រាជធានីភ្នំពេញ ៖ ដោយមើលឃើញថា ប្រទេសកម្ពុជា ជាប្រទេសដ៏មានសក្តានុពលបំផុត ក្នុងការធ្វើផលិតកម្មដំណាំស្រូវ កាលពីថ្ងៃចន្ទ ទី២៥ តុលា ក្រុមហ៊ុន SCHAMRICE CAMBODIA PTE, LTD (SCPL) បានធ្វើពិធីចុះហត្ថលេខាលើការវិនិយោគផលិតកម្មស្រូវជាមួយក្រុមហ៊ុន BERNAS ដែលជាក្រុមហ៊ុនដ៏ធំមួយរបស់ប្រទេសម៉ាឡេស៊ី ដោយបានការគាំទ្រពីរដ្ឋាភិបាលម៉ាឡេស៊ី នៅសណ្ឋាគារអាំងទែរកុងទីណង់តាល់។ ពិធីចុះហត្ថលេខានេះធ្វើឡើងដោយម្ចាស់ភាគហ៊ុនចំនួន៣ ដែលភាគីកម្ពុជាមានម្ចាស់ភាគហ៊ុនចំនួន២ គឺលោកឆាយ ជីងហ៊ាង និងលោកដួង គឹមឡាយ។ ចំណែកភាគីម៉ាឡេស៊ី គឺលោក Noorhisham Bin Nordin ដែលលោកមានចំណេះដឹងជ្រៅជ្រះលើផ្នែកឧស្សាហកម្មស្រូវ និងរោងចក្រកិនស្រូវនៅម៉ាឡេស៊ី។
ចំណុចសំខាន់លើការចុះហត្ថលេខានេះផងដែរ មិនត្រឹមតែធ្វើការវិនិយោគលើការនាំអង្ករចេញទៅកាន់ប្រទេសម៉ាឡេស៊ីមួយមុខនោះទេ សំខាន់គឺការរួមគ្នាបង្កើតបណ្តាញឧស្សាហកម្មស្រូវនៅប្រទេសកម្ពុជា ឱ្យបានខ្លាំងក្លាទ្វេឡើង។ លោកដួង គឹមឡាយ នាយករងក្រុមហ៊ុន SCPL បានមានប្រសាសន៍ឱ្យដឹងថា ជំហានដំបូងស្ថិតនៅក្នុងការសាកល្បង SCPL នឹងធ្វើការនាំអង្ករទៅកាន់ម៉ាឡេស៊ី ឱ្យបាន១ម៉ឺន២ពាន់តោនក្នុងមួយឆ្នាំ បន្ទាប់មកនឹងមានការវិនិយោគក្នុងទឹកប្រាក់រហូតដល់ទៅ៨លានដុល្លារសហរដ្ឋអាមេរិក ដើម្បីកសាងម៉ាស៊ីនកិនស្រូវ និងផលិតគ្រាប់ពូជនៅខេត្តកំពង់ចាម និងគំរោងដែលមានរយៈពេល៥ឆ្នាំគឺ SCPL នឹងប្រើប្រាស់ថវិកាគំរោងដែលមានចំនួនសរុបរហូតដល់ទៅ៥០០លានដុល្លារអាមេរិក។
ក្រុមហ៊ុន SCHAMRICE CAMBODIA PTE, LTD បានបង្កើតឡើងនៅថ្ងៃទី២៦ កក្កដា ២០១០ ដោយបានចុះបញ្ជីនៅក្រសួងពាណិជ្ជកម្ម។ រហូតមកដល់ពេលនេះ SCPL បានក្លាយជាក្រុមហ៊ុនដ៏ធំមួយរបស់ប្រទេសកម្ពុជា ក្នុងការទទួលសិទ្ធិផ្តាច់មុខ និងបានការទទួលស្គាល់ពីប្រទេសម៉ាឡេស៊ី ក្នុងការនាំអង្ករចេញទៅកាន់ប្រទេសម៉ាឡេស៊ី។ ក្រុម SCPL មានគំនិតផ្តួចផ្តើមយ៉ាងធំធេងក្នុងការធ្វើឧស្សាហកម្មលើផលិតកម្មស្រូវនៅកម្ពុជា ដើម្បីធ្វើយ៉ាងណាជំរុញឱ្យមានការផលិតដែលអាចនាំអង្ករចេញបានកាន់តែច្រើនឡើង។ គោលបំណងទាំងនេះសមស្របទៅនឹងប្រសាសន៍របស់សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា ដែលបានថ្លែងកាលពីពេលថ្មីៗនេះថា កម្ពុជា នឹងនាំស្រូវចេញទៅកាន់ប្រទេសក្រៅឱ្យបាន១លានតោនក្នុងមួយឆ្នាំ។ ជាមួយនឹងការប្តេជ្ញាចិត្តនេះ ក្រុមហ៊ុន SCHAMRICE CAMBODIA PTE, LTD ដែលទទួលបានការគាំទ្រពីរាជរដ្ឋាភិបាលកម្ពុជា និងរដ្ឋាភិបាលប្រទេសម៉ាឡេស៊ី ពិតជាផ្តល់នូវអត្ថប្រយោជន៍យា៉ងខ្លាំងក្នុងការជួយដល់រាជរដ្ឋាភិបាលកម្ពុជា ដើម្បីអភិវឌ្ឍន៍ផលិតកម្មស្រូវ និងឧស្សាហកម្មអង្ករនៅកម្ពុជា ហើយបានធ្វើឱ្យមានលទ្ធភាពប្រើប្រាស់អស់នូវសក្តានុពលរបស់ខ្លួន ដើម្បីឱ្យក្លាយជាប្រទេសនាំអង្ករចេញដ៏សំខាន់មួយនៅក្នុងពិភពលោក។
ជាមួយនឹងការខិតខំប្រឹងប្រែងនេះ SCPL មានផែនការជាយុទ្ធសាស្ត្រសំខាន់ៗជាច្រើន គឺធ្វើយ៉ាងណាស្វែងរកដៃគូសហគមន៍ផលិតឱ្យបានច្រើន ហើយនៅពេលសហគមន៍ទាំងនោះផ្តល់នូវសេចក្តីទុកចិត្តហើយនោះ SCPL នឹងផ្តល់ភាពងាយស្រួលជាច្រើនដូចជាការផ្តល់គ្រាប់ពូជ ផ្តល់ជី មិនតែប៉ុណ្ណោះថែមទាំងជួយផ្នែកបច្ចេកទេស ដើម្បីឱ្យប្រជាកសិកររបស់យើងមានលទ្ធភាពផលិតឱ្យបានច្រើនទ្វេឡើង។ ប្រទេសកម្ពុជា មានប្រជាជន៥៩ភាគរយពឹងផ្អែកទៅលើរបរកសិកម្ម។ មានរបាយការណ៍មួយចំនួនបានបង្ហាញថា ជារៀងរាល់ឆ្នាំកម្ពុជាមានស្រូវប្រមាណ២,៥ទៅ៣លានតោន តែស្រូវមួយចំនួនត្រូវបានលួចរត់ពន្ធលក់ទៅឱ្យប្រទេសជិតខាង ហើយថែមទាំងត្រូវបានគេកែច្នៃលក់នៅជុំវិញពិភពលោកទៀតផង។ SCPL មានបំណងសំខាន់បំផុត គឺចង់ឱ្យប្រជាកសិករខ្មែររួមគ្នាធ្វើយ៉ាងណាជំរុញការធ្វើផលិតកម្មស្រូវឱ្យបានខ្លាំងក្លា ដើម្បីលើកកំពស់សេដ្ឋកិច្ចជាតិផង ក៏ដូចជាលើកស្ទួយជីវភាពរស់នៅក្នុងក្រុមគ្រួសារឱ្យបានរុងរឿងថែមទៀតផង៕
ចែករំលែកព័តមាននេះ