រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជាបានមានប្រសាសន៍កាលពីព្រឹកថ្ងៃទី២៤ មិថុនា ក្នុងឱកាសសម្ពោធដាក់ឱ្យប្រើប្រាស់ជាផ្លូវការស្ពានអាកាសក្បាលថ្នល់ទី១ ថា “សូមអ្នកនយោបាយទាំងឡាយបើបានជាភូត ភូតសមុទ្រទៅ កុំភូតថ្លុក ភូតត្រញំង ។ បើភូតសមុទ្រកុំលេងឈូងសមុទ្រ លេងសមុទ្រ អាត្លង់ទិក ប៉ាស៊ីហ្វិកសមុទ្រ ឥណ្ឌាតែម្ដងទៅ។ បើភូតត្រឹមដៃសមុទ្រ ខេត្ដកោះកុង ទៅមិនរួចទេ ព្រោះឧកញ៉ាលី យ៉ុងផាត់ កសាងស្ពានរួចហើយ” ។
ពាក់ព័ន្ធនឹងបញ្ហានេះ សម្ដេចតេជោ នាយករដ្ឋមន្ដ្រីបញ្ជាក់ថា គួរឱ្យសោកស្ដាយ ដែលរយៈពេលប៉ុន្មានខែកន្លងមកនេះ មានតំណាងរាស្ដ្រម្នាក់បានឡើងនិយាយថា គេមិនឱ្យទេស្ពានអ្នកលឿង ។ ចុះឥឡូវបើជប៉ុនគេឱ្យ ដូច្នេះតើអ្នកតំណាងរាស្ដ្រឯងយកមុខទៅទុកនៅឯណា? បើនិយាយភូតលើគោកដូច្នេះ ។ សិទ្ធិបញ្ចេញមតិ ប៉ុន្ដែបញ្ចេញនេះ គឺបញ្ចេញសម្លាប់ខ្លួនឯងទេ ។ សម្ដេចតេជោនាយករដ្ឋមន្ដ្រីមានប្រសាសន៍ថា នៅពេលនោះសម្ដេចកំពុងធ្វើ ការពិភាក្សាជាមួយលោកអតីតនាយករដ្ឋ មន្ដ្រីជប៉ុន ពេលធ្វើដំណើរទៅប្រជុំមេគង្គនៅជប៉ុន ។
ពេលនោះគាត់ធ្វើការជំរុញឱ្យសិក្សា សំរេចអំពីការធ្វើស្ពាននេះ មុនគាត់លាលែងពី តំណែងប្រហែលជា១០ថ្ងៃតែប៉ុណ្ណោះ គាត់ធ្វើការសំរេចចិត្ដក្នុងគណៈរដ្ឋមន្ដ្រីជប៉ុន ដើម្បីផ្ដល់ស្ពាននេះ ។ ទាក់ទិននឹងបញ្ហានេះ គេបានកត់សំគាល់ថា ជាអ្នកនយោបាយភូត រាប់ទាំងការវាយ ប្រហារទៅលើរដ្ឋាភិបាលជប៉ុនដែលធ្លាប់ សន្យាឱ្យស្ពានអ្នកលឿងតាំងពីប៉ុន្មានឆ្នាំរួចមកហើយ ។ ដូច្នេះកម្ពុជានឹងបានស្ពានអ្នកលឿង ហើយស្ពាននេះមិនគ្រាន់តែបានតភ្ជាប់ ភ្នំពេញ ទៅជាមួយស្វាយរៀង ព្រៃវែង និង ខេត្ដដទៃទេ ប៉ុន្ដែនេះគឺជាស្ពានអាស៊ាន ហាយវ៉េ អាចតភ្ជាប់ធ្វើសមាហរណកម្ម គឺរបៀងសេដ្ឋកិច្ចក្នុងតំបន់ អនុតំបន់មេគង្គ ដែលតភ្ជាប់កម្ពុជា-វៀតណាម-ថៃ ទៅប្រទេសដទៃទៀតដែលឆ្លងកាត់ ៕
ចែករំលែកព័តមាននេះ