ប្រទេសបារាំង ៖ រដ្ឋមន្ត្រីការបេទេសបារាំងលោក JEAN YVES LE DRIAN លើកឡើងកាលពីថ្ងៃទី១៨ ខែកញ្ញា ឆ្នាំ២០២១ ពីវិបត្តិធ្ងន់ធ្ងរមួយកើតឡើង ដោយការបំផ្លាញកុងត្រាដ៏ធំមហាសាលមួយ នៃការលក់នាវាមុជទឹកបារាំងឲ្យអូស្ត្រាលី ដោយលោកបរិហារពីការភូតកុហក និងពោរពេញដោយភាពវៀចវេរ និងជាការកាត់ផ្ដាច់ដ៏ចម្បងនៃទំនុកចិត្ត និងជាការមើលងាយមើលថោកមួយ ពីចំណាក់សម្ព័ន្ធមិត្តបារាំង។
តាមទូរទស្សន៍ FRANCE 2 លោកJEAN YVES LE DRIAN បានពោលថា បែបនោះជាហេតុផល នៃការហៅឯកអគ្គរដ្ឋទូតបារាំង ប្រចាំក្រុងកង់បេរ៉ា និងក្រុងវ៉ាស៊ិនតោន ឲ្យត្រឡប់មកស្រុកវិញ។ លោកថា នោះក៏មកពីវិបត្តិធ្ងន់ធ្ងរមួយរវាងពួកយើង។ ចំណែកការកោះហៅឯកអគ្គរដ្ឋទូតបារាំងពីក្រុងឡុងដ៏មកវិញ លោកថា មកពីវាឥតប្រយោជន៍។ រដ្ឋមន្ត្រីការបរទេសបារាំងយល់ឃើញម្យ៉ាងទៀតថា ចំពោះអ្វីដែលទើបកើតមាន នឹងអាចឲ្យមានការកំណត់និយមន័យថ្មី នៃយុទ្ធសាស្ត្ររបស់អូតង់ តែលោកមិនបានលើកឡើងពីការចាកចេញពីសម្ព័ន្ធភាពយោធានោះទេ។
ដោយសារខឹងចិត្តខ្លាំងចំពោះការកាត់មុខកុងត្រាដ៏ធំនោះ ពីសំណាក់អាមេរិក និងអង់គ្លេស ដែលទៅបង្កើតសម្ព័ន្ធភាពត្រីភាគីមួយ បារាំងមុននេះបានលុបចោលរួចហើយ ពិធីជប់លៀងមួយដែលគ្រោងធ្វើនៅក្រុងវ៉ាស៊ិនតោន។
ពិធីជប់លៀងនោះគ្រោងធ្វើនៅនិវេសនដ្ឋាននៃស្ថានទូតបារាំងប្រចាំក្រុងវ៉ាស៊ិនតោន ដើម្បីអបអរសាទរដល់ខួបនៃការប្រយុទ្ធជើងទឹកដ៏ខ្លាំងក្លានៃសង្គ្រាមដណ្ដើមឯករាជ្យសហរដ្ឋអាមេរិក ជាមួយជោគជ័យរបស់កងនាវាចម្បាំងបារាំង លើកងនាវាចម្បាំងអង់គ្លេស ថ្ងៃទី៥ ខែកញ្ញា ឆ្នាំ១៧៨១។
កាលពីថ្ងៃទី១៦ ខែកញ្ញា រដ្ឋមន្ត្រីការពារប្រទេសអូស្ត្រាលីលើកហេតុផលថា អូស្ត្រាលីសម្រេចបោះបង់ចោលកុងត្រាដ៏៏ធំនោះ មានទឹកប្រាក់ដល់៥៨ពាន់លានអឹរ៉ូ សម្រាប់ទិញនាវាមុជទឹកធម្មតាបារាំង១២គ្រឿង ងាកមករកនាវាមុជទឹកនុយក្លេអ៊ែរអង់គ្លេស-អាមេរិក ព្រោះវាសមស្របនឹងផលប្រយោជន៍អូស្ត្រាលីខ្លាំងជាង។
ប្រភពនៃភ្លើងឆេះក្នុងទំនាក់ទំនងអាមេរិក-បារាំង គឺការបង្កើតសម្ព័ន្ធភាពថ្មីឥណ្ឌូ-ប៉ាសីុហ្វិក ប្រកាសកាលពីថៃ្ងទី១៥ ខែកញ្ញា ដោយលោកចូបៃដិនជាមួយអង់គ្លេស និងអូស្ត្រាលី។ ភាពជាដៃគូនោះមានឈ្មោះថា AUKUS ដែលច្បាស់ណាស់ គឺសំដៅប្រឆាំងចិន៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ