាក់ដោយទាញអាវរបស់គេ។ ចំណែករូបថតមួយទៀតគេឃើញភ្នាក់ងារជិះសេះ ដេញទាំងកម្រោលពួកអន្តោប្រវេសន៍ នៅកន្លែងមានទឹកមួយ។ សមាជិកសភាគណបក្សប្រជាធិបតេយ្យ១រូប លោក BENNIE THOMPSON ប្រធានគណៈកម្មការសន្តិសុខផ្ទៃក្នុងរបស់សភាអាមេរិក ក្នុងសេចក្ដីប្រកាសមួយនិយាយថា រូបភាពទាំងនោះពីការដេញធ្វើបាបពួកអន្តោប្រវេសន៍ហៃទី នៅតាមបណ្ដោយព្រំំដែន ពិតជាទា.រុណ និងរំខានអារម្មណ៍បំផុត។
ចំណែកអ្នកនាំពាក្យសេតវិមានលោកស្រី JEN PSAKI ក្នុងសន្និសីទសាព័ត៌មានមួយទទួលស្គាល់ថា វាសែនទា.រុណក្នុងចិត្តដែលមើលឃើញអំពើបែបនោះ។ ខ្ញុំមិនដឹងដែរចំពោះការអនុវត្តយ៉ាងនេះ តែខ្ញុំមើលឃើញថានោះពិតជាអំពើមិនសមស្រប។
កងល្បាតត្រូវបានដាក់ពង្រាយកាលពីថ្ងៃទី១៩ ខែកញ្ញា នៅជិតទន្លេ RIO GRANDE ដែលនៅទីនោះ ជនអន្តោប្រវេសន៍ច្រើនពាន់នាក់ ភាគច្រើនជាជនជាតិហៃទីបោះទីតាំង ចាប់ពីច្រើនថ្ងៃមកហើយ ក្នុងក្ដីសង្ឃឹមថាអាចបានមករស់នៅក្នុងសហរដ្ឋអាមេរិក។
ឆាកនៃអំពើកម្រោលរបស់កងឆ្មាំព្រំដែនអាមេរិកកើតមាន ពេលពួកអន្តោប្រវេសន៍នាំគ្នាងូតទឹកក្នុងទន្លេRIO GRANDE ឬឆ្លងទន្លេដើម្បីទៅរកអាហារនៅម៉ិកស៊ិក យកមកឲ្យសមាជិកគ្រួសារពួកគេដែលស្ថិតនៅក្នុងដែនដីអាមេរិក។ ភ្លាមៗភ្នាក់ងារ៦នាក់ជិះសេះមកដល់ ហើយរុញច្រានពួកគេ ទាំងកម្រោលឲ្យទៅកាន់ម៉ិកស៊ិកវិញ។ សភាពការណ៍តឹងតែង ហើយពួកអន្តោប្រវេសន៍នាំគ្នារត់។
ការហូរចូលនៃពួកជនអន្តោប្រវេសន៍តាមព្រំដែន បានក្លាយទៅជាវិបត្តិមួយ សម្រាប់រដ្ឋការលោកចូបៃដិន៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ